Azərbaycanda məktəb direktorunun əqli qüsurlu şagirdləri müəllimlərə 600 manata satdığı iddia olunur. DİA.AZ xəbər verir ki, bu barədə Sonxeber.az-a müraciət edən 3 saylı xüsusi təhsil məktəbinin müəlliməsi S.Əhmədova (red. - ad şərtidir) məlumat verib.
O, qeyd edib ki, 3 saylı xüsusi təhsil məktəbinin direktoru Nüşabə Heydərova əqli qüsurlu şagirdləri müəllimlərə pul qarşılığında satır:
"Hətta bəzən bir şagirdi iki müəllimə satır. Əslində dövlət məktəblərində şagirdlərin satılmasının özü belə, biabırçılıqdır. Pul verməyəndə də valideynlərin əli ilə bizə müxtəlif oyunlar oynayır.
Belə ki, Nüşabə Heydərova əgər bizə 3 uşaq satırsa, birini elə seçir ki, 2-3 ildən sonra onun valideynini öyrədib oyunlar oynaya bilsin. Valideyni bizə qarşı öyrədib, əleyhimizə çıxarır. Sonuncu dəfə də Binə qəsəbəsində yaşayan şagirdimlə bağlı mənə problem yaratdı. Məktəbə Bakı Şəhəri Təhsil İdarəsindən yeni işçi gəlib. O, Binə qəsəbəsində yaşayan bir şagird istəyirmiş. Nüşabə Heydərova da mənim Binə qəsəbəsində yaşayan şagirdimin valideynini öyrədir ki, haqqımda şikayət ərizəsi yazsın. Nüşabə Heydərova qurduğu belə bir oyunla şagirdimi alıb Bakı Şəhəri Təhsil İdarəsindən göndərilən müəlliməyə verdi.
Bundan əlavə, Binə qəsəbəsində yaşayan digər şagirdimin valideyninə də komissiya üzvü kimi zəng edərək mənə qarşı çıxarmağa çalışıb. O valideynin öyrədilməsi ilə bağlı əlimdə sübutlar da var.
Mən də direktorun qəbuluna gedib söylədim ki, bu şagirdi mənə pulla satıb, amma hazırda valideyni öyrətdiyinə görə mənə evə girməyə icazə vermir.
"Sən tək tərəfi dinləyib qərar vermisən. Məni dinləməmiş şagirdi məndən alıb, həmin müəlliməyə vermisən. Belədirsə, mənim 600 manatımı qaytar ki, mən yeni uşaq götürüm", - deyə etirazımı açıq şəkildə bildirdim.
Nüşabə Heydərova bizdən hər 2-3 ildən bir hər şagirdə görə 600 manat pul alır. Əvvəl 500 manata satırdı. Amma son dövrlər qiyməti 600 manata qaldırdı.
Pulumu geri istəyəndə isə direktor məni hədələməyə başladı. Nüşabə Heydərova əlindəki şikayəti Təhsil Nazirliyinə göndərəcəyini deyərək məni qorxutmaq istədi. Mən də şikayətin Təhsil Nazirliyinə göndərilməsini istədiyimi bildirdim. Söylədim ki, Təhsil Nazirliyi gəlib, şikayəti araşdırsın.
Eyni zamanda, Nüşabə Heydərova dəfələrlə qadına yaraşmayan, əxlaqsız ifadələrlə məni təhqir edib, kobudcasına otağından qovub. Ən önəmlisi isə, hər dəfə məni 18 saat dərslə saxlayacağı ilə hədələyir. Harınlamış bu insan əqli qüsurlu şagirdləri satması və müəllimələrlə qul kimi davranması ilə fəxr edir.
Nüşabə Heydərova məktəbi özünün biznesinə çevirib. Dövlətin məktəbində şagirdləri pulla müəllimlərə satır. Direktorun ətrafında olan Təranə və Zümrüd adlı müəllimlər poliklinikalarla danışıb, o uşaqları alırlar. Biz özümüz o uşaqları almaq istəsək, qiymət 600 manatdan baha çıxır. Yəni hərtərəfli biz müəllimlərin qarşısını kəsirlər.
Nüşabə Heydərova mənim dərs saatımı yarıbayarı azaltdı. Məni təhqir edir, tərbiyəsiz olduğumu bildirir. Mənim tərbiyəsiz olduğumu hardan görüb?! Mən işinə bağlı, iki uşaq anasıyam.
Nüşabə Heydərova barəsində Nizami Rayon Məhkəməsinə müraciət etmişəm. Bununla yanaşı, Bakı Şəhəri Təhsil İdarəsinə də şikayət ərizəsi göndərmişəm. Amma təəssüf ki, hələ də şikayətimə baxan yoxdur. Nüşabə Heydərova mənə heç kimdən qorxmadığını, onun arxasında, qardaşı ilə yanaşı, vəzifəli şəxslərin dayandığını və şagirdləri "əcəb edib" satdığını deyir. Mən sadəcə ədalətin bərpa olunmasını və məktəbi, şagirdləri öz şəxsi biznesinə çevirdiyinə görə direktorun qanunla cəzalandırılmasını istəyirəm. Bu gün Nüşabə Heydərova məndən başqa, digər müəllimləri də incidir, şagirdlərini əllərindən alaraq, dərs saatlarını azaltmaqla hədələyir.
Vəzifə səlahiyyətlərini aşaraq, dövlətin məktəbini özünün biznesinə çevirən Nüşabə Heydərova müəllimlərlə öz qulu kimi davranır və əqli qüsurlu şagirdlərin üzərində pul qazanır. Əqli qüsurlu şagirdlərdən bu formada istifadə etməsi və əşya kimi satması insan hüquqlarına ziddir. Dövlətin himayəsində olan uşaqların satılması yolverilməzdir!
Əminəm ki, qüsurlu uşaqlara daim xüsusi diqqət göstərən cənab Prezident İlham Əliyev və Azərbaycanın Birinci vitse-prezidenti Mehriban xanım Əliyeva, eləcə də digər səlahiyyətli strukturlar təhsilimizə ləkə olan Nüşabə Heydərovanın cəzalandırılması istiqamətində xüsusi göstərişlər verəcəklər və ədalət bərpa olunacaq".
***
DİA.AZ bildirir ki, Sonxeber.az sözügedən məktəblə əlaqə saxlayaraq, direktordan məsələ ilə bağlı açıqlama alıb.
Nüşabə Heydərova səslənən iddiaların əsassız olduğunu bildirib.
O, heç kəsdən uşağını almadığını, əqli qüsurlu uşağın müəllimini valideyn şikayəti əsasında dəyişdiyini və buna dair sübutunun olduğunu deyib.
Direktor problemin sırf müəllimlə valideyn arasında olduğunu və onları dəfələrlə aralarında razılaşmağa səslədiyini, lakin müəllimin özünün həmin valideynlə işləmək istəmədiyini bildirib.
