Dekanın öz fotoşəkili Prezident İlham Əliyev və Birinci Vitse-prezident Mehriban Əliyeva ilə yanaşı montaj edilib, görüntünün üzərinə isə “Əsrin dahiləri” ifadəsi yazılıb
Bu iddia Gəncə Dövlət Universitetinin İqtisadiyyat və idarəetmə fakültəsinin bir qrup əməkdaşları adından Yenixeber.org-un elektron poçtuna daxil olmuş yazıda yer alır:
Gəncə Dövlət Universitetində son günlər ciddi narazılıq doğuran hadisə gündəmi zəbt edib. Universitetin İqtisadiyyat və idarəetmə fakültəsinin dekanı Məsim Abadovun sosial şəbəkələrdə yaydığı montaj edilmiş fotoşəkil universitetdə kəskin reaksiyalara səbəb olub. Hətta bu şəkil Məsim Abadov tərəfindən vatshap profil şəkilinə qoyulub.
Paylaşımda dekanın öz fotoşəkili Prezident İlham Əliyev və Birinci Vitse-prezident Mehriban Əliyeva ilə yanaşı montaj edilib, görüntünün üzərinə isə “Əsrin dahiləri” ifadəsi yazılmışdır. Bu montaj sosial şəbəkələrdə sürətlə yayılaraq geniş müzakirələrə səbəb olub.

Məsələ ilə bağlı ən sərt reaksiyalardan biri Pedaqogika kafedrasının müdiri, professor Şahin Tağıyevdən gəlib. O, iclas zamanı ayağa qalxaraq belə montajların dövlət rəhbərlərinin yüksək adının “heç bir şəxsi təqdimat üçün istifadə edilməməli olduğunu” bildirib. Şahin Tağıyev bu davranışı “özünü Prezidentlə bir sıraya qoymaq cəhdi kimi anlaşılmaq təhlükəsi olan yolverilməz addım” adlandırıb.
Universitetin bir çox əməkdaşları sosial şəbəkələrdə və öz aralarında bu məsələyə etiraz edərək bildiriblər ki, belə davranış ali məktəb dekanına yaraşmaz.

Hadisənin ictimaiyyət arasında yaratdığı narazılığı daha da artıran fakt isə budur ki, Məsim Abadov həmin montajı müəllifi olduğu kitabın üz qabığına vurub və bu kitab nəşr olunub. Bu isə həm elmi ictimaiyyət, həm də geniş kütlə tərəfindən təəccüb və sərt tənqid doğurub. Çoxları sual edir: “Dekan Məsim Abadovun ağlı bu qədərdir, bəs bu nəşriyyat belə bir kitabı və üz qabığını hansı ağılla çap edib?”
İctimaiyyətin narazılığını artıran digər amillərdən biri odur ki, universitet əməkdaşlarının tənqidlərinə və iradlara baxmayaraq Məsim Abadov montajı sosial şəbəkələrdə paylaşmağa davam edir. Bu artıq məsələnin sadəcə bir “yanlış paylaşım” deyil, daha ciddi məsuliyyət problemləri doğuran davranış kimi qiymətləndirilməsinə səbəb olub.
Universitet əməkdaşları hadisəni “ciddiyyətsizlik”, “özünü önə çıxarma cəhdi” və “dövlət rəhbərlərinin nüfuzuna hörmətsizlik” kimi şərh edirlər. Onlar bildirirlər ki, dövlət başçılarının fotoşəkillərinin şəxsi məqsədlərə uyğun olmayan şəkildə istifadəsi həm etik, həm də hüquqi məsuliyyət yaradır. Ali təhsil müəssisələrində rəhbər vəzifə tutan şəxsin ictimai davranışları ciddi qaydalarla tənzimlənir və belə hallarda universitet rəhbərliyi tərəfindən xidmət araşdırması aparılması zəruridir.
Artıq məsələ ilə bağlı aidiyyəti qurumlara rəsmi şikayətlər edilib. Şikayətçilər universitetdə etik mühitin qorunması və vəzifə məsuliyyətinin təmin olunması üçün araşdırma aparılmasını tələb edirlər.

Gəncə Dövlət Universitetinin rəhbərliyi də dekanı kəskin şəkildə tənqid edib, amma hələ heç bir tədbir görməyib. Universitet rəhbərliyinin yaxın günlərdə məsələyə rəsmi münasibət bildirməsi gözlənilir.
Universitetin kollektivi hesab edir ki, dövlət rəhbərlərinin adına, nüfuzuna və xalqın sevgisinə xələl gətirə biləcək hər bir davranış ciddi şəkildə qiymətləndirilməlidir. Həqiqətən də cənab Prezident, eləcə də Birinci Vitse Prezident dahidir, özü də əsrimizin dahisidir. 30 il düşmən tapdağı altında olan torpaqlarımızı azad ediblər. Bu gün ən qüdrətli dövlətlər cənab Prezidentlə hesablaşır. Bunları Əsrin dahisi adlandırmaq olar. Amma biologiya elmləri namizədi, ixtisası Qida sənayesi texnologiyası olan, universitetdə Akreditasiya zamanı dekan vəzifəsini tutmasının Komissiya tərəfindən qeyri-qanuni olduğu bildirilən Məsim Abadov kimi birisinin öz şəkilini dövlət rəhbərinin şəkilinin yanına yapışdırıb, altından da özünü də bu cərgəyə əlavə edərək Əsrin dahiləri yazması başa düşülən deyil. Montajın kitabın üz qabığında istifadəsi isə narazılığı daha da artırır və universitet kollektivinin qəzəbinə səbəb olur.
Təsdiq üçün şəkillər də əlavə olunur.