Azərbaycanın idarəçilik sistemində formalaşmış və dərin köklərə malik ən problemli cəhətlərindən biri məmurlar arasında mənafe davasıdır. Vəzifəyə təyin olunan məmur oturduğu kürsünü, kabineti, binanı, idarə etdiyi sahəni az qala şəxsi mülkü hesab edir və bu psixoloji amilin ciddi təsiri altında fəaliyyət göstərir. Təbii ki, buradan da korrupsiya, tayfabazlıq, qeyri-sağlam davranış, mediaya rəqiblər haqqında sifarişlər…
Ramiz Mehdiyev Prezident Administrasiyasının rəhbəri olduğu dövrdə bu amil pik həddə çatmışdı desək, yanılmarıq. Özü intriqalara meylli olduğuna görə, yaxın ətrafının da işi-gücü təkcə dövlətin malını-mülkünü mənimsəmək, insanların dövlətdən və onun rəhbərindən narazılığına səbəb olan əməllər törətmək deyildi, həm də bir-birinə qarşı amansız mübarizə metodlarından istifadə etməklə rəqiblərini sıradan çıxartmaq idi. Düzdür, 2019-cu ilin sonlarından həyata keçirilməyə başlanan kadr islahatları nəticəsində Ramiz Mehdiyev, Əli Həsənov və digərlərinin yaratdığı bu mühitə ciddi zərbə vuruldu. Amma kimsə düşünməsin ki, məsələ bitib və hər şey öz qaydasına düşüb. Belə ki, cumhuriyyet.az olaraq bildirək ki, Mehdiyevin diqtəsi altında işləyən və keçmiş Administrasiya rəhbərinin iradəsinə tabe olan bir çox şəxs hələ də mühüm postlarda oturublar və çox böyük ehtimal ki, hələ də sifarişlər alaraq öz dağıdıcı əməllərini davam etdirirlər.
Məsələn, mediada Xarici İşlər Nazirliyi, bu strukturda çalışan məmurlar, xüsusilə səfirlər haqqında sifarişli yazılar adət halını alıb. Əksər yazılar boş söz yığınından başqa bir şey deyil, hansısa məlum faktların özünəməxsus şəkildə təqdimatıdır. Amma ümumilikdə, bir tərəfdən vəzifəyə yeni təyin olunmuş şəxslərin diskreditasiyasını hədəf götürür, digər tərəfdən də nazirlikdəki mühiti cəmiyyətə olduqca qara rəngdə təqdim edir. Təbii, kimsə də deyə bilməz ki, bu proses idarə olunmur. Görünən odur ki, Mehdiyevin bu idarədə də oturuşmuş və əski ənənələrə sadiq kadrları hələ uzun müddət ölkənin ab-havasını korlamaqda davam edəcəklər.
2012-ci ildə Seymur Fətəliyev Prezident Administrasiyasının Humanitar siyasət məsələləri şöbəsinin müdir müavini təyin olunanda onu çox az adam tanıyırdı və 1973-cü il təvəllüdlü bu gənc kadrın birdən birə yüksək vəzifəyə irəli çəkilməsi çoxlarında sual doğururdu. Bununla bbağlı cumhuriyyet.az bildirir ki, 1995-ci ildə Xarici İşlər Nazirliyində əmək fəaliyyətinə başlayan bu şəxs nə Azərbaycanın Fransadakı səfirliyində, nə ölkəmizin UNESCO yanında Daimi Nümayəndəliyində, nə də XİN Dövlət protokolu idarəsində işlədiyi dövrdə xüsusi heç nə ilə yadda qalmayıb və sanki güclü bir əl onu pillədən pilləyə irəli aparıb. Buna görə də nəzərlər Seymur Fətəliyevin atası Həbib Fətəliyevin Administrasiya rəhbəri Ramiz Mehdiyevlə şəxsi əlaqələrinə yönəldi. Vaxtilə Bakı şəhər İcraiyyə Komitəsinin sədr müvini, Nizami Rayon Partiya Komitəsinin birinci katibi, sənaye naziri, KP MK-da təlimatçı olmuş, hətta 1991-1999-cu illərdə Bakı ŞİH başçısının birinci müavini vəzifəsində çalışmış H.Fətəliyevin Ramiz Mehdiyevlə çox yaxın münasibətləri olub. Həbib müəllim 1999-cu ildə vəfat etsə də, onun Administrasiya rəhbəri ilə dostluq əlaqələri oğlu Seymur Fətəliyevin sürətli sıçrayışında mühüm rol oynamışdı.
