“Hələ o haqda heç nə demək olmaz. Çünki hələ müəyyən deyil Ramiz Mehdiyev barədə hansı orqan cinayət işi qaldırıb, onun həbsinə kim təqdimat verib? Yəni bu barədə heç bir rəsmi məlumat olmadığı üçün mən də bir hüquqşünas kimi heç nə deyə bilmərəm. Bəlkə də bu yalandır? Odur ki, bu mövzuda hansısa fikir söyləmək doğru deyil. Çünki heç bir rəsmi orqanın özünün rəsmi bir məlumatı yayılmayıb. Sadəcə mətbuatda gedən bir məlumatdan söhbət gedir. Mən nə bilim o məlumatı kim hansı qaydada veribdir. Axı bu, əsaslı deyil”.

Bu fikirləri Moderator.az əməkdaşının sabiq PA rəhbəri Ramiz Mehdiyevin həbsi və Səbail Rayın Məhkəməsi tərəfindən 4 aylıq ev dustaqlığına məhkum edilməsi barədə məlumatlar haqda sualını cavablandırarkən sabiq baş prokuror Əli Ömərov söyləyib.

“Ramiz Mehdiyevin həbsi haqda məlumatlar əsaslı olmasa, yəqin ki, bunu müvafiq orqanlar təkzib edərdi” fikrinə isə sabiq baş prokuror belə münasibət bildirib:

“Kim təkzib edəcək? Ramiz Mehdiyevin özünə jurnalist zəng edib bu haqda sual verdi, o dərhal telefonu qapatdı. Deməli, bu deyilənlər gerçək olsa, cavab verərdi. Ona görə də mən də heç bir münasibət bidirə bilmərəm. Çünki, bir daha deyirəm: Ramiz Mehdiyev haqda cinayət işinin kim tərəfindən qaldırılması da məlum deyil. O maddələri ona hansı orqan verib: prokurorluq, Dövlət Təhlükəsizlik Xidməti, yoxsa Daxili İşlər Nazirliyi? Heç biri müəyyən deyil axı? Əgər bunlar nə vaxtsa rəsmən açıqlansa, onun barəsində rəsmi orqanlar məlumat versə, o halda mən də münasibətimi bildirərəm...”

Xatırladaq ki, "Trend"in mənbələrə istinadla yaydığı məlumata görə, Mehdiyev Ramiz Ənvər oğlu barədə cinayət işi üzrə qərarı Bakı şəhəri Səbail rayon məhkəməsi qəbul edib. Ramiz Mehdiyev Cinayət Məcəlləsinin 278.1 (dövlət hakimiyyətini ələ keçirməyə yönələn əməllər), 274 (dövlətə xəyanət) və 193-1.3.2-ci (cinayət yolu ilə əldə edilmiş əmlakı leqallaşdırma) maddələri ilə ittiham olunur.