“Azərbaycan tərəfi zamanında sülh sazişinə dair şərtlərini Ermənistana təqdim edib və hazırda sazişin bağlanmasına yaxşı imkan və şərait yaranıb. Yəni, İrəvan fəal davranaraq Azərbaycanın şərtlərini qəbul edib və sülh sazişi bağlamağa iradəsinin olduğunu göstərməyə çalışır. Bu işdə baş nazir Nikol Paşinyana mane olan Erməni Apostol Kilsəsidir. Bu da anlaşılandır”.

Bunu “Reytinq” qəzetinə açıqlamasında professor Cümşüd Nuriyev deyib.

C. Nuriyev xatırladıb ki, ermənilərin min llər boyu dövləti olmayıb və dövlət funksiyasını kilsə yerinə yetirib. Digər tərəfdən, kilsə Qarabağ məsələsini zamanla özünün biznes layihəsinə çevirərək pul və ianələr topalayıb. İndisə isə sülhdə maraqlı deyil və Paşinyan hökumətinə faktiki, mane olmağa çalışır. Paşinyanın kilsəni və şəxsən Qarageni hədəfə alması göstərir ki, Ermənistan hakimiyyəti ona mane olan məsələlərdən xilas olmaq qərarı verib.

Professor əlavə edib ki, Ermənistanın hazırkı hakimiyyəti Azərbaycan prezidenti İlham Əliyevin dediyi işi həyata keçirən lider olduğunu çox yaxşı bilir.

C. Nuriyevin sözlərinə görə, Azərbaycan Ermənistandan beynəlxalq hüquq və təcrübəyə əsaslanan sülh sazişi istəyir ki, nəticədə hər iki ölkə bundan mənfəət götürə bilsin: “Əks təqdirdə Azərbaycanın ata biləcəyi addımlar var. Məsələn, işğal dövründə bizə dəyən ziyan 150 milyard dollar olub. Bu beynəlxalq mütəxəssislərin ortaya qoyduğu rəqəmdir, məncə, bu ziyan azı 250 milyard olub. Amma Ermənistanın varidatı üçumilikdə 100 milyard dollara dəyməz. Azərbaycan bunun qarşılığında Zəngəzuru geri ala bilər. Nəzərə almaq lazımdır ki, bu ərazilər qanunsuz olaraq Ermənistana verilib. Ermənilər də bunu görür və bəzi millətçilər məsələ qaldırırlar ki, Ermənistanda azərbaycanlıların xüsusilə kütəvi yaşadığı ərazilərin toponimləri dəyişdirilsin. Beləcə, iddia edirlər ki, 1938-ci ildən sonra orada türklər yaşamayıb. Ancaq baş nazir Nikol Paşinyan görür ki, Azərbaycan Ermənistanın atacağı növbəti məkrli planlara qarşı hazırlaşır, dövlət, cəmiyyət və media bir nöqtəyə vurur.

Digər tərəfdən, Turan ideyası günü-gündən daha geniş müzakirələrə səbəb olur, ideyanın reallaşması mümkündür. Belə bir şəraitdə Ermənistan ya kiçik bir dövlət kimi mövcud ola, ya da, ümumiyyətlə, dünya xəritəsindən silinə bilər. Erməni hakimiyyəti də bunu hiss edir. Odur ki, Paşinyan və komandası əvvəlki dövrlə müqayisədə indi səhər bir, axşam isə tam başqa fikir səsləndirmirlər. Ələlxüsus da, keçən ay Paşinyanın Türkiyə səfərindən sonra məsələləri daha aydın dərk etməyə başlayıblar”.

C. Nuriyev xatərladıb ki, Ermənistanın müttəfiqlərindən biri İrandır: “Amma ermənilər görürlər ki, xüsusilə, Pezeşkian prezident seçildikdən sonra Azərbaycanla əlaqələr düzəlir, bu məsələdə mollaların sözü o qədər də keçmir, İran özü də dəyişir. Üstəlik, indi Rusiyanın mövqeyi zəifləyib. Ermənistanın gözü önündə Rusiya-Azərbaycan münasibətlərində gərginləşmə olsa da, Azərbaycan geri çəkilmədi, dirəniş göstərdi. Rusiyanın qarşısında dirəniş göstərib geri çəkilməyən Azərbaycana Ermənistan nə edə bilər ki? Hesab edirəm ki, bu reallıqlar Ermənistan hakimiyyətində dərk olunur. Bu səbəblərdən də ehtimal edirəm ki, bu il sülh sazişi imzalana bilər”.