3000 kilometrə qədər məsafədəki hədəfləri vura bilən yeni Ukrayna uzaqmənzilli “Flamingo” raketi hərbi əməliyyatların gedişinə əhəmiyyətli təsir göstərəcəyinə və düşmən xəttinin dərinliklərində strateji hədəfləri vurmaq üçün yeni imkanlar açacağına ümid verir.
Moderator.az xəbər verir ki, aviasiya eksperti Valeri Romanenkonun “Azadlıq” radiosuna verdiyi məlumata görə, Rusiya hərbi sənaye kompleksi müəssisələrinin böyük əksəriyyəti raketin zərbə zonasına düşür.
"Rusiya hərbi-sənaye kompleksinin əsas müəssisələri Moskva vilayətində, Volqaboyu və Uralda yerləşir. Bütün bu ərazilər hücuma məruz qalır. Məsələn, Uralda rusların "Oreşnik" və bütün raketləri istehsal edən Votkinsk şəhəri var. O, cəmi 1400 kilometr məsafədədir. Mənim hesablamalarıma görə, Rusiya hərbi kompleksinin təxminən 90%-i atəşə məruz qalacaq", - deyir Romanenko.
Eyni zamanda, bu qanadlı raketlərin Ukrayna Silahlı Qüvvələri tərəfindən nə vaxt qəbul ediləcəyi və hərbçilər tərəfindən real döyüşlərdə istifadə ediləcəyi hələlik məlum deyil.
"Flamingo" raketi haqda nə məlumdur?
“Fire Point Defense”nin verdiyi məlumata görə, “Flamingo” 1150 kq ağırlığında döyüş başlığı daşıya bilən və Rusiyanın içərilərinə 3000 kilometrə qədər uça bilən uzunmənzilli qanadlı raketdir. Bununla belə, raket kifayət qədər sürətlə inkişaf etdirildi. İdeyadan döyüş meydanında ilk uğurlu sınaqlara qədər doqquz aydan az vaxt keçdi.
Eyni zamanda, “Defence Express” Ukraynanın “Flamingo” raketində ola biləcək çatışmazlıqlar barədə məlumat yayıb. Mütəxəssislər qeyd ediblər ki, obyekt nə qədər böyükdürsə, radarlarda bir o qədər yaxşı nəzərə çarpan olur. Həmçinin dizaynın sadələşdirilməsinə görə, “Flamingo” raketində radarın görmə qabiliyyətini azaltmaq texnologiyaları yoxdur.
