Ermənistan Baş naziri Nikol Paşinyan komanda üzvlərinə Rusiya ilə bağlı xəbərdarlıq edib.
Bu barədə “İravunk” qəzeti məlumat yayıb.
“Hakimiyyətdəki mənbələrimizə görə, Paşinyan parlamentin payız sessiyası öncəsi hakim “Vətəndaş Müqaviləsi” Partiyası fraksiyasının rəhbəri Hayk Konjoryan vasitəsilə deputatlara yeni göstərişlər verib: az danışın, çox işləyin. Həmçinin baş nazir xüsusi xəbərdarlıq edib ki, hamı bir daha Rusiya mövzularında danışmamalıdır”, - nəşr bildirib.
Mənbə qeyd edib ki, Paşinyan həmçinin bütün ermənilərin katolikosu II Qaregin haqqında danışmamaq, parlamentin vitse-spikeri, Türkiyə üzrə xüsusi nümayəndə Ruben Rubinyanın göstərişlərinə diqqətlə qulaq asmaq göstərişi verib: “İki yeni deputatı isə bir daha ağızlarını açmamağa çağırıb”.
Xatırladaq ki, Ermənistan baş naziri avqustun 31-də Çində Rusiya Prezidenti Vladimir Putinlə görüşüb. Hakim komandaya edilən xəbərdarlığın bundan sonra gəlməsi diqqət çəkib.
Cross Media Təhlil Mərkəzinin analitiki, siyasi şərhçi Mübariz GöyüşlüSherg.az-a deyib ki, Ermənistanda həmişə sürüşkən siyasətin şahidi olmuşuq:
"Onlar bu gün bir fikir səsləndirirsə, sabah, yaxud ertəsi gün tam fərqli bir mövqe ortaya qoya biləcək "potensialdadırlar". Məsələn, Paşinyan hakimiyyətə gəldiyi ilk dövrlərdə Rusiyaya qarşı mənfi açıqlamaları, bəyanatları və davranışları ilə seçilirdi. Elə həmin dövrdə onun bəzi çıxış və qərarlarını olduqca sərt hesab edənlər də vardı.
Hətta belə qənaət formalaşmışdı ki, Rusiyanın Ermənistana hərbi müdaxilə etmək, yaxud çevriliş təşkil etmək ehtimalı mümkündür. Digər tərəfdən İrəvanda Rusiyaya bağlı bir qorxu mühitinin də yarandığının şahidi olurduq. Məhz bu səbəbdən görünür ki, Paşinyan sonrakı mərhələdə ritorikasını yumşaltmağa, üslubunu sadələşdirməyə və Rusiyaya qarşı sərt ifadələrdən çəkinməyə üstünlük verib. Gələcəkdə bu siyasətin hansı istiqamətdə inkişaf edəcəyini isə onun davranışlarını müşahidə etməklə görmək mümkün olacaq".
