Suriya Prezidenti Bəşər Əsəd Türkiyənin müxalifətdə olan Cümhuriyyət Xalq Partiyasının (CHP) sədri Kamal Kılıçdaroğlunu ikitərəfli görüş üçün Suriyaya dəvət edib. Bu iddia ilə CHP-dən olan keçmiş deputat Barış Yarkadaş çıxış edib.
Türkiyə hökumətinin Suriya ilə bağlı atdığı hər addımını tənqid edən Kamal Kılıçdaroğlu Bəşər Əsəddən görüş təklifi alıb. Beləliklə, Kılıçdaroğlunun Ankaraya Dəməşqlə yenidən danışıqlar aparmaq çağırışına Bəşər Əsəd cavab verib. Suriya lideri CHP sədrini ikitərəfli görüş üçün Dəməşqə dəvət edib. Hələlik CHP-dən iddiaya cavab verilməyib. Türkiyə Suriyaya (İdlibə) yeni qüvvələr yeritdiyi, Ərdoğan Putin görüşü ərəfəsində Bəşər Əsəd CHP başqanı Kamal Kılıçdaroğlunu dəvət etməsi birmənalı qarşılanmayıb.
Sual yaranır ki, Bəşərin indi nə kələyi var? Bəllidir ki, CHP lap əvvəldən Suriyaya qoşun yeritmək məsələsində əleyhinə olmaqla nəinki Ərdoğan hakimiyyətinə, bütövlükdə Türkiyə dövlətinə müxalif mövqe tutub. Halbuki, qardaş ölkə BMT Nizamnaməsinə uyğun olaraq öz sərhədlərinin təhlükəsizliyi təmin eləmək, o sıradan terror hücumlarını önləmək üçün Suriyaya girib. Bunun üçün isə həmsərhəd Suriyanın razılığına gərək yoxdur.
Bunu da yada salaq ki, az öncə Bəşər Əsəd Moskvada Putinlə görüşüb. Hədəf rusun hərbi dəstəyi ilə İdlibdə zorla öz qanunsuz hakimiyyətini bərqərar eləməkdir. İdlibdə isə Türkiyə qoşunları var. Ərdoğanla Putinin qarşıdakı görüş gündəliyi də bəllidir. Bəs Bəşər Əsəd Kılıcdaroğlu ilə nədən danışacaqlar? CHP-nin bu məsələyə hansısa təsir imkanları varmı və ya hansısa gizli anlaşma mümkünmü?
Mövzu ilə bağlı “Yeni Müsavat”a danışan politoloq Qabil Hüseynli bildirdi ki, Bəşər Əsəd Ankaradakı mərkəzdənqaçma qüvvələrini özünə cəlb etməyə çalışır: “Bundan əvvəl də Kamal Kılıçdaroğlu Dəməşqə dəvət edilmişdi və xalqın etirazlarından sonra o bundan çəkinərək getmədi. Bundan sonra onun başçılıq etdiyi Cümhuriyyət Xalq Partiyası çox səfeh fikirlər səsləndirməyə başladı. Bizim Liviyada nə işimiz var, Suriyada nə işimiz var, hətta bizim Azərbaycanda nə işimiz var kimi sözlər dillərinə gətirdilər və bunu parlament üzvləri də səsləndiriblər. Vaxtilə Osmanlı dövləti imperiya idi və bu imperiyanın tərkibindən 26 müstəqil dövlət çıxdı. Kamal Kılıçdaroğlunun babası yəqin ki, həmin imperiyanın təbəəsi, vətəndaşı olub. Bu gün əgər Türkiyə müəyyən beynəlxalq güclərin əlindən çətinliklə özünü hazırki ərazisində qoruyub saxlaya bilibsə, bu, Mustafa Kamal Atatürkün qəhrəmanlığı və rəhbərliyi altında baş verib. Ancaq təəssüf ki, artıq onun yaratdığı partiyanın idarəçiliyi bu gün tamamilə kosmopolit bir ideologiyaya köklənib və hazırda bunu həyata keçirirlər”.
