RAYON SƏHİYYƏSİNDƏ ÖZBAŞINALIQ SON HƏDDƏ
Şirvan şəhəri, Neftçilər küç., ev-6 ünvanında yaşayan Sərraf Əzimov Bolgexeber.com-a şikayət məktubu ilə müraciət edib.
Sayt olaraq mətbuata və səhiyyə naziri Oqtay Şirəliyevə ünvanlanan həmin şikayət məktubunu olduğu kimi diqqətinizə təqdim edirik.
Nazirə xitabən yazılan məktubda deyilir: “Bildirirəm ki, oğlumun dişini çəkdirmək ilə əlaqədar Şirvan şəhər Stomatoloji Mərkəzə müraciət etmişdim. Həkim Vidadi Əzizov bir neçə gün müalicə etdi, lakin oğlumun ağzı yaxşı açılmadığı üçün və onda zəruri avadanlıq olmadığı üçün, həmin alətin yalnız Yaşar Məmmədovda olduğunu əsas gətirərək məni Şirvan Stomatoloji Diş Mərkəzi deyilən özəl stomatoloji kabinetə- stomatoloq Yaşar Məmmədov adlı tibb elmləri namizədi alimlik dərəcəsi daşıyan bir həkimin yanına göndərdi.
Mən oğlumla bərabər həmin stomatoloji mərkəzə üz tutdum. Həkim Yaşar Məmmədovla telefon danışığı zamanı məlum oldu ki, həmin gün o, 14:00-dan sonra xidmət göstərəcəkdir. Bəli, biz 14:00-a qədər gözlədik, o, yalnız 15:00 radələrində gəldi və bizi növbədə birinci olmağımıza baxmayaraq yalnız təxminən 15:45-dən sonra qəbul etdi, heç xəstəyə baxmadan Şahin adlı rentgen həkimin yanına göndərdi. O da bizdən bunun üçün 20 manat pul istədi, biz isə gücümüzün yalnız 10 manata çatdığını bildirib güc-bəla ilə ona 10 manat pul verib müvafiq disketi götürüb sözügedən Yaşar Məmmədov adlı həkimin yanına getdik.
O, disketə kompüterdə baxdıqdan sonra məni və ailə üzvlərimizi - oğlumu, həyat yoldaşımı kabinetə çağırdı və dedi ki, üz-çənə cərrahiyə əməliyyatı aparılmalıdır, bundan ötəri də mən ona 200 manat pul verməliyəm. Mən ona dedim ki, mənim 200 manata gücüm çatmır, mən yalnız bu işdən ötəri 50-100 manat pul verə bilərəm. O, isə yalnız 200 manatı ona ödədikdən sonra dediyi əməliyyatı icra edəcəyini bildirdi. Sonra oğlumun üzünə kəsik edərək sonradan həmin sahəni tikəcəyini bildirdi. Mənə bir anlıq elə gəldi ki, həkim Yaşar Məmmədov kolxoz bazarındadır və hadisələrin sonrakı inkişafı da göstərdi ki, bu məntiqimdə heç də yanılmamışam. Mən ona nə qədər insani münasibət göstərib gücümün yalnız 50-100 manata çatacağını bildirdim. O, isə 200 manatın ona verilmədiyi təqdirdə əməliyyat etməyəcəyini bildirdi.
Məsələni aydınlaşdırmaq üçün özümü həmin "Stomatoloji Mərkəzin" rəhbəri kimi təqdim edən Rafət İsmayılova müraciət etdim. Ədalət naminə qeyd etməliyəm ki, o bizi ayaqüstü də olsa qəbul etdi və bizim qarşımıza özü tərəfindən təsdiq olunmuş və baş mühasib tərəfindən tərtib olunmuş tibbi xidmətlər siyahısını və ödəniləcək pul məbləğini göstərdi, bundan sonra bizdən ötrü həkim-stomatoloq Yaşar Məmmədova xahiş etdi. O, isə heç özünü həmin "Stomatoloji mərkəzin" rəhbəri kimi təqdim edən Rafət İsmayılovu da saymayaraq dediyi 200 manatdan dönmədi və üstəlik də bizə dedi ki, “Biz "külli miqdarda" pul verərək özəl stomatoloji fəaliyyətlə məşğul olmaq üçün lisenziya almışıq və mən də öz növbəmdə payıma düşən pulu çıxartmalıyam, hara istəyirsiniz müraciət edin", dedi.
Biz məcbur olub Şirvan şəhər Mərkəzi Xəstəxanasının baş həkimi Fərhad Səfərovun qəbuluna getdik. O, da insafən bizi yaxşı qəbul etdi və bu iş üzrə Şirvan şəhər xəstəxanasında müvafiq ştat olmadığı üçün bizə Bakı şəhəri Respublika Kliniki Xəstəxanaya üz-çənə cərrahiyə şöbəsinə müvafiq göndəriş verdi.