Həmçinin, Seymur Fətəliyevin bacısı Sevinc Fətəliyeva 2020-ci il parlament seçkilərində üçüncü dəfə qanunvericvi orqana deputat seçilmişdi. Deyilənlərə görə, onun ardıcıl şəkildə üç çağırış Milli Məclisin deputatı seçilməsində də Ramiz Mehdiyevin böyük rolu olub. Nə qədər olmasa da, keçmiş Administrasiya rəhbəri qanunverici orqanın formalaşmasında az rol oynamırdı və öz adamlarını rahatca ora yerləşdirə bilirdi.
S.Fətəliyev Prezident Administrasiyası Humanitar Siyasət məsələləri şöbəsinin müdiri, Ramiz Mehdiyevə çox yaxın kadrlardan olan Fatma Abdullazadənən rəhbərliyi ilə ölkəmizdə hər il keçirilən Humanitar Forumların təşkili məsələlərinə məsul olub. Şöbədə bu məqsədlə xüsusi bölmə də yaradılmışdı və S.Fətəliyev həmin bölməyə rəhbərlik edirdi. İldən ilə keçirilən bu forumların təşkilinə büdcədən milyonlarla vəsait ayrılıb, qonaqların dəvət olunması, onların uçuş, otel, qida, gəzinti xərclərinə ciddi vəsait sərf olunub. Amma təbii ki, ənənəyə sadiq qaydada – qiymətlər şişirdilib, adı olub özü olmayan bir sıra işlərə görə külli-miqdarda vəsait silinib və mənimsənilib. Təbii ki, cənab Fətəliyev də bu prosesdə çox yaxından iştirak edib.
Mehdiyev öz kadrlarını irəli çəkmək, həm hakimiyyətin, həm də cəmiyyətin qarşısında onların müsbət imicini formalaşdırmaq üçün heç vaxt səylərini əsirgəməyib. Rəsmi tədbirlərdə iştirak, mediada poz vermək köhnə ideoloji təbliğatın bir üsulu hesab olunsa da, ictimaiyyət bu şəxsləri tanıyır və sözsüz ki, onlarla hesablaşırdı. Məsələn, 2017-ci ildə Adminsitrasiya rəhbərliyi “Quba şəhərində “Soyqırımı memorial kompleksi” ilə bağlı bəzi məsələlər haqqında” sərəncamında imzalamışdı və PA İctimai-siyasi şöbənin müdiri Əli Həsənov komissiyannı sədri təyin olunmuşdu. Komissiyada Milli Elmlər Akademiyasının vitse-prezidenti, deputat İsa Həbibbəyli, AMEA Tarix İnstitutunun direktoru, deputat Yaqub Mahmudov, Dini Qurumlarla iş üzrə Dövlət Komitəsinin sədri Mübariz Qurbanlı, mədəniyyət və turizm nazirinin birinci müavini Vaqif Əliyev və digərləri ilə yanaşı, Prezidenti Administrasiyasının Humanitar siyasət məsələləri şöbəsi müdirinin müavini Seymur Fətəliyev də təmsil olundu. Adları sadalanan bu şəxslər bu və ya digər şəkildə Mehdiyevin adamları kimi tanınırlar və onların sırasında cənab Fətəliyevin də yer alması, heç təəccüblü deyil.
2014-cü ildə S.Fətəliyev “Dövlət qulluğunda fərqlənməyə görə” medalı ilə də təltif edilib. İnsanlar illərlə işləyib bu mükafata layiq bilinmədiyi halda Fətəliyev kimilərinin qısa zamanda “fərqlənməsi” sıradan iş deyil, çox yaxşı təqdimatın nəticəsidir. Bu təqdimatı da kim verə bilər?
