"Qiymətlər, tariflər, cərimələr artırılır. Bunu edən dövlət qurumları, şirkətlər müqavimətsiz, çox asanlıqla istədiklərinə nail olurlar". "DİA-AZ" xəbər verir ki, bunu öz sosial şəbəkə hesabında jurnalist Elçin Rüstəmli qeyd edib.
O daha sonra fikrini belə davam etdirir: "Məsələn, Azərbaycanda internet MDB-də ən baha olmasına baxmayaraq ötən il Rabitə Nazirliyi 40 faiz bahalaşmaya getdi.
Azercel 2 ay əvvəl mobil nömrənin aylıq xərcini minimum 2 manata qaldırdı, gələn aydan 30 manata qədər artıracaq.
Vergi Xidməti ƏDV-lərin camaata getməməsi üçün təzə fənd işlətdi ki, alıcı ancaq öz çekinin ƏDV-sini vura bilər.
Ərzağın qiymətini ancaq monopolist şirkətlər müəyyən edir, təkcə builki bahalaşma 20 faizə çatır.
Kommunal xidmətlərə gəlincə, istədikləri vaxt tariflərə əl gəzdirib varlanırlar.
Bütün bunlar hüquqi, iqtisadi, sosial, maddi baxımdan vətəndaşı əzir, onu yoxsullaşdırır.
Bəs yazıq vətəndaşı bu qiymət, tarif hücumundan kim qorumalıdır, o necə müqavimət göstərməlidir?
Belə institutlar var:
Parlament
Məhkəmə
Media.
Azərbaycanda hər üçü vətəndaşın deyil, inhisarçının yanındadır. Ona görə belə anormal, izaholunmaz durum yaranıb..."
