"Azərbaycandan Ermənistana yanacaq idxalı ilə bağlı müzakirələr olub, əməkdaşlıq üçün imkanlar mövcuddur".

Bunu Ermənistanın Baş nazirinin müavini Mher Qriqoryan “Azadlıq Radiosu”nun erməni xidmətinə deyib.

Baş nazirin müavini Mher Qriqoryan təsdiqləyib ki, Azərbaycandan Ermənistana neft məhsullarının ixracı məsələsi bu yaxınlarda Qəbələdə Azərbaycan Baş nazirinin müavini Şahin Mustafayevlə müzakirə olunub.

“Azadlıq Radiosu”nun İrəvan və Bakının Azərbaycandan yanacaq idxalı ilə bağlı artıq razılığa gəlib-gəlmədiyi barədə sualına cavab olaraq Baş nazirin müavini bu gün belə cavab verib: “Bəli, müzakirələr aparılıb, əməkdaşlıq üçün imkanlar var”.

Həmçinin Baş nazirin müavinindən Azərbaycandan hansı həcmdə yanacaq idxalının müzakirə olunduğunu, hansı Ermənistan şirkətlərinin Azərbaycandan yanacaq almaq niyyətində olduğunu, Azərbaycanın Ermənistana neft məhsullarını hansı qiymətə satmağa hazır olduğunu və Rusiyadan idxal edilən yanacaqla rəqabətədavamlı olub-olmadığı soruşulub.

Baş nazirin müavini bu suallara cavab olaraq bildirib ki, “yanacaqla bağlı növbəti proses artıq özəl ixracatçılar və idxalçılar arasında əməkdaşlıq çərçivəsində aparılır və mümkün razılaşmaların şərtləri bazar prinsiplərinə uyğun olacaq”.

İqtisadçı Natiq Cəfərli Sherg.az-a bildirib ki, Azərbaycanın Ermənistana qarşı atdığı humanist və praqmatik addımlar regionda davamlı sülhün formalaşması üçün mühüm baza yaradır. Onun sözlərinə görə, rəsmi Bakının iqtisadi əməkdaşlıq istiqamətində təklif etdiyi jestlər, xüsusilə də enerji daşıyıcılarının Ermənistana ixracı, həm diplomatik böyüklüyün, həm də strateji düşüncənin göstəricisidir:

“İki ölkə arasında ticarət əlaqələrinin bərpası təkcə iqtisadi qazanclarla məhdudlaşmır. Azərbaycan öz maraqlarından çıxış edərək həm iqtisadi dividendlər əldə edir, həm də regionda təhlükəsizliyin möhkəmlənməsinə töhfə verir. Ermənistan Azərbaycandan nə qədər çox enerji və digər strateji məhsullar idxal edəcəksə, qarşılıqlı asılılıq bir o qədər güclənəcək, bu isə sülh prosesini daha dayanıqlı edəcək. Bakı hazırda qalib dövlətə xas davranış nümayiş etdirir – konstruktivlik, böyüklük və özünəinam fonunda Ermənistanla normal münasibətlərin qurulmasına real şərait yaradır. Bu, həm iqtisadi, həm də diplomatik arqumentlərin üst-üstə düşdüyü nadir situasiyalardandır. Enerji tədarükü Ermənistanın daxili bazarında sabitlik yaradacaq, Azərbaycan isə bundan həm iqtisadi, həm də siyasi baxımdan qazanclı çıxacaq”.

N.Cəfərli hesab edir ki, bölgənin gələcək inkişafı məhz inteqrasiyadan asılı olacaq:

“Ermənistan iqtisadiyyatının Türkiyə və Azərbaycanla nə qədər çox əlaqələnməsi təmin olunsa, regionda sülh bir o qədər möhkəmlənəcək. Ermənistan üçün ən rasional yol qonşuları ilə əməkdaşlığı dərinləşdirməkdir. Bu, həm onların iqtisadi rifahına xidmət edəcək, həm də uzunmüddətli siyasi sabitliyi şərtləndirəcək”.

Onun fikrincə, enerji idxalı başda olmaqla yeni iqtisadi xətt Cənubi Qafqazda tamamilə yeni bir dövrün başlanğıcını qoyur və bu prosesin hər iki tərəf üçün faydalı olacağı şübhəsizdir.