Pullu adamların övladlarının Bakının gecə həyatında özünəməxsus yer tutmaları haqda mətbuatda gedən məlumatlar bəziləri üçün dərs olmayıb. Nüfuzlu bir nazirin "çətiri" altında fəaliyyət göstərən "Körpü-Bina Tikinti" MMC-nin rəhbəri Xəlil Göyüşovun oğlu Ramiz Göyüşov da bəzi nazir və milyonçuların övladlarından fərqlənmir. Amma burada ən diqqətçəkən məsələ isə Xəlil Göyüşovun oğlunun hazırda hərbi xidməti başa vurmasıdır.
Amma məsələ ondadır ki, hərbi xidmətdən tərxis olunmasına 1 ay vaxt qaldığı günlərdə Xəlil Göyüşovun oğlu Ramiz Göyüşov təkcə Bakının məşhur restoranlarında gecə həyatı keçirməyib, o, həm də Bakı yollarının məşhur avtoşlarına çevrilibmiş: "Bir fakta diqqət edin. İyunun 7-də gecə saatlarında içkili vəziyyətdə Bakıdakı "Eleven" diskotekasından çıxaraq "avtoş"luq edən Ramiz Göyüşovun 10-ZZ-040 dövlət nömrə nişanlı avtomobili Dövlət Yol Polisi əməkdaşları tərəfindən saxlanılıb. DYP əməkdaşları ilə kobud rəftar edərək onlarla dalaşan Ramiz Göyüşova protokol tərtib olunub və onun avtomobili DYP-nin Badamdardakl cərimə meydançasına aparılıb".
Qeyd edək ki, sözügedən MMC 2001-ci ildə təsis edilib və nəzdində Asfalt Zavodu, Balka sexi, Beton zavod, Çınqıl karxanası, Beton boru zavodu, Körpü istehsalat zavodu və Beton qovşaqları adlı istehsalat müəssisələri fəaliyyət göstərir. Məlumatlarda vurğulanır ki, X.Göyüşovun rəhbəri olduğu MMC ölkənin ən varlıları sırasında sayıla bilər. Hər il milyonlarla manat vəsait xərclədiyi deyilsə də, görülən işlərə görə rəqəmlərin şişirdilməsi də istisna deyil. Belə ki, Bakıda inşa edilən tunel və ya körpülərin xərc hissəsinə diqqət yetirdikdə bu MMC-nin rəqəmləri hansı səviyyədə şişirdiyi açıq şəkildə görülür. Məsələn, ümumi dəyəri 10 milyon manat olan hansısa körpü üçün 20 milyon manatlıq bir smetanın hazırlanması və həmin məbləğdə pulun büdcədən alınması yetərli qədər şübhə üçün əsaslar verir. İri tenderlərin əsas "qənimi" kimi ad çıxarmış X.Göyüşovun bu işləri necə həyata keçirdiyi də kifayət qədər maraqlıdır. Xəbərdə qeyd edilir ki, "KTB" MMC-nin rəhbəri yuxarılarla bağlı olan biri kimi tanınmaqla yanaşı, həm də konkret nazirlərdən biri ilə şərikli şəkildə işləyən şəxs kimi ad çıxarıb. Elə bu səbəbdəndir ki, onun bütün nəqliyyat sektoruna aid layihələri asanlıqla ələ keçirməsi mümkünləşir. Varlı həyat tərzi sürmək, böyük məbləğdə pulları qazanmaqda ad çıxarmış Göyüşovun ən böyük problemi isə oğlu sayılır. Bakının küçələrində bahalı maşınlar sürən Ramiz Göyüşovun ən ucuz maşınının qiyməti 150 min manat hesab edilir. Hərbi xidməti qurtarmasına 1 ay müddət qalmış bir əsgərin hərbi hissədə deyil, barlarda kef çəkməsi isə olduqca maraqlı məqamlardandır. Təbii ki, bütün bunlara görə, Müdafiə Nazirliyi və Ramiz Göyüşovun xidmət çəkdiyi hərbi hissə məsuliyyət daşıyır. Çünki ölkə qanunlarına görə vəzifəsindən, cinsindən asılı olmayaraq hər bir vətəndaşın hüququ eynidir. Bu baxımdan kasıbın övladı ilə yanaşı, Xəlil Göyüşovun da oğlu hərbi xidmətini vicdanla yerinə yetirməyə borcludur. Yoxsa, hərbi xidmətdə olduğu vaxtda diskobarları gəzməli, şəhərin küçələrində avtoşluq etməli deyil.
Qeyd edək ki, Ramiz Göyüşovla bağlı xoşagəlməz faktların ortaya çıxdığı bir vaxtda "Körpü-Bina-Tikinti" (KBT) Məhdud Məsuliyyətli Cəmiyyətində (MMC) neqativ halların bitib-tükənmək bilmədiyi barədə informasiyalar cəmiyyətə ötürülür. Şəhərin əksər yerlərində salınan körpülərin, yeraltı və yerüstü keçidlərin tikinti işlərini həyata keçirən bu şirkətin adı bir sıra xoşagəlməz məsələlərdə hallanır. Hətta dəfələrlə mətbuatda "Körpü-Bina-Tikinti" MMC-nin rəhbəri Xəlil Göyüşovun qanundan kənar maliyyə əməliyyatları, dövlət sifarişli layihələrin icrası zamanı yol verdiyi ciddi nöqsanlarla bağlı silsilə yazılar dərc edilib. Aldığımız son məlumatlara görə, aidiyyəti hüquq-mühafizə orqanları MMC-də həyata keçirilən yeyinti hallarından xəbər tutublar. Bu barədə redaksiyamızı məlumatlandıran şəxsin sözlərinə görə, dövlət büdcəsi hesabına sifariş edilən layihələrin tikintisi zamanı MMC-nin rəhbərliyində təmsil olunan şəxslər, xüsusilə də şirkətin sahibi Xəlil Göyüşov külli miqdarda vəsaiti şəxsi məqsədləri üçün istifadə edib. Belə ki, tikinti işlərində ən ucuz materiallardan istifadə olunduğu halda, MMC sədri kağız üzərində şişirtmələrə yol verərək büdcənin vəsaitlərinin axırına çıxıb. Həmçinin o yerli sexlərdə istehsal olunan tikinti məhsullarını xarici mal adı altında qanunsuz maliyyə maxinasiyalarına yol verib. Bu faktlara göz yuma bilməyən prokurorluq orqanları "Körpü-Bina-Tikinti" MMC-də cərəyan edən xoşagəlməz işlərin izinə düşmək qərarına gəliblər.
Qeyd edək ki, son vaxtlar müxtəlif tikinti şirkətlərinin rəhbərləri dələduzluqda və korrupsiyada ittiham olunaraq həbs edilirlər: "Məhdud Məsuliyyətli Cəmiyyətdə gözlənilən korrupsiya yoxlamaları Xəlil Göyüşovun həbsi ilə nəticələnə bilər. İstintaq orqanları şirkətin icra etdiyi bütün dövlət sifarişlərinin maliyyəsini, yəni ayrılan pulların necə xərclənməsini araşdıracaqlar. Yəqin ki, bu yoxlamalardan sonra MMC sədri həbs olunacaq".
Qeyd edək ki, yazılanlarla bağlı Xəlil Göyüşovla dəfələrlə əlaqə yaratmağa çalışsaq da, zəngələrimizə cavab verilmədi. Amma qarşı tərəfin də mövqeyini dərc etməyə hazırıq. \\ gundelik-bakı \\
