"BU ÇOX İYRƏNC KAMPANİYADIR"
AXCP sədri Əli Kərimli hələ seçkiyə bir il qalmış hakimiyyətin hədəfinə tuş gəlib. Əbülfəz Elçibəyin zəhərlənməsiylə bağlı Hafiz Hacıyevin prokurorluğa müraciətini ictimai-siyasi xadimlər, ziyalılar hakimiyyətin Əli Kərimliyə növbəti çirkin kampaniyası kimi dəyərləndirir. Artıq neçə gündür ki, oxucularımızın diqqətinə bu çirkin kampaniyaya cəmiyyətin tanınmış simalarının münasibətini təqdim edirik. Bu gün də münasibətini öyrəndiyimiz şəxslərin fikrincə, iqtidar bu addımı ilə qarşısına qoyduğu məqsədlərə nail olmayacaq.
Əli Kərimli hakimiyyətin eybəcərliklərini ifşa etdiyinə görə hədəfdədir
Xalq artisti Flora Kərimova bildirdi ki, başladılan çirkin kampaniya yalnız ikrah hissi doğurur:
- Hafiz Hacıyev iddia edir ki, guya Elçibəyin ən yaxın adamlarından biri olub. Bu yalandır. Hafiz Hacıyev Elçibəyin kürəyinə xəncər vuranlardan biri olub. O, şəxsən Elçibəyin arxasınca danışanlardan biri olub. Bu çox çirkin, iyrənc kampaniyadır. Əli Kərimlinin adı heç zaman bu cür məsələlərdə hallanmayıb. Heç olmasa bunu edənlər bir ağıllı ssenari quraydılar. Bu, çox cılız, ağlasığmaz, gülməli bir şoudur. Prokurorluq bu işə əl qoymaqla özünü biabır edir. Səbəbi də bəsitdir, Əli Kərimli bu hakimiyyətin eybəcərliklərini çılpaq şəkildə ifşa edir. Əli Kərimli perspektivli siyasətçidir. Ona görə də hakimiyyət onu gözdən salmağa çalışır.
Cəfəng iddianın sonu yoxdur
VHP sədri Sabir Rüstəmxanlı bildirdi ki, tarix boyu dövlət başçılarının, perspektivli siyasətçilərin, tanınmış şəxslərin, sənət adamlarının qəfil dünyasını dəyişməsi bir qayda olaraq diqqətdə olub və onun səbəbləri ilə bağlı müxtəlif fikirlər söylənilib:
- Əgər Əbülfəz bəyin zəhərlənməsi hadisəsi olubsa belə, bu, onun yaxın ətrafı tərəfindən törədilməzdi. Mən Əli Kərimlinin adının burada hallanması ilə razılaşmıram. Taleyi Elçibəylə bağlı olan adamların belə bir addım atması ağlabatan görünmür.
Əli Kərimli diktaturaya qarşı mübarizənin ön cərgəsindədir
Hüquq Maarifçiliyi Cəmiyyətinin sədri İntiqam Əliyev hesab edir ki, Elçibəyin ölümü ilə bağlı cinayət işi və onun ətrafında baş verənlər bir daha göstərir ki, hakimiyyətin çox ciddi əxlaq problemi var. Bu mənada cəmiyyətdəki reaksiya da baş verənlərə adekvatdır və toplumun beyni zəhərlənməyən hissəsində haqlı olaraq ikrah hissi doğurur:
- Normal ölkələrin hamısında cinayət hadisəsi barədə məlumata, ərizəyə, şikayətə reaksiya verirlər. Azərbaycan o ölkələrdəndir ki, burada prezidentin, nazirin və ya hər hansı dövlət məmurunun milyonlarla ölçülən mülkləri ilə bağlı iddialar hüquq-mühafizə orqanlarında, parlamentdə, məhkəmədə bir kimsənin diqqətini çəkməz. Jurnalistin, siyasətçinin, QHT fəalının polis idarəsində, həbsxanada, etiraz edən vətəndaşın toplantıda döyülməsi, işgəncəyə məruz qalması, öldürülməsi ilə bağlı şikayətlərə görə paqonlu-paqonsuz hər hansı dövlət görəvlisinə kimsə gözünün üstdə qaşın var deməz. Elmar Hüseynovun və Rafiq Tağının qatilləri hələ də azadlıqda gəzdiyi halda buna görə prokurorluqda bir kimsəyə tənə edilməz...
