Ötən ilin son aylarında Elm və Təhsil naziri Emin Əmrullayevin əmri ilə gözlənilmədən iki yüksək vəzifəli məmur vəzifəsindən azad edildi. Söhbət Peşə Təhsili üzrə Dövlət Agentliyinin direktoru Ceyhun Kərəmovdan və Təhsilin İnkişafı Fondunun İdarə Heyətinin sədri Elnur Nəsibovdan gedir.

Diqqətçəkən məqam ondan ibarət idi ki, bu qədər yüksək postları tutan şəxslərin vəzifədən azad olunması ilə bağlı Təhsil Nazirliyi və şəxsən nazir Emin Əmrullayev tərəfindən heç bir rəsmi açıqlama verilmədi. Nə səbəb göstərildi, nə də ictimaiyyətə hər hansı məlumat təqdim olundu.

Bizimesr.az bildirir ki, bir müddət sonra isə hər iki vəzifəyə yeni təyinatlar həyata keçirildi. Nazir Emin Əmrullayev yenə də nazirlik daxilindən olan şəxslərə üstünlük verdi. Peşə Təhsili üzrə Dövlət Agentliyinə nazirlikdə çalışan İlqar Bayramov, Təhsilin İnkişafı Fondunun İdarə Heyətinin sədri vəzifəsinə isə Nicat Məmmədli təyin olundu.

Bu dəyişikliklər cəmiyyətdə və mediada müxtəlif suallar doğurdu. Qeyri-rəsmi mənbələrdə, eləcə də ekspert çevrələrində əsasən əvvəlki rəhbərlərin ciddi maliyyə pozuntularına yol verdiyi iddiaları səsləndirildi. Lakin bu iddialara baxmayaraq, Təhsil Nazirliyi yenə də susqunluğunu qorudu və məsələ ilə bağlı heç bir açıqlama vermədi.

Bir neçə gün əvvəl Hesablama Palatasının yaydığı rəsmi hesabat isə bu susqunluğun fonunda vəziyyəti daha da diqqət mərkəzinə gətirdi. Hesabatda qeyd olunurdu ki, aparılan yoxlamalar zamanı Təhsil Nazirliyinin balansında olan qurumlarda, o cümlədən Peşə Təhsili üzrə Dövlət Agentliyində, kolleclərdə və məktəblərdə milyonlarla manatlıq nizamnamə kapitalının düzgün uçota alınmadığı müəyyən edilib.

Daha da narahatedici məqam odur ki, bu uyğunsuzluqlar uzun müddət ərzində aradan qaldırılmayıb və faktiki olaraq maliyyə nəzarətsizliyi mövcud olub. Belə olduğu halda ortaya ciddi sual çıxır - əgər milyonlarla manatlıq vəsaitlə bağlı bu qədər ciddi nöqsanlar mövcud idisə, həmin vəsaitlərə nəzarət edən və xərcləyən şəxslər kimlər olub? Bu gün artıq adı çəkilən şəxslərin, Ceyhun Kərəmovun, Elnur Nəsibovun və digər bəzi məmurların heç biri vəzifədə deyil. Onlar səssiz şəkildə işdən çıxarılıb, lakin nə istintaq, nə hüquqi qiymətləndirmə təqdim olunub.

Milyonlarla manatlıq vəsaitin aqibəti necə olacaq?
Bu pullar dövlət büdcəsinə qaytarılacaqmı?
Məsuliyyət kimlərin üzərinə düşür?
Nazir olaraq Emin Əmrullayev bu proseslərə görə siyasi və inzibati məsuliyyət daşıyırmı?
Bu qədər pulu kim qaytaracaq?

Son hadisələr göstərir ki, yüksək vəzifəli şəxslər səssiz şəkildə vəzifədən çıxarılır, maliyyə pozuntuları üzə çıxır, amma cəmiyyətə heç bir izahat verilmir. Bu isə dövlət idarəçiliyinə olan etimadı zədələyir və sualların sayını daha da artırır.

Təhsil Nazirliyi və şəxsən nazir Emin Əmrullayev bu məsələlərlə bağlı açıq və əsaslandırılmış mövqe ortaya qoymalıdır, Hesablama Palatasının aşkarladığı faktlara münasibət bildirilməlidir, dövlət vəsaitinin taleyi bilinməlidir.

Bizimesr.az