Dövlət Təhlükəsizliyi Xidməti tərəfindən saxlanılan Prezident Administrasiyasının sabiq rəhbəri Ramiz Mehdiyevin xəyanətinin başında Rusiya faktorunun olması barədə dəfələrlə mediada yazılıb. Hətta bir müddət əvvəl Ramiz Mehdiyevin dövlət çevrilişi planı ilə bağlı Rusiyanın müəyyən dairələrinə göndərdiyi məktub da üzə çıxıb. Məktubun mətninə görə, Mehdiyev ölkədə hakimiyyətin üç qolunun - qanunverici, icra və məhkəmə orqanlarının fəaliyyətinə nəzarəti xüsusi "Dövlət Şurası" adlı quruma həvalə etməyi təklif edib. "Boz kardinal"ın "Dövlət Şurası"nın 50 nəfərdən ibarət olacağı qeyd olunub. 50 nəfərlik "Dövlət Şurası"nda yer alacaq şəxslərin kimliyi haqqında da yazılar gedib. Onların arasında müxalifət nümayəndələri də var. Həmin müxalifətçilərdən birinin AXCP sədri Əli Kərimli olduğu xüsusi vurğulanır. Son proseslər və "Ramiz Mehdiyev İşi" siyasi sferada təmizləmə zərurətini ortaya çıxardı. İddia edilir ki, "Milli Şura" da Ramiz Mehdiyevin layihəsi olub. Xüsusən, Əli Kərimli, Gültəkin Hacıbəylinin R.Mehdiyevlə pərdəarxası təmaslarından bəhs edilir. "Milli Şura" məsələsi müxalifət düşərgəsində qarşılıqlı ittihamları da gündəmə gətirib. Bəzi partiya sədrləri, məsələn, ADP sədri Sərdar Cəlaloğlu digər siyasi təşkilat rəhbərlərini, deputatları, 1990-cı, 2000-ci illərdə siyasi səhnədə aktiv rol oynamış şəxsləri də "Milli Şura" üzvləri olmaqda ittiham edərək, onların da istintaqa çağırılmasını təklif edib. Adları çəkilənlər isə S.Cəlaloğlunun iddialarının əsassız olduğunu deyərək partiya sədrini tənqid ediblər.

Baş verənləri Sherg.az-a dəyərləndirən AĞ Partiyanın sədri Tural Abbaslı deyib ki, Ramiz Mehdiyev ətrafında baş verən siyasi hadisələr, istintaq və cinayət prosesi bəzi şəxslər tərəfindən qəsdən, yaxud bilmədən fərqli istiqamətə çəkilir. Partiya rəhbəri qeyd edib ki, sanki yaşananlar fonunda Ramiz Mehdiyev fiquru, onun qanunsuz fəaliyyəti yaddan çıxır və prosesin yan qollarına əsas diqqət yönəldilir: "AXCP sədri Əli Kərimlinin həbsi, "Milli Şura"nın araşdırılması, sonradan müxalifət partiyalarında təmsil olunanların rəqabət mühiti çərçivəsində bir-birini bu və ya digər məsələlərdə ittiham etməsi və s. məsələlər, əslində, Ramiz Mehdiyevi dolayısı ilə prosesdən kənarda saxlayır. Hətta bəzi bir qrup siyasilər, partiya üzvləri iddia edirlər ki, guya əsas hədəf Əli Kərimli, yəni onun həbsi imiş. Halbuki, hamımız yaxşı bilirik ki, R.Mehdiyev o qədər böyük fiqur, siyasi-iqtisadi rıçaqları o qədər gücü olub ki, siyasi düşərgədə ancaq o kimlərisə prosesə cəlb edə bilərdi. Müxalifətdən kimsə R.Mehdiyevi nəyəsə cəlb edə bilməzdi. Onu da istisna etmirəm ki, istintaq genişləndikcə, müxtəlif siyasi fiqurların, müxalifətçilərin, məmurların, şərhçilərin, media təmsilçilərinin adları da istintaqda peyda olsun. Amma unutmayaq ki, çibanın başı Ramiz Mehdiyevdir və sifarişi aldığı da Rusiyadır. Təbii ki, bu işi görmək üçün onun dəstəsi, şəbəkəsi də olub. Bu faktı unutmadan hər kəs sözünü, rəyini deyə bilər".

T.Abbaslı əlavə edib ki, o, əlində tutarlı faktları olan siyasilərin bir-birini ittiham etməsinin əleyhinə deyil: "Əgər kiminsə əlində sübutu, dəlili varsa, bildiyini danışsın. Heç nə gizli qalmasın. Bu problem, bu düyün nə qədər tez zamanda çözülsə, həqiqətlər ortaya çıxsa, o qədər yaxşıdır. Belə olarsa, növbəti mərhələyə daha tez qədəm qoyarıq. Prosesin daha sürətli getməsinin, aidiyyəti insanların layiqli cəza almasının tərəfdarıyam. Ramiz Mehdiyev məsələsi bitmədən Azərbaycanın yeni siyasi mərhələyə keçməsi çətin olacaq".