Dövlət Məşğulluq Agentliyi tərəfindən 2026-cı ildə 450 minə yaxın şəxsin aktiv məşğulluq tədbirlərinə cəlb olunması proqnozlaşdırılır. "DİA-AZ" xəbər verir ki, bunu əmək və əhalinin sosial müdafiəsi naziri Anar Əliyev AzTV-yə müsahibəsində deyib. O bildirib ki, bu il 15 minə yaxın şəxsin özünüməşğulluq proqramına cəlb olunması, habelə peşə hazırlığı və peşəyönümü xidmətlərinin davam etdirilməsi planlaşdırılır. “2026-cı ildə əhalinin aktiv məşğulluq tədbirlərinə cəlb olunması Nazirlik üçün prioritet hesab olunacaq”, - deyə nazir qeyd edib.
Amma görünəni və bəlli olanı odur ki, əgər Anar Əliyev cənabları ƏƏSMN sistemində ciddi kadr islahatları həyata keçirməzsə, o zaman nə verdiyi vədə əməl edə biləcək, nə də mövcud narazılıqlar aradan qalxacaq.
Elə sözügedən sistemdən və nazirin özünə ünvanlanmış növbəti vətəndaş gileyini diqqətinizə təqdim edirik:
"Mən, Əliyev Elsevər, Goranboy rayonu sakiniyəm. Bu müraciəti Sizə böyük ümid və inamla ünvanlayıram.
Bildirmək istəyirəm ki, 2019-cu ildən etibarən Goranboy Rayon Məşğulluq İdarəsində işsiz kimi qeydiyyatdayam. Bu müddət ərzində dəfələrlə həmin quruma müraciət etməyimə baxmayaraq, məşğulluğumun təmin olunması ilə bağlı heç bir real və nəticəyönümlü tədbir görülməmişdir.
Eyni zamanda, Goranboy Rayon Məşğulluq İdarəsinin müdiri Anar Əliyev və həmin idarənin mütəxəssisi İqbal Teymuroğlu tərəfindən mənə qarşı qeyri-etik, vətəndaşı alçaldan və hörmətsiz münasibət göstərilmişdir. Onlar açıq şəkildə “hara istəyirsənsə şikayət et, lap Prezidentə də” ifadəsini işlətmiş, bu davranışları ilə dövlət qulluqçusuna yaraşmayan mövqe nümayiş etdirmişlər.
Möhtərəm cənab Prezidentimiz öz çıxışlarınızda dəfələrlə vurğulayıb ki, dövlət məmurları vətəndaşlara hörmətlə yanaşmalı, onları incitməməli və problemlərinin həllinə köməklik göstərməlidirlər. Təəssüf ki, Anar Əliyev və İqbal Teymuroğlunun davranışları bu prinsiplərə tamamilə zidd olmuş, vətəndaşın dövlət qurumlarına olan inamını ciddi şəkildə sarsıtmışdır.
Qeyd olunan hallar Azərbaycan Respublikasının Konstitusiyasında təsbit olunmuş vətəndaş hüquq və azadlıqlarının, eləcə də “Vətəndaşların müraciətləri haqqında” Azərbaycan Respublikasının Qanununun tələblərinin pozulmasıdır. Dövlət qulluqçularının vətəndaşlarla bu cür davranışı yolverilməzdir..."
