KEŞLƏ YÜKBOŞALTMA STANSİYASINDA NƏLƏR BAŞ VERİR?
DİA.AZ: - Hələ bir müddət əvvəldən məlumat verərək bildirmişdik ki, 2010-cu ilin sentyabrın birindən etibarən Keşlə Dəmir Yol Stansiyasının "Yük Boşaltma Həyətində" işləyən 40-a yaxın avtokran sahibini rəhbərlik yük boşaltma işindən kənarlaşdıraraq həmin sahəni də digər sahələr kimi öz inhisarına alıb.
Mötəbər mənbələrdən aldığımız məlumatda deyilirdi ki, 2010-cu ilin iyul ayından etibarən bu təşkilata rəhbər vəzifəsinə keçəndən sonra "yuxarıların etimadını" doğrultmaq üçün Təlabani Tahirov "təmizləmə" adı altında öz “müdrik" ideyalarını həyata keçirməyə başlayıb.”Yuxarıların”, yəni Azərbaycan Dəmir Yolları Qapalı Səhmdar Cəmiyyətinin sədri Arif Əsgərovun bu yönümdə xeyir-duasını alan Təlabani Tahirov Keşlə Yük Boşaltma Həyətində "analoqu olmayan qara bazar" yaradıb: “Onun inkasatorlarını Keşlə Yük Boşaltma Həyətinin hər yerində görmək olar”.
Mənbənin iddialarına görə, nəqliyyat naziri Ziya Məmmədovun qardaşı, deputat Elton Məmmədov üçün hətta biri üçün gündəlik boşaldılan hər vaqondan 20 azn pul yığılır.
Nəzərə alsaq ki, gün ərzində stansiyaya orta hesabla 120-150 vaqon daxil olur və bu minvalla da deputatın təkcə buradan əldə etdiyi məbləği müəyyən etmək olar.
Mənbə bildirir ki, Keşlə Dəmir Yol Stansiyanın rəisi Təlabani Tahirov görəvə alınandan sonra bu idarədə vaqon boşaltma xərcləri də artıb: “Belə ki, əvvəllər 80 manata boşaldılan vaqon Təlabani müəllimin monopol qaydalarından sonra 110 manata boşaldılır. Hər bir vaqon sahibindən alınan 110 manatın cəmi 20 manatı istismar olunan kran sahibinə verilir. Qalan 90 manat isə mərkəzləşmiş qaydada qəbz olmadan inkasatorlar tərəfindən yığılır və rəhbərliyə ötürülür”.
Mənbə bildiri ki, Tələbani müəllim hətta qul kimi işlətdiyi fəhlələrdən də pul yığır: “Bu qədər alınan pulun müqabilində təkcə qapıda 1.2 azn yazılmış qəbz verilir. Bunun qarşılığında isə yerli maşınlardan 3 manat, İran maşınlarından isə 20 manatdan yığılır. Hər bir vaqon 2-3 maşına boşaldıldığı halda nə qədər pulun mənimsənilməsini hesablamaq çox da çətin olmaz”.
Onu da bildirək ki, bütün bu faktları DİA.AZ əməkdaşı yerində də müşahidə edib və araşdırmalarımızın nəticələrini yaxın zamanlarda diqqətinizə çatdıracağıq. Hər halda antikorrupsiya dönəmində korrupsiya yuvalarından hazırlanan reportajlar hər kəs üçün maraqlıdır. Elə korrupsiyaya qarşı mübarizə idarəsi üçün də.
Bu arada redaksiyamıza daxil olan bir başqa məlumatda vurğulanır ki, Tələbani Tahir əslən kürd olduğundan bu gün iqtidar içindəki kürd qruplaşması tərəfindən də ciddi şəkildə dəstəklənir. Hər halda bu faktın özü ortaya tamam fərqli bir məqamı çıxarmış olur. Söhbət NN şefi Ziya Məmmədovun kürd qruplaşması ilə şərikli biznesinin olmasından gedir.
Xatırladaq ki, sözügedən kürd əsilli Tələbani Tahirov bir müddət əvvəl yenidən ictimai diqqətə gəldi. Məlum oldu ki, bu ilin fevral ayının 17-də Keşlə Yük Stansiyasının ərazisində silah aşkarlanıb.
Daxili İşlər Nazirliyinin mətbuat xidmətindən verilən məlumata görə, nəqliyyatda Baş Polis İdarəsi əməkdaşları tərəfindən Keşlə Yük Stansiyasının ərazisində 1 ədəd "AKM" avtomat silahı, 152 ədəd avtomat patronu və 8 ədəd patron darağı tapılıb.
Bununla bağlı DİA.AZ-ı məlumatlandıran mənbə bildirir ki, sözügedən silahın Tələbani Tahirova aid olsa da, sonradan bu məsələ işə birbaşa olaraq nəqliyyat naziri Ziya Məmmədovun müdaxilə etməsi səbəbindən qapadılıb.
Bu arada Tələbani Tahirovla bağlı bir başqa qaynağımız da ilginc faktları açıqlayıb:
В«Məlumdur ki, Türkiyədən gün ərzində Azərbaycana yüzlərlə TIRlar daxil olur ki, onların da əksəriyyəti kürd əsillidir və hətta PKK terror təşkilatını dəstəkləyənlər də yetərincədir. Həmin kürd sürücülərin yığışan yerlərindən biri isə Tələbani Tahirovun yanıdırВ».
Hər halda, Keşlədəki stansiyadan təkcə bir avtomatın tapılması da artıq şübhə doğurur. Çünki mətbuatda yer alan xəbərlərdə o da qeyd olunur ki, Azərbaycandan Türkiyəyə - PKK yaraqlılarına gizli yollarla silah ötürülür. Bu işdə isə Tələbani Tahirovun iştirak payının miqyası ən azından araşdırmalar üçün səbəb ola bilər…
