“Gündəm Xəbər” qəzeti olaraq daim ictimai həyatımızda baş verən sosial-iqtisadi problemlərin varlığına, vəzifə sahibi olan bəzi şəxslərin özbaşınalıq hərəkətlərinə, əksər hallarda isə onların daşıdıqları vəzifədən sui-istifadə etmələrinə, hətta sıravi sakinlərin pozulmuş hüquqlarının bərpasına və digər əhəmiyyət kəsb edən məsələlərin varlığına toxunmaqla, bu gün də kifayət qədər nüfuza malik mətbu orqanlardan biri hesab olunuruq. Belə bir səbəblər üzündəndir ki, geniş oxucu auditoriyasının tam əksəriyyəti, pozulmuş hüquqlarının bərpasını, məhz bu qəzetin redaksiyasında axtarır`və çox zaman ünvanımıza da üz tuturlar.
Hələ qəzetimizin ötən saylarında, respublikamızın ucqar rayonlarından biri olan Gədəbəydə yaşanan çoxsaylı sosial problemlərin tüğyan etməsinə və bu rayonda ayrı-ayrı vəzifə sahiblərinin, o cümlədən rayonun maliyyə idarəsinə rəhbərlik edən Namiq Məmmədovun qol qoyduğu əksər qanunsuzluq hərəkətlərinin varlığına da toxunmuşduq. Yazıb bildirmişdik ki, maliyyə imkanlarının göstəricilərinə görə digər vəzifə sahiblərindən fərqlənən maliyyə “şef”i, bu gün Gədəbəydə əsas söz sahiblərindən biridir. Belə bir səbəblər üzündəndir ki, o, rayonda kimin hansı vəzifəni daşımasında, kimin vəzifəsi ilə vidalaşmasında və.s kifayət qədər təsir imkanına malik olduğundan, demək olar ki, tam əksəriyyət onunla hesablaşmağa məcbur olur.
Bir faktı qeyd edək ki, Namiq Məmmədov Gədəbəy rayon Maliyyə İdarəsinə uzun illərdir ki, rəhbərlik edir. Belə bir amilin varlığı da, məhz onun milyonçu şəxslərdən biri olmasına imkanlar açıb. Adicə bir məqama diqqət yetirək ki, hələ bir neçə il bundan əvvəl Gədəbəydə müxalifətçilərin əsas dayaq sütünlarından hesab olunan mərhum Əli Abdullayevə məxsus obyekt, icra hakimiyyəti başçısının verdiyi tapşırıq əsasında uçurulur. Atılan belə bir addımdan sonra, Əli Abdullayevin apardığı haqlı mübarizənin nəticəsi o olur ki, icra başçısının tapşırığı ilə rayonun Heydər Əliyev prospektində, ona yeni bir obyekt də tikilir.
Rayondakı məlumatlı mənbə onu da bildirir ki, hələ Əli Abdullayev sağ ikən, sən demə ona tikilmiş obyektə Namiq Məmmədov kənardan-kənara göz dikir. Elə ki, o, dünyasını dəyişir, həmin andan da bir çox proseslər cərəyan etməyə başlayır. Yəni, çox keçmir ki, inşaası başa çatdırılmış obyekt icra hakimiyyəti tərəfindən satışa çıxarılır və ilk olaraq qeyd olunan obyekt, Məzahir adlı şəxsə 100 min manata təklif olunur. Bir qədər söz-söhbətdən sonra o, belə bir xəbər əldə edir ki, ona təklif olunan obyekt mərhum Əli Abdullayevə verilmək üçün tikilən obyektdir. Dərhal Məzahir adlı şəxs, qeyd olunan obyekti almaq fikrindən “vaz keçir”. Bu şəxsin belə bir yanaşmasının varlığına baxmayaraq, yaranmış fürsətdən yararlanmağa qərar verən Namiq Məmmədov, əldə etdiyimiz məlumatlara görə qeyd olunan obyekti çox keçmir ki, 65 min manata ələ keçirə bilir və onu özünə yaxın bir xanımın adına da sənədləşdirir. Bu gün birbaşa olmasa da, dolayısı yolla həmin obyektə sahiblik edən maliyyə “şef”inin, hal-hazırda ələ keçirdiyi obyekti 500 manata icarəyə verdiyi də bildirilir. Baxmayaraq ki, icarəyə verilən obyektin girişində “Uşaq Yaradıcılıq Mərkəzi” lövhəsi asılıb.
