Rusiyada Azərbaycanın mədəni tədbirlərinin ləğv edilməsi Moskva ilə son gərginlik fonunda diqqət çəkib. Belə ki, Dövlət Akademik Rus Dram Teatrının Novosibirsk şəhərində planlaşdırılan tamaşaları təxirə salınıb. Qərar Yekaterinburqda azərbaycanlıların qətlə yetirilməsindən sonra rəsmi Bakının mədəni tədbirləri dayandırmasına cavab kimi şərh edilir. Kremlin bu cür addım atması bir növ təzyiq vasitəsi kimi qəbul olunur. Bildirilir ki, hazırkı hadisələr iki ölkə arasında qarşılıqlı proseslərin daha da mürəkkəbləşməsinə gətirib çıxara bilər.
Rusiya mədəni tədbirləri ləğv etməsi ilə hansı mesajları verir? Gərginliyin bu forması nə vaxta kimi davam edəcək?
Globalinfo.az-a danışan deputat Hikmət Babaoğlu bildirib ki, Rusiyada Azərbaycanın mədəni tədbirlərinin təxirə salınması ironik haldır və təəccüb doğurur:
“Moskvanın yanaşması anlaşılan deyil. Çünki Rusiya vətəndaşı olan və orada yaşayan miqrant azərbaycanlılar təhqir edilir, onların milli hissləri alçaldılır, təqiblərə, həmçinin müxtəlif bəhanələrlə zorakılığa məruz qalırlar. Bunların fonunda Azərbaycanın mədəni tədbirləri təxirə salınır. Əslində bu, Rusiyanın özünə qarşı atdığı bir addımdır. Çünki heç bir sivil dövlət öz vətəndaşlarını milli mənsubiyyətinə görə cəzalandırmamalıdır. Digər tərəfdən, Moskva sevinməlidir ki, Azərbaycanda Rus Dram Teatrı fəaliyyət göstərir və Federasiyanın müxtəlif şəhərlərinə qastrol səfərləri edir. Bu teatr rus dilinin və mədəniyyətinin təbliğatını aparan bir qurumdur. Kremlin belə bir teatrın tamaşalarını təxirə salması öz mədəniyyətini və dilini təbliğ edən bir təşəbbüsə qarşı çıxması deməkdir. Bu, böyük bir hikkə və imperialist ambisiyanın təzahürüdür”.
Deputat qeyd edib ki, Rusiya artıq soyuqqanlı mühakimə qabiliyyətini itirib:
“Necə ola bilər ki, bir ölkə öz mədəniyyətini təmsil edən bir teatrın tamaşalarını qadağan etsin? Bu, mədəni konteksdə “özünü intihar”dan başqa bir şey deyil. Hətta bu vəziyyət ironik olaraq gülməli sayılmalıdır. Fikrimcə, nəhayət, rus xalqı baş verənlərin fərqinə varacaq, rəsmi Bakıya və azərbaycanlılara qarşı bu cür qərar qəbul edənləri ictimai şəkildə qınayacaq, bəlkə də cəzalandıracaqlar”.
