Sahil Babayevin maliyyə naziri təyinatından sonra ayrı-ayrı qurumların uzun illərdən bəri büdcədən aldıqları vəsaitlər kəskin azaldılır.
Bir sıra dövlət qurumlarında və onların tabeçiliyində olan strukturlarda neft pullarının “fontan vurduğu” dövrlərdə şişirdilmiş ştatlar ləğv olunur.
Bu, Sahil Babayevin ölkə başçısı qarşısında üzərinə götürdüyü əsas vəzifələrdən biridir.
Gununsesi.info-nun özəl mənbələrdən əldə etdiyi məlumata görə, hətta bağlanmaq riski ilə üz-üzə qalan qurumlar da var.
Bunlardan biri də İqtisadi İslahatların Təhlili və Kommunikasiya Mərkəzidir.
Qeyd olunur ki, Vüsal Qasımlının rəhbərlik etdiyi onlarla əməkdaşı olan Mərkəz gələn il fəaliyyətini dayandıra bilər.
Maliyyə Nazirliyinin hansı səbəbdən bu qurumu maliyyələşdirməkdən imtina edəcəyi deyilir.
Mənbə bildirir ki, Mərkəzin fəaliyyətinin hökuməti qane etmədiyi barədə iddialar var, amma bunu təsdiq edən faktlar ictimaiyyətə təqdim olunmayıb.
Qeyd edək ki, İqtisadi İslahatların Təhlili və Kommunikasiya Mərkəzi aparılan iqtisadi islahatların əhatə dairəsinin genişləndirilməsini və bu sahədə işlərin səmərəli əlaqələndirilməsini təmin etmək məqəsdi ilə yaradılmışdı.
Qurumun profili ölkənin dayanıqlı iqtisadi inkişafının təmin edilməsi istiqamətində makro və mikroiqtisadi səviyyədə təhlil və tədqiqatlar aparmaqdır. Qurum analitik məlumatlar əsasında iqtisadi islahatların həyata keçirilməsi üçün təkliflər, habelə orta və uzun müddətli dövr üçün proqnozlar hazırlayır, dövlət orqanlarını və qurumlarını həmin proqnozlarla təmin edir, həmçinin iqtisadiyyatın müxtəlif sahələrində ölkənin nailiyyətlərinin təbliğini təşkil edir.
Mərkəzin Müşahidə Şurasının sədri Baş nazir Əli Əsədov, üzvləri isə Prezidentin, Birinci Vitse prezidentin köməkçiləri, maliyyə və iqtisadiyyat sektoru üzrə nazirlər, habelə Mərkəzi Bankın sədri və Dövlət Neft Fondunun icraçı direktorudur.
Mərkəz Prezidentin 2016-cı il, 20 aprel tarixli fərmanı ilə yaradılıb və hər il dövlət büdcəsindən milyonlarla manat vəsait alıb. Mənbə bildirir ki, qurumun bütün layihələrinin maddi baxımdan yüksək səviyyədə dəstəklənməsinə baxmayaraq ötən 9 ildə fəaliyyəti qənaətbəxş sayılmayıb. Bu nəticəni elə ölkə iqtisadiyyatında davam edən durğunluq və tənəzzüldən də çıxarmaq mümkündür. 2025-ci ildə Azərbaycanda ÜDB artımı 1.3 faiz ətrafında olacaq ki, bu da Cənubi Qafqaz ölkələri arasında ən aşağı göstəricidir. Habelə gələn il dövlət büdcəsi də cari ilin büdcəsi ilə müqayisədə demək olar ki, artmayıb. Müstəqil ekspertlər bunu hökumətin iqtisadi sektorunun yarıtmaz fəaliyyətinin nəticəsi sayırlar.
