Ölkədə baş verən son olaylar bir çox bəzi qaranlıq məqamların da üzərinə işıq saldı. Belə ki, bir müddət öncə ölkə gündəminə bomba kimi düşən “qiyamçı diplomatlar” mövzusu ətrafında yeni ehtimallar səslənməkdədir. “Unikal” qəzeti xatırladır ki, həmin hadisələr baş verərkən həmin diplomatların arxasında hansısa güclərin dayanmasına dair iddialar səslənsə də həmin güclərin konkret kimlər olması haqda geniş bilgi verilmirdi. Bu günlərdə isə bəzi xəbər daşıyıcıları mövzuyla bağlı şok sayıla biləcək iddialarla çıxış edib.
Məlumat üçün bildirək ki, Azərbaycanın Niderland krallığındakı keçmiş konsulu Nahid Cəfərov “Facebook” səhifəsində Ədliyyə Nazirliyinin Əli Kərimlinin rəhbərlik etdiyi qrupun keçirdiyi qurultayın sənədlərini qəbul etməməsinə münasibət bildirib. O, səhifədə Əli Kərimlini dəstəkləyən fikirlər yazıb və bunu hakimiyyətin planı kimi qiymətləndirib.
Nahid Cəfərov kimi Azərbaycanın Avropa İttifaqındakı keçmiş səfiri Arif Məmmədovun da Avropa dövlətlərindən siyasi sığınacaq almasından sonra Əli Kərimlinin rəhbərlik etdiyi qrupu və Milli Şuranı dəstəkləməsi təsadüfi deyil. Keçmiş səfirlərin həmçinin keçmiş milli təhlükəsizlik naziri Eldar Mahmudovun vəzifəsindən uzaqlaşdırılmasına olan sərt mövqeləri də bu qəbildəndir. Bu, uzun illər Əli Kərimlinin hökumətin müxtəlif qolları ilə əlaqələri haqda gəzən iddiaların təsdiq olunması demək idi. Sabiq diplomatlar Əli Kərimli ilə müxalifət arasında olan sirr pərdəsini qaldırdılar və hər şey çılpaqlığıyla göründü.
Məlumatlara görə, Eldar Mahmudovun dönəmində Milli Təhlükəsizlik Nazirliyində təmsil olunan generallar məhz keçmiş AXCP sədrinin əli ilə Azərbaycanda siyasi çevriliş planı üzərində işləyirlərmiş. Yəni, çevriliş üçün hesablanan siyasi dəstək Əli Kərimlidən olmalıymış. Qərbdən olan müəyyən siyasi dairələr də bu planda aktiv rol alıblar. Eldar Mahmudovun da hakimiyyət tərəfindən pas vəziyyətinə salınmasından sonra çete başsız qalıb. Çətin vəziyyətdə qalmış “siyasi çevriliş qruplaşması” vəziyyətdən çıxış üçün hakimiyyətə təzyiqlərin alternativ variantı üzərində düşünürlər. İndiki mərhələdə ən azından AXCP təmsilçiliyinin Əli Kərimliyə geri verilməsi üzərində baş sındırırlar. Çünki partiya rəhbəri kimi vaxtilə Qərbdən Əli Kərimliyə əlahiddə imtiyazlar verilirdi və müxtəlif kanallar vasitəsilə çevriliş planlarının həyata keçirilməsi üşün Eldar Mahmudovun roluyla külli miqdarda maddi vəsait göndərilib. Sabiq nazir sahibkarlar üzərində qurduğu reket şəbəkəsi vasitəsilə yığdığı pulların müəyyən hissəsini və kənardan gələn maliyyə vəsaitlərindən bir hissə planın icrası üçün keçmiş AXCP sədri ilə bölüşüb. Eldar Mahmudov Əli Kərimlinin hakimiyyətin içinə sızmasında əsas dəhliz rolu oynamaqla yanaşı, eyni zamanda onun maddi təhlükəsizliyinin təminatı idi. Sabiq nazir həmçinin Əli Kərimlinin tərəfdarı olan bəzi şəxslərin də Azərbaycandan kənara çıxarılmasında altiv rol oynayıb. O, Avropa dövlətlərindən siyasi sığınacaq almış bəzi şəxslərdən Qərbdəki siyasi dairələrlə arasında əlaqələndirici vasitə kimi istifadə edib. Gizli plana əsasən, 1 noyabr parlament seçkilərindən sonra Azərbaycanda kütləvi nümayişlər başlamalıydı. Lakin hakimiyyətin gözlənilməz MTN əməliyyatları planı pozdu. Keçmiş AXCP sədri Əli Kərimli zaman-zaman çıxışlarında, “Facebook” statuslarında “hakimiyyətdən mənə verilən məlumatlara görə...” sözlərindən mütəmadi olaraq istifadə edirdi. Əlbəttə, onun belə bir ifadəyə yol verməsi cəmiyyət və müxalifət üçün sirli məqam idi. Keçmiş sədrə hakimiyyətdaxili vəziyyət barədə hansı kanalların məlumat verməsi düşündürücü idi. Lakin Eldar Mahmudovun vəzifəsindən uzaqlaşdırılmasına bir neçə ay qalmış Əli Kərimli artıq bu cür fikirlərdən istifadə etmədi. O, qeyri-müəyyən formada bu tip çıxışlardan əl çəkərək, ölkədə fəallaşan dini kəsimi dəstəkləməyə başladı. Keçmiş AXCP sədrinin verdiyi son bəyanatların hamısı məhz hakimiyyətin dini radikallar üzərində təzyiqləri artırmasıyla bağlıdır. Bu o deməkdir ki, Eldar Mahmudovun getməsindən sonra əsas dəstəkçisini itirən Əli Kərimli liderliyindəki çete radikalların dəstəyini qazanmağa çalışır. Eldar Mahmudov istefaya göndərilərkən üzə çıxan faktlardan biri sabiq nazirin İran kəşfiyyatı ilə yaxın əlaqələrinin olması ilə bağlı idi. Mahmudovun dönəmində mediada İranı tənqid edən jurnalistlər üzərində təzyiqlərin pik həddə olması bu baxımdan təsadüfi deyildi. Əlbəttə, keçmiş nazir təzyiqləri birbaşa yox, dini geyimli əlaltıları vasitəsilə edirdi ki, iz tapmaq mümkün olmasın. Məsələn, jurnalist Rafiq Tağının qətlinin üstünün açılmaması bu qəbildən ola bilər. R.Tağı xəstəxanada olarkən, mediaya verdiyi müsahibədə bildirmişdi ki, işdən çıxarkən görkəmindən dindara oxşayan tanımadığı şəxs tərəfindən izlənilirdi. Fürsət düşən kimi müəmmalı qatil jurnalisti qətlə yetirir. Bu jurnalist Elmar Hüseynovun qətl ssenarisinə oxşayırdı. Hansı ki, bu gün Hüseynovun öldürülməsi planında Mahmudov - Çovdarov tandeminin rolu olduğu iddia edilir.
Bütün bunlar isə adıçəkilən qüvvələrin - Əli Kərimli, MTN-dəki bəlli cinayətkar qrup və “qiyamçı diplomatların” eyni mərkəzdən idarə olunduğu şübhələrini əhəmiyyətli dərəcədə artırır. Həmin ehtimalların araşdırılması isə jurnalist işindən daha çox hüquq-mühafizə orqanlarının səlahiyyətində olan məsələdir.
