“Sabiq deputat Hüseyn Abdullayevin dayısı oğlu Tural Bayraməliyev qanunsuz həbs həyatı yaşayır”.
Cebhe.info xəbər verir ki, bu iddia ilə Tural Bayraməliyevin hüquqi nümayəndəsi Samir Zeynalov çıxış edib. Vəkilin sözlərinə görə, həbsin əsl səbəbi onun məhz Hüseyn Abdullayevlə qohum olmasıdır.
"Hazırda nümayəndəsi olduğum şəxs, nəğməkar şair və tanınmış bəstəkar Bayraməliyev Tural Aslan oğlu artıq 3 ildir ki, qanunsuz həbs həyatı yaşayır. O, Dövlət Gömrük Komitəsinin sabiq sədri Aydın Əliyevin baldızı, sabiq gömrük xidməti polkovniki Salehli Şədiyyə Arif qızına məxsus 824,156,55 manat əmlakı dələduzluq yolu ələ keçirməkdə təqsirli bilinərək Bakı Ağır Cinayətlər Məhkəməsinin sabiq hakimi Ramella Allahverdiyevanın çıxardığı 05 avqust 2020-ci il tarixli hökm ilə 8 (səkkiz) il müddətinə azadlıqdan məhrum edilib".
Samir Zeynalov bildirir ki, sözügedən hökm Bakı Apelyasiya Məhkəməsinin cinayət kollegiyası (sədrlik edən hakim Əmri Bayramov) tərəfindən qəbul olunub. 23 fevral 2021-ci il tarixli qərarla qüvvəsində saxlanılıb.
"Həmin qərardan kassasiya şikayəti verildiyindən hazırda iş, Azərbaycan Respublikası Ali Məhkəməsinin cinayət kollegiyasının hakimi İlkin Rəcəbovun icraatındadır. Lakin, şikayətin və iş materiallarının 18 iyun 2021-ci il tarixdə məhkəməyə daxil olmasına baxmayaraq, hələ də işə baxılmanın tarixi təyin olunmayıb. Bu isə Azərbaycan Respublikası Cinayət Prosessual Məcəlləsinin 419-cu maddəsinin 3-cü bəndinin tələbinə ziddir. İşin hallarına dair konkret və ümumi olaraq onu qeyd edə bilərəm ki, nümayəndəsi olduğum şəxs hazırda qanunsuz həbs həyatı yaşayır və qərəzli həbsinin əsl səbəbi hazırda həbsdə olan, qohumu olduğu “Quska” ləqəbli sabiq deputat Hüseyn Abdullayevdir".
Vəkil deyir ki, qanunsuz həbs yaşayan şəxsin Hüseyn Abdullayevlə heç vaxt xoşməramlı ünsiyyəti olmayıb: "Məhkəmədə elan olunmuş ittiham üzrə zərəçəkmiş şəxs qismində tanınmış Salehli Şədiyyə Arif qızı bildirmişdir ki, o, 23 iyun 2014-cü il tarixdə Bakı şəhəri, Yasamal rayonu, Landau küçəsi 16 ünvanında yerləşən “AGBANK” ASC-in Elmlər filialından qeyd olunan tarixli müqavilə əsasında illik 22 faiz olmaqla, 24 ay müddətinə 450,000 manat kredit vəsaiti əldə edərək həmin vəsaiti bankın qarşısında T.Bayraməliyevə birgə iş görmək məqsədilə verib. Qeyd edim ki, həmin kredit müqaviləsi üzrə Tural Bayraməliyev zamin qismində tanınmış və Şədiyyə Salehli ilə bərabər kredit müqaviləsinin təminatı olaraq özünə məxsus daşınar və daşınmaz əmlakları girov qoyub. Beləliklə, hər iki şəxs kreditor qarşısında birgə məsuliyyət daşıyıblar".