Amma çox maraqlıdır ki, 2017-ci ildə Fatma Abdullazadənin başının üzərini qara buludlar alandan və o Prezident Administrasiyasının şöbə müdiri vəzifəsindən uzaqlaşdırıdıqdan bir az sonra Seymur Fətəliyev XİN Beynəlxalq İnkişafa Yardım Agentliyinin (AİDA) rəisi vəzifəsinə təyin olundu. Hansı xidmətlərinə görə Fətəliyevi bu vəzifədə yerləşdirən güclü əl bu dəfə də onu darda qoymadı, bir pullu yerdən o biri pullu yerə göndərdi? Bunu Ramiz Mehdiyein AİDA-nın vəsaitlərinə nəzarəti ələ keçirmək istəyindən başqa heç nə ilə izah etmək mümkün deyil. Təbii ki, bu vəzifəyə də etibarlı, sınanmış bir şəxsin təyin olunması zəruri haldır.
AİDA-ya rəhbərliyi dövründə Seymur Fətəliyevin hansı işlərlə məşğul olması, vəsaitlərin hansı istiqamətlərə yönəldilməsi, Mehdiyevin planlarını necə icra etməsi ayrı bir mövzudur. Bəlkə elə buna görədir ki, 2020-ci ilin iyulunda Elmar Məmmədyarov nazir postundan uzalqaışandan və bu vəzifəyə Ceyhun Bayramov təyin olunandan sonra AİDA-nın təftiş ediləcəyini gözə alan Seymur Fətəliyev ciddi cəhdlə Azərbaycanın Fransadakı səfiri vəzifəsinə təyinat almağa çalışıb. Nə qədər olmasa da, vaxtilə bu ölkədə səfirlikdə işləyib və uzun dövrdən sonra “ağ at belində” köhnə məskənə qayıtmaq bir o qədər də pis perspektiv deyil. Üstəlik, AMEA prezidenti vəzifəsində oturmuş Mehydiyevin də bu təyinata ciddi dəstək verdiyi barədə məlumatlar var. Amma…
Plan baş tutmadı və S.Fətəliyev 2021-ci il avqustunda xüsusi tapşırıqlar üzrə səfir – UNESCO üzrə Azərbaycan Respublikasının Milli Komissiyasının Baş katibi vəzifəsinə təyin olundu. Görünən odur ki, həmin dövrdə artıq mövqeləri ciddi sarsınmış və bir müddət öncə istefa ərizəsi yazmış akademikin güclü əli bu dəfə onun yardımına çata bilmədi.
Bu gün bizim dərdimizdən biri də işğaldan azad olunmuş ərazilərdə minlərlə mədəniyyət abidəmizin dağıdıldığı halda, UNESCO-nun Azərbaycanda guya “dağıdılmış xaçkar” axtarmasıdır. İşğaldan azad olunmuş ərazilərdə kütləvi məzarlıqların aşkarlanması istiqamətində nə bu təşkilatın, nə də digərlərinin heç bir iş görməməsidir. Zatən Milli Komissiyamızın baş katibi də qeybə çəkilmiş kimidir. Nə özü görünür, nə də səsi çıxır. Məlumatlı mənbənin cumhutiyyet.az-a bildirdiyinə görə Saat 11.00-da işə gəlir, 17.00-da otboy verilən kimi də qeybə çəkilir. Amma digər işlərə vaxt ayıra bilir.
Cənab Fətəliyev XİN sistemində xoşu gəlməyən şəxslər barədə materiallar hazırlayıb mediaya göndərməklə məşğuldur. Hədəfdə səfirlər, digər vəzifəlilər var. Ola bilər ki, bu, hələ də öz ambisiyalarını cilovlaya bilməyən “güclü əlin” sifarişləridir, həmçinin, məsələnin arxasında Fərzəliyevin öz şəxsi maraqları da dayana bilər. Amma həqiqət budur ki, adam başını quma soxub elə bilir ki, heç kim heç nə görmür. Özü Mehdiyevin kadrı ola ola, digərlərini keçmiş Administrasiya rəhbəri ilə “işbirliyində”, “onun sifarişlərini icra etməkdə” günahlandırır.
Şüşəli evdə oturub başqalarına daş atmaq budur, yoldaş Fətəliyev. //www.cumhuriyyet.net//