Politoloqun sözlərinə görə, Türkiyənin Suriyadakı varlığı terrorçuluğa da mühüm zərbə oldu: “Mən Liviyanı bir kənara qoyuram. Suriyada Türkiyənin çalışmaları olmasaydı, hərbi əməliyyatları olmasaydı, indi PKK və PYD orada özünün bir muxtar qurumunu yaratmışdı. Vaxtilə Türkiyənin İstanbuldan tutmuş müxtəlif ərazilərinə qədər terrorçular müxtəlif terror aktlarını həyata keçirirdilər və bu gün də keçirirlər. Lakin artıq onların gücü, qüdrəti çox zəifləyib və Türkiyə ərazisində bu gün 4 milyondan çox Suriya qaçqını yaşayır. Onların əksər hissəsi kürddür. Türkiyə hər il dövlət büdcəsindən 8 milyard dollar bu 4 milyonluq qaçqını saxlamaq üçün ayırır. Türkiyəyə kömək də vəd etmişdilər, lakin onu da etmədilər. Ərdoğan həm cənubda terrorçu qruplaşmaları zərərsizləşdirdi, həm də Suriya müxalifətinin bir hissəsini qoruyub saxladı. Həmin Suriya müxalifətinin demokratik yönümlü hissəsi bu gün də İdlibdən tutmuş digər şəhərlərə qədər böyük bir əraziyə nəzarət edirlər. Suriyanın təxminən 12-15 faizinə nəzarət edirlər”.
Q.Hüseynli vurğuladı ki, indi Rusiyanın da yaxından dəstəyi ilə, bəlkə də Rusiyanın layihəsinə uyğun olaraq Bəşər Əsəd Suriya demokratik müxalifət partiyasını sıradan çıxarmaq istəyir: “Sentyabrın 29-da Soçidə Ərdoğan-Putin görüşü baş tutacaq və bu məsələlər də müzakirə olunacaq, Qarabağ məsələsi də gündəlikdədir. Mən Ərdoğanın bu qədər Türk Birliyini sevdiyini, bu qədər Azərbaycanı sevən olduğunu əvvəllər bilmirdim. Yalnız indi kəşf etdim ki, dil boğaza qoymadan millətçilikdən danışan insanlar bir yanadır, ancaq bu işi həyata keçirən, gerçəkdən reallaşdıran insan başqadır. Ərdoğan sübut etdi ki, o türk dünyasını sevir, türk sevdalısıdır və türk dünyası üçün də əlindən nə gəlirsə, onu edir. Gələn ilin əvvəllərində Türkdilli Dövlətlər Şurasının İstanbulda toplantısı keçiriləcək və türk dövlətlərinin birliyi adı altında tədbir keçiriləcək. İndiyədək həmin tədbirlərə müşahidəçi Türkmənistan da həmin Türk Dövlətləri Birliyinə qatılacaq və 6 müstəqil türk dövlətindən ibarət birlik yaranacaq. Bu dünyada hərbi və siyasi qüvvələr nisbətinin dəyişməsinə gətirib çıxarmalıdır. Bununla türk dünyası yenidən ayağa qalxacaq. Onlar hamısı Azərbaycanın haqq işinə dəstək verəcək. Biz 44 günlük müharibə dövründə Azərbaycanın haqq işində, ədalətli qələbə çalmasında özünün maddi- mənəvi köməyi ilə, dünyaya yönəlik təbliğatlarıyla Türkiyə dövlətinin nə qədər yaxından iştirak etdiyinin şahidi olduq. Tək olmadığımızı, arxamızda böyük bir qüvvənin dayandığını hiss etdik. Əlbəttə, ordumuz, əsgələrimiz də düşmənin işğal edilmiş ərazilərimizdən çıxarılması üçün əlindən gələni etdi. Bundan sonra da türkdilli dövlətlərin mənəvi və siyasi dəstəyi ilə qalan məsələlər həllini tapacaq”.
Politoloqun fikrincə, Kamal Kılıçdaroğlu Dəməşqə səfər etməyəcək: “Əgər Kamal Kılıçdaroğlu oraya səfər etsə, o, əli öz xalqının qanına batmış Bəşər Əsədə əl uzadıb onunla görüşsə, geri qayıdanda çox çətin ki, Cümhuriyyət Xalq Partiyasının və Atatürk kimi böyük bir şəxsiyyətin yaratdığı partiyanın başında qala bilsin. Əgər sən siyasi rəqabət aparmaq üçün düşmənə əl uzadırsansa, onun dəstəyindən istifadə edirsənsə, bu artıq millətə, xalqa, dövlətə qarşı xəyanətdir. Türk xalqı güclü xalqdır və bu baş verərsə, onlar Kamal Kılıçdaroğlunu Məhşər ayağına çəkəcəklər”.
