Son vaxtlar aktual olan mövzulardan biri də yas mərasimlərində ehsan verilməsi ilə bağlıdır.

Ümumiyyətlə, hər zaman ölkəmizdə yas mərasimlərində ehsan verilib. Ancaq bu gün həmin proseslə bağlı yaranan müzakirələrin səbəbi isə son illərdə bir sıra yas mərasimlərində dəbdəbəli şəkildə ehsanların verilməsidir.

Belə ki, imkanlı ailələr yas mərasimlərində bu cür dəbdəbəli ehsan təşkil etdikcə imkansız ailələr də məcbur olub ehsanı belə verməli olurlar. Bu isə imkansız ailələr üçün problemlər yaradır.

Məhz bu baxımdan son vaxtlar yas mərasimlərində ehsanların dəbədəbəli şəkildə verilməsinin ləğvi ilə bağlı fikirlər səsləndi. Nəticədə isə hazırda ölkənin 10 rayonunda belə ehsan mərasimlərin verilməsi ləğv edilib.

Ancaq bu proses Bakıda olduğu kimi qalır. Onu da qeyd edək ki, ehsan zamanı təqdim edilən ərzaqlar da baha qiymətədir. Xüsusilə də ətin qiyməti getdikcə bahalaşır ki, paytaxtda mal ətinin qiyməti 15,50 manatdır.

Maraqlıdır, yas mərasimlərində israfçılığın qarşısının alınması, təmtəraqlı ehsan süfrələrinin ləğv edilməsi, ətin qiymətində ucuzlaşmaya gətirib çıxara bilərmi?

Məsələ ilə bağlı iqtisadçı-ekspert Akif Nəsirli "Cebheinfo.az"-a bildirib ki, bu proses nə ətin qiymətinə təsir edən bir məsələdir, nə də ictimai qaydada təsiredici vasitədir:

"Eyni zamanda cəmiyyətdə narazılıqlara səbəb olur. Niyə toy mərasimlərində, şənliklərdə belə bir qadağa qoyulmur, ancaq yas mərasimlərinə şamil edilir? Toy şənliklərində vətəndaşlar spirtli içkilər qəbul edib daha çox yeyirlər.

Yas mərasimlərində isə insanlar toplaşıb hərə bir tikə ehsan yeyir. Bununla da məsələ bitir. Orada toydan fərqli olaraq israfçılıq olmur. Burada şişirdilmə var. Pandemiyadan sonra belə bir təcrübə yaranıb. Yas yerində günorta yeməyinə qalanların sayı çox az olur.

Bakıda bir qayda olaraq ehsan verilir, vətəndaşlar ehsan yeyir. Ancaq rayon yerlərində belə deyil. Səhər saat 11-dən əhali gəlib, 1 stəkan çay içib, başsağlı verib gedir. Günorta əsasən uzaq yerdən gələnlər, yaxud orada çalışan insanlar yemək yeyirlər.

Hesab edirəm ki, yas mərasimləri ilə bağlı xüsusi bir normativin qoyulması nə məqəsəduyğun deyil, nə də ətin qiymətinə heç bir dəxli yoxdur. Ölkədə eyni vaxtda neçə yas olur ki, ətin qiymətinə təsir etsin?

Hesablayanda çox aşağı bir rəqəmdir. Onun ətin qiymətinə heç bir təsiri ola bilməz. Yasa gələn vətəndaş əti evində deyil, gəlib orada yeyir. Orada yeməsəydi gedib evində yeyəcəkdi".

Ekspertin sözlərinə görə, ölkədə ətin qiymətinin baha olmasının səbəbi heyvandarlığın küncə sıxışdırılmasıdır:

"Eləcə də örüşlərin heyvanların əlindən alınmasıdır. Ona görə də ət istehsalı aşağı düşür və ət bahalaşır. Bunun sadə bir səbəbi var. Bu səbəbi aradan qaldırmaq lazımdır.

Heyvandarlıq sahəsinə dəstək vermək lazımdır. Bu gün bitkiçiliyin bütün sahələrinə subsidiya verirlər. Ancaq heyvan saxlayanlara subsidiya verilmir. Buna heç münbit şərait də yoxdur.

Çünki heyvanların identifikasiya, sistemdə qeydiyyat məsələsi var. O proses başlanılıb, ancaq çox zəif gedir. O proses getməlidir ki, heyvanlar qeydiyyatda olsun, onların saxlanması qanuniləşsin və ona uyğun da hökumətin hər hansı subsidiyası olsun. Ancaq bu proses hazırda çox ləng gedir".