Babək şəhərində iki azyaşlı uşağı olan ailə aldıqları sosial yardım kəsildikdən sonra çarəsiz vəziyyətə düşüb. Yardımın haqsız yerə dayandırıldığını deyən 66 yaşlı ailə başçısı Rəfail Hüseynov bu işdə rayonun DSMF-ni günahlandırır.

O bildirir ki, cəmi 320 manat pensiya alır və bu məbləğin yarıdan çoxu kredit ödənişinə gedir:

“Təxminən bir il sosial yardım aldıq. Bu yaxınlarda fondun müdiri Heydər müəllim dedi ki, sizə artıq yardım düşmür. Halbuki bizim sosial vəziyyətimizdə heç bir dəyişiklik olmayıb. Evimizə girən yeganə pul mənim pensiyamdır. Onun da 221 manatını kreditə ödəyirəm. Yoldaşım təcili əməliyyat olunmalı idi, buna görə bankdan pul götürmüşdüm. Ayın sonunda cəmi 99 manat qalır.

Siz deyin, 99 manatla 4 nəfərlik ailəni necə dolandırmaq olar? Aldığım yardım hansı əsasla kəsilməlidir?

Uşaqlarım ac qalır, məktəbə gedə bilmirlər. Məndən çörək istəyirlər, uşaq kimi başımı aşağı salıram, kənara çəkilib ağlayıram. Bu qədər ədalətsizlik olmaz axı.”

Hüseynov deyir ki, sosial yardımın kəsilməsi ilə bağlı aidiyyəti qurumlara dəfələrlə şikayət etsə də, müraciətlərinə baxılmayıb:

“Ali Məclisdən məni bir fermaya işləməyə göndərdilər. Müdir məni uzaqdan görən kimi dedi ki, yaşın çoxdur, işə qəbul edə bilmərəm. Məşğulluq idarəsi də bir neçə təklif verdi, amma orada da yaşımı bəhanə edib məni işə götürmədilər. Özüm tapdığım iş yerlərindən də eyni cavabı alıram.”

Çarəsiz ata aidiyyəti qurumlara bir daha müraciət edərək, ona qarşı edilən haqsızlığın aradan qaldırılmasını və sosial yardımın bərpa olunmasını xahiş edir.