Neftçala rayon İcra Hakimiyyəti daha bir tenderini yekunlaşdırıb.
Tribuna.az xəbər verir ki, İcra Hakimiyyəti Neftçala rayonunda görüləcək abadlıq işləri aparacaq.
Məlumatda qeyd edilir ki, tenderin qalibi “AVTOYOLTIKINTISERVIS” MMC olub. Şirkət görüləcək işlərin müqabilində İcra Hakimiyyətindən 1 milyon 135 min 109 manat pul alacaq.
Tribuna.az -ın apardığı araşdırma zamanı məlum olub ki, sözügedən İcra Hakimiyyəti 2024-2025-ci illərdə cəmi 4 tender keçirib. Bu tenderlərdən üçünün qalibi eyni olub: “AVTOYOLTIKINTISERVIS”.
Belə ki, sözügedən şirkət bu ilin fevralında Neftçalada abadlıq və mənzil fondunun əsaslı təmir işlərini həyata keçirib. Bu zaman tərəflər arasında 1 milyon 254 min 237 manatlıq müqavilə imzalanıb.
Bundan başqa, ötən ilin dekabrında isə Neftçala rayonunda daxili yolların və büdcədənkənar vəsait hesabına daxili yolların əsaslı təmiri işlərinin satınalınmasını da eyni şirkət reallaşdırıb. Həmin işlərin görülməsi üçün isə Neftçala İcra Hakimiyyəti “AVTOYOLTIKINTISERVIS”ə 963 min 234 manat ödəniş edib.
Bildirək ki, “AVTOYOLTIKINTISERVIS” (VÖEN: 1904350701) Məhdud Məsuliyyətli Cəmiyyəti 16.03.2020-ci ildə yaradılıb. Reyestr məlumatlarında nizamnamə kapitalı 100 manat olan MMC-nin hüquqi ünvanının BAKI ŞƏHƏRİ NƏRİMANOV RAYONU, ƏLİYAR ƏLİYEV, ev 195, m. 6, qanuni təmsilçisi kimi isə Məmmədov Ramin Adil oğlu qeyd olunub.
Dövlət Vergi Xidmətinin reystr məlumatlarına edilən dəyişiklikdə isə göstərilir ki, MMC -nin təsisçisi və ilk qanuni təmsilçisi İsgəndərov Etibar Eyvaz oğlu olub. MMC ilk dəfə BAKI ŞƏHƏRİ SURAXANI RAYONU, Q YAŞAYIŞ SAHƏSİ ( YENİ GÜNƏŞLİ QƏS.), ev 13, mənzil 39 ünvanında dövlət qeydiyyatına alınıb.
Xatırladaq ki, Neftçalanın icra başçısı Mirhəsən Seyidovdur. O, 2020-ci ildən rayonu idarə edir.
