Bərdə rayon Mərkəzi Xəstəxanasını bir növ uçuruma sürükləyən baş həkimin idarəçiliyi də, hal-hazırda tam əksəriyyəti düşündürməkdədir. Belə ki, İftixar həkimin rəhbərliyinə “vida” deyildikdən sonra, hər kəs düşünürdü ki, baş həkim “post”una sahiblənən Rəna xanım Mustafayevanın idarəçiliyinə əksəriyyət qibtə edəcək. Amma, atalar demişkən “sən saydığını say, gör fələk nə sayır” deyimi, çox keçmədi ki, Bərdə səhiyyəsində özünü təsdiqlədi. Belə ki, o, qısa zaman kəsiyində elə addımlarını atdı ki, rayonun səhiyyə ocaqlarında baş alıb gedən haqsızlığı, anarxiyanı, süründürməçilik amillərini və s. görən hər kəs, Rəna xanımın sələfinin dünyadan köçənlərinə sanki min rəhmət də oxudular. Bunun başlıca səbəbi, yuxarıda qeyd etdiyimiz kimi rayonun səhiyyə ocaqlarında bənzəri olmayan anarxiyanın, soyğunçuluq və rüşvətxorluq amillərinin tüğyan etməsi ilə bərabər, imkansız xəstələrə bəslənilən ögey münasibətlərin də varlığı oldu. Adı çəkilən rayonun səhiyyə ocaqlarında yaşananlar haqda “Gündəm Xəbər”i məlumatlandıran və hələlik adının çəkilməsini istəməyən Bərdə rayon sakini bildirir ki, “MRX-a baş həkim təyin olunan Rəna xanım, ixtisasca sanitar-gigiyena üzrə mütəxəssisdir. Onun belə bir ixtisasa sahib olması və baş həkim vəzifəsini daşıması, hüquqi baxımdan heç cür yolverilməzdir. Amma, nə etmək olar? Bu gün o, baş həkim vəzifəsini daşıyır və bir kimsə də ona “qaşın üstə qara var” deyə bilmir. Yəqin ki, bunu da özəl səbəbləri var. Düzdür, onun baş həkim vəzifəsini daşıması ciddi qanun pozuntusu olsa da, amma onu da unutmaq olmaz ki, bu gün Azərbaycan səhiyyəsində qanunsuzluğu qanuniləşdirən amillər də var. Çox böyük ehtimalla ki, belə bir amillərin varlığı da ona belə bir səlahiyyət sahibi olmağa imkan verib. Bir məqama da toxunaq ki, Bərdə MRX-da baş alıb gedən bir çox qanunsuzluqların kökündə, vaxtilə İftixar həkimin atdığı addımlar da durur. Yaşanan olaylar haqda məlumatları “Gündəm Xəbər”ə çatdıran şəxsin bildirdiyinə görə “sabiq baş həkim daşıdığı vəzifəsi ilə “saollaşdıqdan” sonra, mərkəzi xəstəxananın balansına aid olan ərazidə o, özü üçün qeyri-qanuni “Ömürdən pay” klinikası inşa etdirdi və “əlini” də adı çəkilən klinikanın üstünə qoydu. İftixar həkim marağına uyğun belə bir addım atıb “Ömürdən pay” klinikasını ərsəyə gətirməklə, əslində MX-nın balansında olan ərazinin ömrünə qənim kəsildi. Diqqəti cəlb edən hal odur ki, vaxtilə baş həkim vəzifəsini daşıyan bu şəxsin, mərkəzi xəstaxananın balansında olan ərazini “işqal etməsi” qalsın bir yana, hətta xəstəxanaya aid əksər avadanlıqları, xüsusilə də müəyyən gücə malik generatoru ələ keçirməsi də, onun qol qoyduğu qanunsuzluq əməllərindən biridir. Yaşananlarla bağlı “Gündəm Xəbər”i məlumatlandıran şəxs onu da bildirir ki, “sabiq baş həkim əyri yollarla ələ keçirdiyi bir çox avadanlıqları, xüsusilə də generatoru bu gün, birbaşa MX-nın balansındakı ərazinin ömrünə qənim kəsilən “ÖMÜRDƏN PAY” klinikasında istifadə etdirməkdədir. Faciə odur ki, xeyli müddət bundan əvvəl baş həkim “post”una sahiblənən Rəna xanım isə, bu gün də olub keçənlərə susmaqda davam edir. Adətən “susmaq razılıq əlamətidir” deyiblər.
