Dünən xalq artisti, sevilən sənətkar Ağaxan Salmanlının 80 yaşı tamam oldu. Ötən il itirdiyimiz aktyora çox təəssüf ki, yubileyini qeyd etmək nəsib olmadı. Sənətkarın sənət dostları, Gənc Tamaşaçılar Teatrının aktrisaları Zemfira Əbdülsəmədova və Simuzər Ağakişiyeva doğum günündə aktyoru xatırlayıblar.
Aktrisa Zemfira Əbdülsəmədova Moderator.az-a açıqlamasında Ağaxan Salmanlının əvəzsiz tərəf müqabili olduğunu deyir.
“Ağaxan müəllim teatr üçün yanan bir sənətkar idi, teatrı çox sevirdi, onunla nəfəs alırdı. Teatr haqda kimsə ona mənfi bir söz söyləsəydi acığı gələrdi, o dərəcədə teatrı qoruyurdu. Rejissor kimi bir əsər götürdü işləməyə və orada da mənə əsas rollardan birini verdi. Biz ər-arvad obrazlarını oynayırdıq. Digər rollarda da rəhmətlik Almaz Mustafayeva, xalq artisti Yasin Qarayev və Elnur Hüseynov oynayırdı. Biz bu tamaşanı hazırlayıb, bir neçə dəfə oynadıq. Mənə deyirdi ki, sənin potensialın var, tamaşalarda oyna. Dedim ki, sizinlə səhnəyə çıxmaq, eyni səhnəni bölüşmək mənə şərəfdir. Mən çox xoşbəxtəm ki, elə bir insanla, sənətkarla işləmişəm, tərəf müqabili olmuşam. O qədər saf, təmiz, təmənnasız insan idi ki. Adam onunla danışanda çox yaxşı olurdu, gözəl bir aurası var idi, onun yanından getmək istəmirdik, istəyirdik elə söhbət edək, danışaq. Çünki təmiz ruhlu adam idi. Bir az da əsəbi idi, bəlkə də çox tez getməyinə səbəb elə əsəbiliyi oldu. Tez əsəbləşib, özündən çıxırdı, haqsızlığı götürmürdü. Onun ölümünə çox heyfslənirəm, tək mən yox, elə hamı” deyə aktrisa Zemfira Əbdülsəmədova deyib.
Aktrisa sənətkarla sonuncu görüşünü belə xatırlayır.
“Ölümündən bir gün əvvəl nəvəsinin toyunda iştirak etdik, özü də çox şık geyinmişdi. Gözəl, yaraşıqlı görünürdü, heç o yaşı vermək olmazdı ona. Şux gəzirdi, toyda bolluca rəqs də etdi. Səhər o acı xəbəri eşidəndə dəli olduq, dedik ki, bu nə müsibət, dəhşətdir?! Heyf! Sadəcə heyf Ağaxan müəllimdən. Yaşının çox olmasına baxmayaraq enerjisi, sənətə, teatra olan sevgisi, münasibəti tükənməz idi. Bizə elə gəlirdi ki, o heç vaxt yorulmaz, heç vaxt ölməz. Ruhun şad olsun sənətkar” deyə aktrisa bildirib.
Aktrisa Simuzər Ağakişiyeva isə yaş fərqlərinin olmasına baxmayaraq aktyorla yaxın dostluq əlaqələrinin olduğunu bildirib.
“Ağaxan müəllim mənim ən yaxşı dostlarımdan biri, bəlkə də birincisi idi. Onun sənəti haqqında mən danışa bilmərəm, çünki buna ixtiyarım yoxdur. Mən onun insanlığı, dostluğu haqda danışmaq istəyirəm. Aramızda yaş fərqi çox olsa da biz dostluq edirdik. İnsan onunla danışanda, dərdini bölüşəndə o qədər yüngülləşirdi ki. Adama o qədər dəyər verirdi ki. Onun yanında günahkar idim deyim ki, problemim var. O dəqiqə gedib həmin problemi həll edərdi. Çox xoşlayırdı ki, gənclərə yol açsın, onlara imkan-şərait yaratsın. Hamıya görə ağız açırdı ki, filankəs, buna filan köməklik edək. O belə şəxsiyyətlərdən idi. Bir tikə yeməyi olardı, deyərdi ki, gəl mənimlə çörəl kəs. Yumor hissi də güclü idi. Bir dəfə birlikdə böyük bir tədbirə getmişdik, maşınla aparıb onu evə düşürtdüm. Dedi ki, mütləq mənimlə evə gəlib, çay içib, sonra gedəcəksən. Dedim ki, ay Ağaxan müəllim, bütün günü birlikdə olmuşuq. Nəysə, çox israr edəndən sonra evə gəldik. Çay istəyəndə həyat yoldaşı dedi ki, qaz kartında məbləğ yoxdur. Ona görə də qaz yoxdur. Ağaxan müəllim yenə də zarafatı ilə vəziyyətdən çıxdı. O dəqiqə dedi ki, Sima, hə, çayını içdin? Dur çıx get (gülür). İndiyə qədər onun bu sözünü deyib-gülürük. Onun itkisi məni o qədər yandırdı ki. Düzdü, gənc deyildi, amma mənə elə gəlir ki, onu daha tez itirdik” deyə aktrisa bildirib.
Aktrisa bildirib ki, sənətkar avtobusda dünyasını dəyişib.
“Nəvəsi Ləmanı xüsusi çox istəyirdi, bizi də onun toyuna yığdı. Qürurlu, həyəcanlı, bir o qədər də narahat idi. Çox gözəl, möhtəşəm toy keçdi. Cani-könüldən biz də toyda iştirak etdik. Toydan gəldik, gecə saat 3-ə kimi onunla danışdım. Amma səhəri elə pis bir xəbərlə açdıq ki (ağlayır). Sən demə, səhəri gün nəvəsigilə gedəndə avtobusda ürəyi tutub, elə orada da qalıb. Ağaxan müəllimin adı gələndə mən elə pis oluram ki, haldan-hala düşürəm, gözümün yaşını saxlaya bilmirəm. Dost itirmək o qədər ağırdır ki! Mən bir müddət özümə gələ bilmədim. Nə vaxt görürdüm onu, deyirdim ki, Ağaxan müəllim, gəlin bir şəkil çəkdirək (gülür). O da uğunub gedirdi. Komik olduğu qədər də ciddi insan idi. Rejissor kimi tamaşa hazırlayanda ixtiyarım yox idi ki, 2 dəqiqə məşqə gecikim. 2 dəqiqə geciksəydim mənim canımı alardı. Camaatın içində bilirsiniz mənə nələr deyərdi? Deyirdi ki, dostluğumuz öz yerində, amma məşqə gecikmə. Elə sənətkar var ki, onun haqda 2 kəlməni güc-bəla ilə tapıb, deyirsən, amma Ağaxan müəllim haqda saatlarla danışmaq olar” deyə aktrisa bildirib.
