Məlum olduğu kimi, son həftələr qonşu İranda çox ciddi su çatışmazlığı problemi yaranıb. Bu, xüsusilə, iri şəhərlərdə, o cümlədən paytaxt Tehranda daha çox hiss olunur. Bəs görəsən azərbaycanlılar yaşayan şəhərlərdə, ostanlarda vəziyyət necədir? Orada da içməli, texniki su, işıq, qaz ilə bağlı çətinliklər çoxdur?

Mövzu ilə bağlı Moderator.az-a açıqlamasında Azərbaycanın İrandakı sabiq səfiri Abbasəli Həsənov bunları söyləyib:

“Bəli, belə problemlər hər yerdə var. Eləcə də azərbaycanlılar yaşayan ərazilərdə də vəziyyət çətinləşib, bir çox sosial və iqtisadi problemlər mövcuddur. Təhsil, səhiyyə və digər sahələrdə də ciddi çətinliklər var. Elə bir ostan yoxdur ki, orada hər şey yerində olsun. Su, işıq, qaz və digər əhəmiyyətli xidmətlərdə böyük çətinliklər var. Düzdür, su təchizatının vəziyyəti Ərdəbil ostanında daha yaxşıdır. Çünki yaxınlıqdakı Savalan dağının zirvələrində qar suları var. Amma orada da qaz və işıqla bağlı problemlər mövcuddur. Həm də onu da deyim ki, İrandakı sosial problemlərin yayılmasında ayrı-seçkilik yoxdur. Yəni, deyək ki, farslar yaşayan bölgələrdəki problemləri həll edilməsi üçün xüsusi imtiyaz verilmir. Onlar da azərbaycanlılar, ərəblər və s. kimi eyni çətinlikləri yaşayır…”