" "Çiniçi" mağazasından köynək almışam. Vaxt azlığı səbəbindən məhsulu mağazada geyinib yoxlamaq imkanım olmayıb. Evə gəldikdən sonra köynəyi yalnız ölçüsünü yoxlamaq məqsədilə geyinmiş və onun mənə dar olduğunu müəyyən etmişəm..." "DİA-AZ" xəbər verir ki, bu barədə "Müştəriyəm Şikayətim Var "sosial qrupundakı paylaşımında Bahar Mustafayeva adlı istifadəçi gileylənir.

Narazı vətəndaş daha sonra başına gələnləri belə nəql edir: "Növbəti gün mağazaya yaxınlaşaraq məhsulu geri qaytarmaq istədikdə, satış zamanı gülərüz və nəzakətli davranan mağaza əməkdaşları bu dəfə kobud və qeyri-etik üslubda danışaraq, “geyilmisiniz” bəhanəsi ilə məhsulun geri qaytarılmasından imtina etdilər. Halbuki məhsulda heç bir istifadə izi yoxdur, etiketi üzərindədir və qüsursuz vəziyyətdədir.

Bundan əlavə, mağaza əməkdaşlarından biri “hara istəyirsiniz müraciət edin, biz qaytarmırıq” ifadəsi ilə məni açıq şəkildə hədələyici və hörmətsiz davranışla qarşılamışdır.

Bildirmək istəyirəm ki, bu hal Azərbaycan Respublikasının “İstehlakçıların hüquqlarının müdafiəsi haqqında” Qanununun tələblərinə ziddir. Qanuna əsasən, istehlakçı qüsursuz malı 14 gün ərzində geri qaytarmaq və ya dəyişdirmək hüququna malikdir.

Bu cür davranışı qəbuledilməz hesab edir və hüquqlarımın pozulması ilə bağlı aidiyyəti tədbirlərin görülməsini, mağaza barəsində qanunvericiliyə uyğun araşdırma aparılmasını və məhsulun geri qaytarılması ilə bağlı hüququmun təmin olunmasını xahiş edirəm..."