Onu da qeyd edək ki, rayonun Heydər Əliyev adına istirahət parkındakı çay evi Namiq Məmmədova məxsus olsa da, o, həmin çay evini də hələlik adını çəkmədiyimiz başqa bir bəyin adına sənədləşdirib. Bütün bunlar da onu göstərir ki, rayonun maliyyə idarəsinə rəhbərlik edən
bu şəxs, ələ keçirdiyi obyektləri özünə yaxın şəxslərin adına sənədləşdirir və bu gün kifayət qədər kapitala malik olan şəxslərdən biri də hesab olunur.
Namiq Məmmədovla bağlı başqa bir məlumatı da əldə etməyimiz, bu gün də bizi olduqca təəccübləndirməkdədir. Məsələn, mərhum Əli Abdullayev 08 sentyabr 2013-cü il tarixdə facebook səhifəsindəki statusunda yazır ki, “Bakı şəhərinin Səfər Əliyev küçəsində, bir qədər də dəqiq desək Çin Xalq Respublikası səfirliyinin yaxınlığında, “Qağayi”MMC-nin inşa etdiyi 18 mərtəbəli üç binadan birinin bir bloku, yəni 72 mənzil Namiq Məmmədov tərəfindən nağd pulla alınır. Bu da on milyonlarla manat pul deməkdir. Elə ki, bu məsələ barədə xəbərdar olduğumu maliyyə “şef”i bildi, çox keçmədi ki, yüksək çinli vəzifə sahibinin xahişi ilə mən, Namiq Məmmədovla görüşməli oldum. Söhbət əsnasında o, məni xəbərdar etdi ki, “sən bu söhbəti heç kimə demə, bütün mətbuatı ələ almışam, odur ki, əbəs yerə də zəhmət çəkmə” deməsindən sonra, ona cavab olaraq bildirdim ki, mən nəinki səni, hətta bu ölkəni talayan hər kəsi həyatımın bahasına olsa belə, ifşa etməyə çalışacağam. Əgər mənim, yaxud da ailəmin başına bir iş gələrsə, o halda məsuliyyət Məmmədov Namiq İsfəndiyar oğlunun və əmisi oğlu olan Ramiz Məmmədovun üzərində qalacaq”.
Bəli, bütün bunlar mərhum Əli Abdullayevin 08 sentyabr 2013-cü il tarixdə facebook səhifəsindəki statusunda yazdığı fikirləridir ki, biz də belə bir açıqlamanı, həmin statusa əsaslanaraq yaymağa qərar verdik.
Ümumiyyətlə, Namiq Məmmədovun rəhbərlik etdiyi qurumda uzun illərdir ki, rəhbər vəzifəni daşıması da, daha çox diqqəti cəlb etməkdədir. Məsələn, o, ələ keçirdiyi kapitalının müqabilində nəinki Gədəbəy rayonu ərazisində, hətta başqa-başqa ünvanlarda da xeyli sayda obyektlərə sahiblik edir. Məsələn, paytaxt Bakımızın “Ukraina Dairəsi” adlanan əraziyə yaxın yerdəki obyekti də, qeyd olunan obyektlərindən biridir.
Namiq Məmmədovla bağlı başqa bir məqama da toxunaq ki, onun adı hansısa mətbu orqanda hallanarsa, dərhal o, lazım olan imkanlarını səfərbər edir və tez bir zamanda onun qarşısını almağa da çalışır. Düzdür, belə olan halda maliyyə “şef”inə bəzi KİV nümayəndələrinin yetərincə dəstək verməsi də, danılmaz həqiqətlərdən birinə çevrilir. Amma, rayonun bugünkü rəhbərliyi ilə bağlı dərc olunan tənqidi açıqlamaların qarşısını almağa heç cür cəhd göstərməyən, bəzi hallarda isə, işıq üzü görən açıqlamalara dolayısı yollarla dəstək verən bu şəxsin yanaşması, hələ ki, bizi də çaşbaş qoymaqdadır. Çünki, eşidib bildiyimiz və əksəriyyətin də qəbul etdiyi bir həqiqət var ki, rayonun maliyyə idarəsinə rəhbərlik edən şəxs, həmişə icra başçısı vəzifəsini daşıyan şəxsin “sağ əl”i hesab olunub. Vər hər iki vəzifə sahibinin, eyni komandanın üzvü olduğu da bildirilib. Bu belə olduğu halda, görəsən Namiq Məmmədovun ikili oyun oynamasına nə ad vermək olar? Odur ki, sualı bizdən, cavabı isə......
Araşdırmalarımız davam edəcək.
