“İqtisadi Əməkdaşlıq Təşkilatının əsasını Türkiyə, Pakistan və İran qoyub. Sonradan Azərbaycan və digər ölkələr də bu təşkilata üzvü olublar. Azərbaycanın İqtisadi Əməkdaşlıq Təşkilatına üzv olması isə bu qurumu daha da aktivləşdirib”.

Bu fikirləri “Reytinq” qəzetinə açıqlamasında Azərbaycan Demokrat Partiyasının sədri Sərdar Cəlaloğlu Xankəndi şəhərində keçirilən İqtisadi Əməkdaşlıq Təşkilatının (İƏT) Zirvə görüşünü, İran prezidenti Məsud Pezeşkianın Xankəndi səfərini və bunun ciddi müzakirə mövzusuna çevirilməsini şərh edərkən deyib.

S. Cəlaloğlu bildirib ki, indi İƏT-i təsis edən ölkələrin, ələlxüsus da İran prezidentinin Xankəndiyə gəlməməsi anlaşılmazlıq yaradardı: “Digər tərəfdən, İsrail-İran müharibəsindən sonra İran prezidentinin Qarabağa gəlməsi, Xankəndidə keçirilən tədbirdə iştirak etməsi, bu günə qədər Tehranın Qarabağla bağlı apardığı siyasətində və İsrail-Azərbaycan münasibətlərində tutduğu mövqedə fundamental dəyişikliklər olduğunu göstərir. Müharibədən sonra İran prezidentinin ittiham etdikləri Azərbaycana gəlişi İranın rəsmi dairələri ilə qeyri-rəsmi dairələri arasında ciddi fərq olduğunu göstərir”.

Partiya sədri əlavə edib ki, Azərbaycan üçün bu tədbirin ən önəmli tərəfi İranın burada iştirakıdır: “İran prezidenti Pezeşkian türküdür. Zatən Azərbaycan-İran əlaqələrinin inkişafı həm İranda yaşayan Azərbaycan türkləri, həm də bizim üçün həyati əhəmiyyətə malikdir. Biz hər hansı bir bahənə ilə İran-Azərbaycan münasibətlərinin pozulmasına qarşı çıxmalı və belə hallarla barışmamalıyıq”.

S. Cəlaloğlu Xankəndi tədbirinin digər bir əhəmiyyətindən də bəhs edib: “Azərbaycan Rusiyanın iştirak etmədiyi təşkilatlarda təmsil olunmaqla real müstəqillik və suverenlik istiqamətində inkişaf edir. Bildiyiniz kimi, İƏT, Türk Dövlətlər Təşkilatı, İslam Əməkdaşlıq Təşkilatı adlı qurumlarda Rusiya iştirak etmir. Bu, Azərbaycanın Rusiyadan fərqli çox ciddi strateji xətt izlədiyini göstərir. Rusiyanın da Xankəndi tədbiri ərəfəsində törətdiyi hadisələr elə onun Azərbaycanın müstəqillik məsələsindən qıcıqlandığının sübutudur.

İkincisi, İran prezidentinin Xankəndiyə gəlişi İran tərəfinin Azərbaycana qarşı səsləndirdiyi iddiaların əsassız olduğunu göstərdi. İran prezidentinin Azərbaycan, Türkiyə və Pakistan liderləri tərəfindən səmimi qarşılanması, Pezeşkiana xüsusi diqqət göstərilməsi onun isbatıdır ki, münasibətlərin qaydada olması hər bir tərəfin marağındadır. Pezeşkianın Azərbaycanda özünü rahat hiss etməsi, qayıtdıqdan sonra “mənə deyirdilər ki, getmə, təhlükəlidir. Amma mən getdim və yüklsək səviyyədə qarşılandım”,- deməsi göstərir ki, İranda bəzi qüvvələr süni şəkildə Tehran-Bakı münasibətlərini pozmağa cəhd edirlər. Burada məqsəd İranda yaşayan türklərlə bizim aramızda baryer yaratmaq, mümkün qədər bu əlaqələri pozmaqdır. Odur ki, biz İranla yüksək əlaqələr qurmalıyıq, nəyin bahasına olursa-olsun əlaqələri genişləndirməliyik. İndiki geopolitik mənzərədə İranın əməkdaşlıqda təmsil olunması həm onun, həm də Azərbaycan, Türkiyə və Pakistanın iqtisadi çıxarlarına uyğundur”.

S. Cəlaloğlu sonda əlavə edib ki, İran eyni zamanda Türkiyə-Pakistan və Azərbaycan-Pakistan quru yoludur və gələcəkdə bu əməkdaşlıq daha da inkişaf edəcək.