Əgər Elçibəy zəhərlənib öldürülübsə, normal məntiq onu deyir ki, bunu edənləri tamam başqa yerdə axtarmaq gərək, onun dostları, əqidə və mübarizə yoldaşları arasında yox.
Əli Kərimlinin isə bu məsələdə hədəf seçilməsi təsadüfi deyil. Çünki Əli bəy son illərdə diktatura əleyhinə gedən mübarizənin ön cərgələrindədir. Onun mütəmadi olaraq hakimiyyətin təşkil etdiyi iyrənc kampaniyaların hədəfində olması da burdan qaynaqlanır. Bu ittihamlar təkcə hakimiyyətin özünə təhlükəli rəqib saydığı bir siyasətçini nüfuzdan salmaq, qarşıdan gələn ölkə üçün çox əhəmiyyətli siyasi hadisə ərəfəsində onu zərərsizləşdirmək məqsədi güdmür, həm də demokratik düşərgəyə qarşı yönəlib, toplumun bu kəsiminin daxilində və ona qarşı etimadsızlıq mühiti yaratmağa köklənib. Bu dəfə də alınmadı. Bundan sonra da alınmayacaq. Bunlar bumeranq kimi bir şey. Onlar bu hakimiyyətə nifrəti artırır, onun sonunu yaxınlaşdırır.
Hakimiyyət son dövrlərdə artan fəallığı yatırmaq üçün siyasi partiyalara, mediaya, qeyri-hökumət təşkilatlarına, gənclərin hərəkatlarına, sosial şəbəkələrə qarşı basqıları gücləndirmək əvəzinə, cəmiyyətdə narazılıq və etiraz doğuran problemlərin həlli istiqamətində real addımlar atmalıdır. Hökumət fərqli fikirlərə, o cümlədən tənqidə qarşı dözümlü olmalı, ölkənin siyasi, iqtisadi, sosial və digər sahələrində hüquq və azadlıqlarını, o cümlədən demokratiyanın təməl prinsiplərindən plüralizmi, siyasi rəqabəti təmin etməlidir.
Hakimiyyət heç cür anlamaq istəmir ki, yumruğa, zora söykənən sabitlik bir gün mütləq dağılacaq. O zaman nəticələr həm ölkə üçün, həm də insanları, cəmiyyəti mübahisələri sivil yolla deyil, dubinka ilə həll etməyə alışdırmış hakim elita üçün çox ağır ola bilər.
Bu bir siyasi şoudur
Hüquqşünas Əyyub Kərimov da hazırda səslənən ittihamların və yürüdülən kampaniyanın heç bir perspektivinin olmadığını xatırlatdı:
- Hazırda baş verən proseslər mənim yadıma 99-cu ildə Elçibəyə qarşı irəli sürülən ittihamları saldı. O zaman da Əbülfəz Elçibəy barəsində cinayət işi başlanmışdı. Ədliyyə nazirliyi PKK-nı Heydər Əliyevin yaratdığına dair ittihamlar irəli sürdüyünə görə Elçibəyi məhkəməyə vermişdi. Həmin cinayət işi Bakı Şəhər Məhkəməsində idi. Elçibəy o prosesi gözləyirdi və məhkəmənin tribunasından istifadə etsin. Amma həmin məhkəmə müəmmalı şəkildə ləğv edildi. Hazırda da Əli Kərimliyə qarşı irəli sürülən ittihamları eyni aqibət gözləyəcək. Bu bir siyasi şoudur.
Gündəmin dəyişdirilməsinə cəhd
Tanınmış telejurnalist Qulu Məhərrəmli hesab edir ki, əslində belə bir iddianın gündəmə gətirilməsi nəticəsində ölkənin başqa vacib, çözülməsi zəruri olan problemləri arxana plana keçmiş olur:
- Bu, reallıqdan uzaq və cəfəng bir iddiadır. Ona görə bu cür qeyri-ciddi məsələlərin geniş müzakirəsinə lüzum görmürəm. Bu cür məsələlərin ortaya atılması ilə əslində gündəmin zəbt olunmasına çalışılır. Əslində isə hazırda ölkənin inkişafı, xalqın gələcəyi ilə bağlı çox mühüm məsələlər var ki, onların çözülməsi daha vacibdir. Hər kəsə bu yürüdülən siyasətin məqsədinin nə olduğu yaxşı bəllidir. Reallıqdan uzaq bu kimi iddialar ictimai əxlaqı pozan məsələlərdir.
