Paytaxtda səki problemi bitmir. Hansısa küçədə səkilər abadlaşanda sakinlər, piyadalar sevinir. Ertəsi gün başqa bir küçədə səkinin zəbt edildiyi görünür. Yeni tədris ili başlamamış Yasamal rayonu, Məmməd Rahim küçəsi abadlaşdırıldı. Bu küçədə Texniki Universitet və Memarlıq və İnşaat Universitetləri yerləşir. Tələbələr də, piyadalar da sevindi ki, nə yaxşı, yol da, səki də abadlaşdı.
Demə, məqsəd başqa imiş. Səkini ona görə abadlaşdırırmışlar ki, kafe açsınlar. Həm də səkinin hesabına. Hazırda bu küçə boyunca bir neçə yerdə köşklər qoyulub. Təkərlisi də var, təkərsizi də. Ayaqüstü qəlyanaltı xidməti göstərir köşklər. Dönər, hamburger, qəhvə, çay, “İstanbul pilav”, “noxudlu pilav”... Köşklərdən birinin işlədicisi isə gələcəyə hesablanmış addım atıb. Böyründəki digər köşkün kölgəsində, hələlik çox da aşkar görünməyən masa və oturacaqlar qoyub, xidmət göstərir. Bəllidir ki, icazəsiz bunu etmək qeyri-mümkündür. Küçə ticarəti ilə bağlı bəlli qaydalar var. Məsələn, bir neçə gün öncə Sumqayıt şəhərində yerli İcra Hakimiyyəti küçə ticarətiylə məşğul olanları möhkəm “danladı”. Səkilərdəki, yol kənarındakı ticarət köşklərini, piştaxtaları silib-süpürüb atdılar. Qayda-qanun yaratdılar. Bəs Bakıda, şəhərin mərkəzində səkidəcə kafe açmağa kim, hansı qurum icazə verir? Kimdir bu səkinin sahibi?
"DİA-AZ" qeyd edir ki, Yasamal rayonu ərazisində səkilər təbii olaraq Yasamal rayon İcra Hakimiyətinin balansındadır. "Bakı şəhərində və ətraf ərazilərdə nəqliyyat infrastrukturunun təkmilləşdirilməsinə dair 2025-2030-cu illər üçün Dövlət Proqramı"nın təsdiq edilməsi haqqında Azərbaycan Respublikası Prezidentinin 30 yanvar 2025-ci il tarixli 456 nömrəli Sərəncamına əsasən (Tədbirlər Planının 8.1.6.7-ci bəndinə uyğun olaraq) Bakı şəhərində piyadaların maneəsiz hərəkətinin təmin edilməsi məqsədilə küçə və prospektlər üzrə səkilərin mövcud vəziyyətinin araşdırılması, normativ sənədlərin tələblərinə uyğun səkilərin (panduslarla birgə) inşası, o cümlədən mövcud səki hissələrinin zəbt edilməsi hallarının qarşısının alınması üçün zəruri tədbirlərin görülməsi Bakı Şəhər İcra Hakimiyyətinə həvalə edilmişdir”. Belə! Deməli, səkiyə bir süpürgə də qoymaq olmaz, əgər İcra Hakimiyyətinin razılığı yoxdursa. BŞİH görəsən, Məmməd Rahim küçəsindəki vəziyyəti görmür, xəbəri yoxdur? Xəbəri yoxdursa, deyirik, bildiririk. Amma əgər BŞİH-nin razılığı varsa, o zaman məlum sərəncamı bir daha xatırlasınlar. Amma bilirik ki, BŞİH başında Elşad Həsənovun dayandığı Yasamal RİH-ə bu səbəbdən dəfələrlə xəbərdarlıq edib. Görünəni odur ki, xəbərdarlıqlar da yetərli deyil.
Lakin istənilən halda dövlət istənilən xaosun qarşısında öz varlığını hiss etdirmək zorundadır.