Mən 21 fevral 2013-cü il tarixində Respublika Kliniki Xəstəxanaya oğlumla bərabər getməli idim. Lakin bir az fikirləşdikdən sonra maddi vəziyyətimin yaxşı olmadığına görə yenidən həkim Vidadi Əzizovun yanına getdim və o bizim maddi vəziyyətimiz barədə dediklərimizi dinləyərək təxminən saat 19:00 radələrində bu əməliyyatı yerinə yetirəcəyini bildirdi və müvafiq tibbi hazırlıq gördükdən sonra fəsadlı dişi oğlumun çənə sümüyündən çıxardı, əməliyyatın sonunda məlum oldu ki, sən demə heç üz-çənə kəsiyi açılmalı deyilmiş və Yaşar Məmmədov da həmin 200 manat pulu alıb oğlumun üzünə kəsik atıb sonra tikmək üçün özünə sərf edən "tibbi variantını" oynamaq istəyirmiş.
Xatırladıram ki, həkim Vidadi Əzizov bizi onun yanına ağızın daha yaxşı açılması üçün həkim Yaşar Məmmədovda alətin olduğu üçün göndərmişdi.
Başıma gələnləri təfsilatı ilə yazmaqda bir vətəndaş kimi məqsədim odur ki, mən hələ bir az öz hüquq və vəzifələrimi bilirəm, amma bu vəziyyətə düşürəm... Görün siravi qanuni bilməyən vətəndaşlarımız Yaşar Məmmədov kimi həkimə yaraşmayan hərəkətlərindən nə çəkirlər.
İstər-istəməz bununla bağlı səhiyyə naziri cənab Oqtay Şirəliyevə üz tutmalı oluram.
Hörmətli cənab Nazir!
Sizin başçılıq etdiyiniz Səhiyyə Nazirliyinə və onun rəsmilərinə qarşı suallar yaranır və həmin sualların araşdırılmasını Sizdən xahiş edirəm:
1. Həqiqətənmi özəl tibbi stomatoloji mərkəzlərdə tərtib olunan tibbi xidmətlər siyahısı və həmin xidmətlərin məbləği Nazirliklə razılaşdırılmır?
2. Başçılıq etdiyiniz Səhiyyə Nazirliyinin müvafiq lisenziya idarəsi tərəfindən "Şirvan stomatoloji mərkəzində" araşdırmalar aparılsın və lazım gəldikdə həmin mərkəzin lisenziyası ləğv olunsun.
3. Həmin mərkəzin həkimi Yaşar Məmmədov barədə müvafiq tədbirlər görmək səlahiyyətiniz varmı?
4. Şirvan şəhər Mərkəzi Xəstəxanasının nəzdində dövlət hesabına diş cərrahiyyəsi üzrə müvafiq ştat vahidləri aça bilərsinizmi?
Müvafiq əməli tədbirin görülməsi həkim Yaşar Məmmədovun dediklərinin əksini göstərərsə, Səhiyyə Nazirliyinin bu istiqamətdə gördüyü əməli tədbirlər kimi qiymətləndiriləcək və sonda bu da aztəminatlı vətəndaşlarımızın layiqli həyat səviyyəsinin yüksəldilməsinə xidmət edəcəkdir. Xahiş edirəm, araşdırmanın nəticəsi barədə qanunvericiliyin tələbləri çərçivəsində mənə də məlumat verilsin”.
Qarşı tərəfin də mövqeyini dinləməyə hazırıq.
P.S Bu məsələni araşdırmaq üçün əməkdaşımız Şirvan şəhərinə ezam olunmuşdur. Adıçəkilən "Stomatoloji Mərkəzin" rəhbəri Rafət İsmayılov ilə görüşmək istəyərkən özünü Rafət İsmayılov kimi təqdim edən şəxs əməkdaşımıza zəng edərək hədə-qorxu gəlmiş, təhqir etmişdir.Lakin məlum olmuşdur ki, o Rafət İsmayılov yox onun qardaşı Faiq İsmayılovdur.Faiq İsmayılov kobud surətdə bildirdi ki,bundan sonra onun qardaşı haqda tənqidi məqalə yazanı şəxsən o özü cəzalandıracaq.Jurnalistə qarşı belə qanunsuz hərəkət ilə əlaqədar həmişə obyektiv olmağa çalışan Bolgexeber. com olaraq hüquq-mühafizə orqanlarına müraciət etmək fikrindəyik.