Bugünkü baş həkimin susduğu anlardan biri də, Bərdə MRX-da həkim işləyən, eyni vaxtda və eyni zamanda “Ömürdən pay” klinikasında da rəhbərliyi həyata keçirən Elnur həkimin, iki ştatda vəzifə sahibi olmasıdır. Onun belə bir addımı atmasında, sözsüz ki, Rəna xanımın “hə” deməsi də əsas önəm daşıyır. Redaksiyamızı məlumatlandıran şəxs onu da vurğulayır ki, MX-nın ərazisinin bir hissəsinə və əksəriyyətin isə, sanki ömürünə qənim kəsilən “Ömürdən pay” klinikasında rəhbərliyi həyata keçirən Elnur həkim, Bərdə MRX-a işə getmədən əmək haqqı da ala bilir. Bu da hər ay müəyyən məbləğdə büdcə vəsaitinin ələ keçirilməsi və qanunsuz yolla mənimsənilməsi olur. Məlumatlı mənbənin bildirdiyinə görə, hələ bir müddət bundan əvvəl ölkə rəhbəri cənab İlham Əliyev Bərdə rayonuna səfər edərkən, rayonun bir çox sahələrində olur və bir neçə obyektlərin açlışında da iştirak edir. O, rayonun səhiyyə müəssisələrinə baş çəkərkən, Bərdə səhiyyəsinə bu gün başbilənlik edənlər tezbazar “Ömürdən pay” klinikasının ətraf ərazisini müəyyən vasitələrlə örtürlər ki, görünməz olsun. Onların belə bir addım atmalarına səbəb, yuxarıda qeyd etdiyimiz kimi, İftixar həkimin qeyri-qanuni olaraq Bərdə MRX-nın balansına olan ərazidə klinika tikdirməsi olur. Yəqin ki, adı çəkilən klinikanın vaxtilə gizlədiləməsi səhiyyə naziri cənab Oqtay Şirəliyevin diqqətini də cəlb edəcək və bununla bağlı müəyyən araşdırmaların aparılmasına o, lazımi göstərişlərini də verəcək. Rəna xanım Mustafayevanın mərkəzi xəstəxanaya rəhbərlik etməsi qanunla qadağan olunsa da, bu gün o, yenə də baş həkim vəzifəsini daşımaqdadır. Bərdə MRX-da çalışan həkimlərdən bir neçəsinin isə, digər rayonların mərkəzi xəstəxanalarında çalışmaları və belə bir addımlarının qarşılığında işə gəlmədən əmək haqqı almaları da, daxil olan məlumatlardandır. Rəna xanımın yarıtmaz idarəçiliyi haqda bir çox məlumatları redaksiyamıza çatdıran sakinlər isə bildirirlər ki, “bu gün Bərdədə təxminən 1400 nəfərdən çox şəxs güzəştli kateqoriyaya aid olan xəstələrdirlər. Baxmayaraq ki, Səhiyyə və Maliyyə Nazirliklərinin 27 fevral 2007-ci ill tarixli birgə əmrlərinə əsasən, dövlət səhiyyə müəssisələrində 141 adda dərman pulsuz olaraq, qeydiyyatda olan güzəştli xəstələrə verilməlidir. Bundan əlavə, Səhiyyə Nazirliyinin 2005-ci il tarixli 141 nömrəli əmrinə əsasən, səhiyyə ocaqlarının bütün şöbələrində təcili tibbi yardım üçün 60 adda dərman və 23 adda tibbi ləvazimatlar sakinlərə verilməli və tibb məntəqələrində mütləq şəkildə də olmalıdır. Amma təsdiq olunmuş əmrlərə baxmayaraq, Rəna xanım Mustafayevanın baş həkimi olduğu MRX-da heç bir sakinə pulsuz dərmanlar və verilməli olan ləvazimatlar verilmir. Onların bildirdiklərinə görə, baş həkim kənd tibb məntəqələrinə, həkim ambulatoriyalarına və s. müxtəlif dərman preparatları və ləvazimatları yazdırsa da, o, səhiyyə ocaqlarına heçnə verdirmir. Hələ onun dəftərxana ləvazimatlarına, ərzaq məhsullarına, geyim formalarına, yanacağa, nəqliyyat vasitələrinə ayrılan yanacağa və digər məqsədlər üçün ayrılan vəsaitlərə də “əl gəzdirməsi” olduqca müzakitrə olunası mövzulardandır. Hörmətli oxucular! Araşdırmalarımız bundan sonra da davam edəcək və yaxın günlərdə sizləri, daha müfəssəl məlumatlarla məlumatlandırmağa çalışacağıq. Odur ki, bizi izləyin. Qarşı tərəfi də dinləyə bilərik.