İctimai vəkil qeyd edib ki, birgə biznes ortaqlığından irəli gələn öhdəliklərin yerinə yetirilməsi məqsədilə nümayəndəsi olduğu şəxs Tural Bayraməliyev təsisçisi və direktoru olduğu “Daş Çınqılı Servis” MMC adlı şirkətdə Şədiyyə Salehlini 15% pay sahibi etmiş və 1 il müddətində hər ay ona 10 000 manat pul ödəyib:
"Bununla belə, sözügedən kredit müqaviləsi üzrə cari ödənişlərin həyata keçirilməsi məqsədilə Tural Bayraməliyev ümumilikdə Şədiyyə Salehliyyə 230000 manatdan çox vəsait ödəyib ki, həmin məbləğin 100,000 manatını sonuncu öz şəxsi ehtiyacları üçün xərcləyib. Təkcə bu arqumentləri sadalamaq kifayət edər ki, Tural Bayraməliyevin əməllərində cinayət tərkibinin olmadığını müəyyən etmək mümkün olsun. Fərz etsək ki, Tural Bayraməliyevin birgə biznes ortaqlığından Şədiyyə Salehliyə hələ də borcu qalıb- halbuki belə deyil- o zaman yenə də Tural Bayraməliyevin dələduzluq cinayətinə yol verdiyini demək, bu barədə onu mühakimə etmək mümkün olmaz. “Dələduzluq cinayətlərinə dair işlər üzrə məhkəmə təcrübəsi haqqında” Azərbaycan Respublikası Ali Məhkəməsinin Plenumunun 11 iyun 2015-ci il tarixli qərarı bu barədə belə demək üçün mötəbər əsasdır.
Daha maraqlı və diqqət cəlb edən məqam isə ondan ibarətdir ki, Şədiyyə Salehli sözügedən kredit müqaviləsinin təminatı olaraq ipoteka müqaviləsi bağlanılarkən evli olduğu halda subay olduğuna dair etibarsız şəxsiyyət vəsiqəsi təqdim etmiş, notarisuda ərizə verərək subay olduğunu bildirmiş və evli olduğunu qəsdlə gizlədir. Göründüyü kimi, saxta sənəddən istifadə etdiyi üçün Ş.Salehlinin əməlində Azərbaycan Respublikasının CM-in 320-ci maddəsinin tərkib əlamətləri vardır. Həmçinin birgə nikah faktını gözardı etmiş notariat ofisinin və Ş.Salehliyə “subay” statusu ilə şəxsiyyət vəsiqəsi vermiş Yasamal RPİ-nin vəzifəli şəxslərinin əməllərində də cinayət tərkibi vardır.
Şədiyyə Salehlinin əməlində dələduzluq cinayətinin əməli vardır. (Bakı Apellyasiya Məhkəməsinin 07 may 2021-ci il tarixli 2(103)-2919/2021-ci il tarixli qətnaməsinə istinadən) Qeyd olunan məhkəmə işinə dair nəzərinizə çatdırım ki, Şədiyyə Salehlinin həyat yoldaşı Süleymanov Rasim Xalid oğlu cavabdehlər “AGBANK” ASC və Şədiyyə Salehliyyə qarşı mülki müstəvidə məhkəmədə iddia qaldıraraq “ipoteka müqaviləsinin etibarsız hesab edilməsi” tələbini irəli sürüb. İddia tələbi Yasamal rayon məhkəməsində təmin edilsədə, uzun sürən məhkəmə proseslərindən sonra Bakı Apelyasiya Məhkəməsinin 07 may 2021-ci il tarixli qətnaməsi ilə iddia tələbi rədd edilib, iş üzrə yeni qətanmə qəbul olunub. Məhz həmin qətnamədə Şədiyyə Salehlinin yuxarıda qeyd olunan qanunsuz əməlləri təsvir edilib. Göründüyü kimi, əslində Şədiyyə Salehli özü sözügedən kredit müqaviləsinin rəsmiləşməsində maraqlı olub, bu məqsədlə saxta sənəddən belə istifadə etməkdən çəkinməyib”.
İctimai vəkil bildirib ki, gənc bəstəkar Ali Məhkəmədə təyin edilməsi gözlənilən məhkəmə baxışını səbrsizlikə gözləyir.
