DİA.AZ: - Şəki rayonun Baş Göynük kənd sakini Vəliyev Fazil Hüseynbala oğlu tərəfindən prezident İlham Əliyevə şikayət məktubu ünvanlanıb. Bir nüsxəsi də DİA.AZ-a daxil olan müraciətdə deyilir:
"Xatırladım ki, mən 5 nəfərlik ailəmə görə ünvanlı sosial yardım üçün 2016-cı ildən müraciət etmişdim Və uyğun olaraq 3 ay 198 manat yardım almışdım. 2017-ci ildən bu yardım formal səbəb ucbatından kəsilmişdir. Adını da qoymuşdular ki, guya elektrikə görə abonent kodunda problem varmış. Ona görə də bu saxtakarlığı nazirliyin Şəki rayon Şöbəsinə sübut etmək və yenidən yardımın verilməsini bərpa etmək üçün idarəyə aylarla ayaq döyməkdən yorulub, 2017-ci ilin 25 avqustda cənab Prezidentdən sosial yardımın verilməsi üçün məndən əvvəlcədən umulan 400 manat pulun mənim əvəzimə dövlət tərəfindən birdəfəlik yardım edilməsini xahiş etdim ki, yardımı ala bilim. 3-4 gündən sonra mənə əvvəlcə təzyiqlər başladı ki, sən idarəyə gəlib izahat yazmalısan ki, dövlət başçısına səhv edib şikayət yazmışam, qanmamışam, ağlım kəsməyib və s.
Şəki Dövlət Məşğulluq İdarəsinin rəsmiləri and-aman etdilər ki, Fazil vicdanımız haqqı, nəyə inanırsan ona and içirik ki, sabah idarəyə gəl, izahat yaz biz sənə yardımı iki-üç günə düzüb qoşuruq. Vəssəlam. Kişi kimi bu adamların yanında söz verirəm.
Mən onlara dedim ki, yaxşı ki, özünüz gəlmisiniz, bax bu 5 nəfərlik ailəmlə yaşadığım daxmamı öz gözlərinlə görün və inanın ki, vəziyyətimiz ağırdır. Onlar gözlərini yerə dikib durdular. Yenə and aman edib söz verdilər ki, sənin işin 100 faiz düzələcək. Mən də razı oldum ki, səhər gəlib izahatı yazaram ki, səhv edib şikayət yazmışam. Beləliklə mən də öz vədimə əməl edib onların diktəsilə təzyiq altında izahat yazdım.
Budur,cənab Prezident! mənim Sizlərə etdiyim 8 avqust və 25 avqust 2017-ci il tarixli şikayətlərimdən sonra məni 4 dəfə Nazirliyin Şəki şöbəsinə dəvət etmişdilər. Budur aradan il yarım vaxt keçməsinə baxmayaraq heç bir halda Şəki DMX tərəfindən mənə ünvanlı sosial yardım yazmadılar. Amma nazirliyin rəsmi saytında mənim yaşadığım kənd üzrə ünvanlı social yardım alanların siyahısına baxanda başa düşdüm ki, bu dövlət yardımı real kasıblar üçün deyilmiş. Bu siyahıda keçmiş kolxoz sədrinin ailəsinin , qardaşlarının, çoxsaylı kənd təsəsrrüfatı texnikası olan məşhur fermerlərin və digər imkanlı şəxslərin adlarına rast gəlirəm. Deməli, bu imkanlı şəxslər kəndxudanı ( Şəki DMX müdiri olmuş Elçin müəllimi Bədən tərbiyəsi müəllimi) görüb, kəndi ( ünvanlı dövlət social yardımı) çapıb talayıblar. Mən və mənim kimi 3-cü qrup əlillər də qalmışıq 5-10 manat təqaüdün ümidinə ki, ailəmizi ölməmək üçün dolandıra bilək.
Sonuncu şikayətimi 27 mart 2019-cu ildə etdikdən dərhal 1 gün sonra Şəki DMX rəsmiləri yenə kənddəki daxmama gəlib əvvəlcə yoldaşımla mənim şəkillərimizi çəkdilər, sonra lazımi sənədləri tərtib edib getdilər ki, Fazil sənin işin bir iki günə düzələcək. Aradan 10gün keçdi və mən rayon mərkəzinə getdim. Kapital bankdan olan bank kartını yoxladım. Cəmi 20 qəpik vardı. Yenə rəisin qəbuluna düşüb soruşdum. Bəs söz verdiniz ki, Fazil sənin işini dərahal düzəldəcəyikl.Nə oldu? Rəhbər qeyd etdi ki, biz əlimizdən gələni etdik. Sənədləriniz də qaydasındadır. Daha bizlik bir şey qalmayıb. Qalıb təxcə Bakıdan Nazirlik dövlət ünvanlı sosial yardım üçün sənə düşən pulukartına yükləməyi. Vəssəlam. Budur aradn 2 ay yarım vaxt keçib. Amma Əmək və əhalinin Sosial müdafiəsi nazirliyi hələ də mənə hesablanan yardımı hesabıma ödəmir.
Elə ona görə də birbaşa Nazirliyin Dövlət Məşğulluq mərkəzinin müdiri cənab Fuad Musayevə müraciət edirəm.
Cənab Musayev biz yaşıd olsaq da, Sizdən fərqli olaraq mən imkansız çoxuşaqlı bir ailədə min bir əziyyətlə böyümüşəm.
Atam Hüseybala kişi adi bir xəstəxana sürücüsü olsa da heç vaxt ailəsinə haram tikə yedirməmişdir. Bax bircə ona görə də bu gün ağır vəziyyətdə yaşasam da fəxr edirəm ki. haramzada olmamışam, kişi kimi yetişmişəm. Bəli. Bu gün əlil olsam da dolanmaq üçün qəbir də qazıram, nökərçilik də edirəm. Amma kimsənin qabağında gözükölgəli işim yoxdur. Ona görə də Sizdən tələb edirəm ki, mənə ayrılmış “haqqı çatmayan ünvanlı sosial yardımımın “ dərhal hesabıma ödənilməsi barədə göstəriş verəsiniz.
Cənab Prezident, sağ olun ki, bizim kimi kasıbları adam yerinə qoymayan Sosial Təminat Nazirliyində baş alıb gedən qanunsuzların qarşısının alınması üçün lazımi tədbirlər gördünüz. Ümid etdik ki,F.ələkbərovdan, Səlim Müslümovdan sonra bizim kimi ümidsiz insanlara nisbətən xoş münasibət bəslənər. Hələlik aradan keçən son 1 il 6 ayda bunun şahidi olmuruq.
Odur ki, ümidim yalnız Cənab Prezidentin köməkliyinə qalıb. Dövlətimizin başçısısından xahiş edirəm ki, mənim 5 nəfərlik ailəmə ünvanlı sosial yardımın yenidən bərpa edilməsindən sonra ailəmin fiziki mövcud olması üçün nzərdə tutulan beş-on manat pulun hesabımıza köçürülməsinə köməklik göstərməyinizi və öz qulluq mövqeyindən süi-istifadə edərək dövlətin pulunu gizli sövdələşmələr nəticəsində mənimsəyənharınlamış məmurların son illərdəki qanunsuz fəaliyyətlərinin yoxlanılması barədə göstəriş verəsiniz. Allah amanında.
İMZA: 3-cü qrup əlil, 5 nəfərlik ailənin başçısı Vəliyev Fazil Hüseynbala oğlu
mob.tel. 051-844 98 12.
tarix: 13 may 2019-ci il".
diaaz.space olaraq iddia olunanlarla bağlı bütün tərəfləridinləməyə hazırıq...
