Oğuz sakini Valehova Aygün Tacət qızının ailəsindən "İrşad” dükanından aldığı məhsulları qaytardıqları halda məhsulun məbləğindən 3 dəfədən çox bir məbləğ ödəmə tələb olunur.
Ailə 2021-ci ilin martın 10-da Qəbələdə yerləşən "İrşad” mağazasından 10 yaşlı oğlu üçün bir noutbuk, bir qulaqcıq, bir kompüter çantası, bir kompüter siçanı və bir ədəd də "Wi-Fi" aparatını kreditlə alıb.
Aldıqları məhsulları götürərkən imzaladıqları müqavilənin şərtlərinə əsasən, müştəriyə məhsullarla bağlı hər hansı bir narahatlıq olarsa, 14 gün müddətində məhsulu geri qaytarmaq və ya dəyişmək imkanı verilir. diaaz.space-ın məlumatına görə, musiqi müəlliməsi olan Aygün Valehova "Arqument.az"a deyib ki, "İrşad Elektroniks"dən aldıqları "Wi–Fi" aparatı Oğuz ərazisində işləməyib. Proqramçı və usta deyib ki, bu aparat Oğuz üçün uyğun deyil. "Noutbuk"un isə ekranı ağ-qara açılıb, işləməyib. Ailənin noutbuka 2 dəfə proqram yüklətməyi də bir işə yaramayıb.
Ailə 16 mart 2021-ci il tarixində 6 gün sonra vəziyyətdən dolayı şirkətə müraciət edib, məhsullar barədə məlumat verib. "Noutbuk" və "Wi-Fi" aparatını geri qaytarıb dəyişdirmək istədiklərini desələr də, şirkətin əməkdaşları razılaşmayıblar. Əlacsız qalan ailə ödəniş etməkdən imtina edib.
Aygün Valehova aldıqlarından 3 məhsul – qulaqcıq, çanta və kompüter siçanını saxlayıb qalan məhsulları qaytarsa da, onların əsas borc hissəsi 1636.2 manat azaldılmayıb, olduğu kimi saxlanılıb. Yəni müştəri hətta "İrşad"a geri qaytardığı məhsullara görə də ödəniş etmək məcburiyyətində qalıb.
Məqsəd məhsul satmaqdır, ya xarab məhsullardan gələn ziyanı günahsız vətəndaşa ödətmək?
Sənədlə tanış olan ailə etiraz edib. İlk dəfə məsələ ilə bağlı şirkətə müraciət zamanı Valehovlar ailəsi bildirib ki, məhsul xarabdır, onu dəyişdirsinlər, bir neçə yüz manat baha olsa belə olar. Əsas odur ki, məhsul yararlı olsun, boş yerə pul ödəməsinlər. Amma maraqlıdır ki, şirkət bu məsələyə laqeyd yanaşıb, ailənin bu təklifinə belə razı olmayıblar.
Onlar deyiblər ki, ailənin böyük oğlu II Qarabağ müharibəsinin qazisidir. O, narahat vəziyyətində anası ilə Qəbələdəki ofisə gedərək vəziyyəti izah edib, kömək istəyib, amma işçilər onunla kobud rəftar ediblər. O zaman belə bir sual yaranır ki, məqsəd nədir, həm suçlu, həm güclü davranışın arxasında nə durur?
Yerli olmaq qanunu pozmağa haqq verirmi?
Bir il keçən müddət ərzində şirkət ailədən heç bir ödəniş, ya da ödənişi gecikdirməmək tələbi qoymadığı halda 2-3 ay öncə şirkətin hüquqşünası ailə ilə bir dəfə əlaqə yaradıb.
Bildirib ki, onların borcu 1636,2 manat əsas borcun üzərinə gecikdirilmiş günlərə görə hesablanmış 2454 manat cərimə məbləği ilə birlikdə 4090,2 manat təşkil edir.
Əlaqə yaradan şəxs "İrşad Electronics" MMC-nin hüquq şöbəsinin müdiri İsmayıl İsmayılbəyli olub. Bir neçə gün öncə isə hüquqşünas ailə ilə əlaqə yaradaraq təkrar bildirib ki, qısa zamanda borcun hamısını ödəməlidir. O, işin məhkəmədə olduğunu deyib. Bildirib ki, əgər ödəniş etməzlərsə, borc məhkəmə qərarı ilə birbaşa müəllimə Aygün Valehovanın maaş kartına yönləndirilib ordan çıxılacaq.
Ailə etiraz edincə, hüquqşünas özünün də oğuzlu olduğunu deyərək bildirib ki, rəhbərlikdən xahiş edib fazi borcunu sildirəcək, amma nəticə dəyişməyib: "Əgər qanun qanundursa, imzalanıb, təsdiqlənib, ailəyə borc haqqında məlumat verilibsə, bəs o qanunu şirkət niyə özü pozur ki? Pozacaqdısa, qanunu niyə qoyub? Yoxsa şirkət üçün hüquqşünasın öz yerlilərinə hörmət etmək istəyi 3000 manata qədər məbləğdə şirkətin ziyana düşməsindən daha dəyərlidir? Bəlkə də, "İrşad" əslində xeyirxahlıq abidəsidir, sadə vətəndaşlar onu dəyərləndirənmir?"
Məhkəmə qərarının adı var, özü yox
Ailədən borcu tələb etsələr də, məhkəmə qərarını təqdim etməyi vacib saymırlar. Valehovlar ailəsi hüquqşünasdan məhkəmə kağızını tələb etsə də, aldıqları cavab ya "hələ kağız məhkəmədədir, iki həftə gözləyin, gələr, ya da gəlməzsə,özünüz müraciət edib məhkəmədən alarsınız" olub.
Arqument.az "İrşad Elektroniks"in Qəbələdəki ofisindən məsələyə münasibət ala bilməyib.
"İrşad Elektroniks"in baş ofisindən Murad adlı şəxs "Arqument.az"a bildirilib ki, müştəri özü baş ofisə yaxınlaşıb problemi bildirməlidir: "Son qərara görə onun götürdüyü avadanlıqlar dəyişdirilə bilər. Yaxşı olar ki, müştəri özü zəng etsin və ya ofisə yaxınlaşsın".