Hakimiyyət Əli Kərimlinin addımlarından narahatdır
Hüquqşünas Osman Kazımov da vurğuladı ki, baş verən olaylara prokurorluğun qanuni deyil, siyasi qiymət verməsi bu strukturun adına ləkə gətirir:
- Bu cəfəngiyyata, uydurmaya prokurorluğun şərik çıxması qeyri-ciddi addımdır. Burada kifayət qədər təzadlı məqamlar var. Tutalım ilk olaraq Hafiz Hacıyevin hərəkətinə diqqət yetirək. Hazırda Hafiz Hacıyev Elçibəyi Əli Kərimlinin zəhərlədiyini bildirir. Bəs yaxşı, axı Hafiz Hacıyev bir müddət əvvəl Əli Kərimli, Isa Qəmbər və Rauf Arifoğludan atdığı iftiralara görə üzr istəmişdi. Əgər Elçibəylə bağlı belə iГІformasiyası var idisə, niyə üzr istəyirdi? Bu, müxalifətə qarşı bir kampaniyadır. Səbəb də bəsitdir. Əli Kərimli etdiyi kəskin çıxışlarına, verdiyi bəyanatlara görə hakimiyyətin hədəfinə çevrilib. Bu isə hakimiyyəti düşündürür və narahat edir. Eyni zamanda “Azərbaycan saatı” da hakimiyyətin eybəcərliklərini ortaya çıxarır. Bütün bunlara isə hakimiyyət özünə məxsus formada cavab verir.
Əli Kərimlinin 2013-də əsas rəqibləri ola biləcəyini anlayırlar
İslam Partiyasının sədr müavini Rövşən Əhmədov da başqaları ilə razılaşaraq irəli sürülən iddianı iyrənc siyasi oyun adlandırdı:
- Əbülfəz Elçibəyin vəfatından bu çirkin oyunlarda, siyasi mübarizədə istifadə etmək təqdir oluna bilməz. Bu çox iyrənc kampaniyadır. Bu cür mübarizə yaxşı nəticə verməyəcək. Ona görə Hafiz Hacıyev kimi “nadir” şəxsə müraciət olunması təsadüfi deyil. Əli Kərimlinin həm ölkə daxilində, həm də beynəlxalq aləmdə artan nüfuzu onu bu cür təbliğata tuş gətirib. Çünki Əli Kərimli qarşıdan gələn prezident seçkilərində bu hakimiyyətin əsas rəqiblərindən biri olmağa iddialıdır. Elə buna görə də bu cür addımlarla Əli Kərimlinin və onun rəhbərlik etdiyi siyasi təşkilatın fəaliyyətini məhdudlaşdırmağa çalışırlar. Yəni bu sırf 2013-cü il seçkiləri ilə bağlı aparılan bir kampaniyadır. Bu kampaniya isə nə hakimiyyətə, nə də onların əlaltılarına fayda verəcək.
Əli Kərimlinin nüfuzu bu kampaniya ilə daha da artacaq
Azərbaycan Deportasiya Qurbanları Cəmiyyətinin İdarə Heyətinin üzvü Nurəddin Mustafayev da hesab edir ki, hazırda hakimiyyətin sifarişi ilə başladılan kampaniya absurd fikirlərə əsaslanıb:
- Bu iddia ilə çıxış edən şəxsi heç kim ciddiyə almır. Onun bu addımı da hakimiyyətin bu məmləkətdə növbəti oyunu kimi qəbul edilir. Əgər bu addım Əli Kərimlinin nüfuzunu aşağa salmağa xidmət edirsə, əks-proses baş verəcək və AXCP sədrinin reytinqi daha da artacaq. Nə qədər aşağı düşüncə sahibi olmalısan ki, bu cür iddialarla çıxış edəsən. \ azadlıq.info \
