Ağdam rayon sakini Sədrəddin Cahid oğlu Quliyev dünən redaksiyamızda olarkən hər kəsi şoka salan bir məsələni danışdı... Rəsmi ərizəsini təqdim edən S.Quliyevin başına gələnlər Bakıda baş verib. Belə ki, Bakı şəhəri, N.Nərimanov rayonu, S.Rəhman küçəsi, ev 35, mənzil 24-də yaşayan Quliyev Sədrəddin Cahid oğlunun övladı Gürcüstanın Açıq Tədris Universitetindən ailə vəziyyəti ilə bağlı Azərbaycandakı universitetlərdən birinə köçürülməsi zamanı ortaya çıxmış sənədlərin saxtalığı ilə üz-üzə qalıb. O, ona 14600 manata başa gəlmiş bu sənədləri bizə təqdim etdi... Həqiqətən də ilk baxışda şübhələnməyə heç bir əsas da yoxdur. Amma...
Təhsil nazirinin imzası
necə saxtalaşdırılıb?
Hansı ki, həmin sənədlər Azərbaycan Təhsil Nazirliyindən, təhsil nazirinin müavini C.Bayramovun imza və möhürü ilə təsdiqlənmiş rəsmi məktubdan, Azərbaycan Kooperasiya Universitetinin möhürlü-ştamplı tələbə biletindən, adı çəkilən universitetin kassasına ödənilmiş 1200 manatlıq ödənişin qaimə-qəbzindən, nəhayət, şikayətçinin övladının tələbə olması barədə aidiyyəti dövlət müəssisələrinə göndərilmiş arayışlardan... ibarətdir. Və şikayətçi S.Quliyev günlərin birində əlində olan rəsmi sənədlərlə Azərbaycan Kooperasiya Universitetinə gedir və oğlunun ikinci kursda oxuyacağını bir daha müdiriyyətdən dəqiqləşdirmək istəyir. Lakin ona Təhsil Nazirliyindən hər hansı bir göndərişin olmadığı bildirilir... Həmçinin Azərbaycan Kooperasiya Universitetində təqdim edilən sənədlərdə adı göstərilən tələbənin mövcud olmadığını və sənədlərin saxta olduğunu bildirirlər. Bundan sonra şikayətçi ondan 14600 manat pul almış İsmayılov Asəf Nadir oğluna müraciət edir. Qarşı tərəf əməlini etiraf edərək səs-küy salmadan pulu təcili olaraq qaytaracağına söz verir. Amma...
[b]Bəs Kooperasiya
Universitetində bu sənədləri ona kim verib?
Əməlin etirafı cinayət məsuliyyətindən azad edirmi? Əsla yox! Amma diqqəti çəkən odur ki, Asəf İsmayılov hər dəfə gələcək tələbə və valideyni ilə məhz universitetin qarşısında görüşürmüş, içəri girib məsul şəxslərdən kiminləsə danışıb görüşəndən sonra çölə çıxırmış... Üstəlik, onun valideynə verdiyi sənədlərdən bir neçəsində adı çəkilən universitetin ştamp və möhürü var. Bəs bu ştamp və möhürü kim vururmuş?
Polis dələduzu həbs edir, amma ona havadarlıq etmiş “professor” Mehman
Babayevi yox...
Beləliklə, inanıb-etibar etdiyi şəxs tərəfindən aldadıldığını görən şikayətçi Quliyev Sədrəddin Cahid oğlu ərazi üzrə Yasamal rayon Polis İdarəsi 26-cı polis bölməsinə rəsmi qaydada şikayət verir... (O, Prezident İlham Əliyevə, Baş Prokuror Zakir Qaralova, daxili işlər naziri Ramil Usubova, DİN-nin Mütəşəkkil Cinayətkarlıqla Mübarizə Baş İdarəsinin rəisi R.Abbasova və surəti “Təzadlar” qəzeti redaksiyasına ünvanlı müraciətində bütün bunları yazıb). Ərizədə yazır:
“Mən - Bakı şəhəri, N.Nərimanov rayonu, S.Rəhman küçəsi, ev 35, mənzil 24-də yaşayan Quliyev Sədrəddin Cahid oğlu, yazıb Sizə bildirirəm ki, oğlum Quliyev Müşfiq Sədrəddin oğlu Gürcüstanda Açıq Tədris Universtetində oxuyurdu. Ailə vəziyyəti ilə bağlı 1-ci kursdan sonra onun Bakı şəhərində yerləşən Universtetlərin birinə köçürülməsini istəyirdirm. Əvvəldən tanıdığım həmyerlim bildirdi ki, onun yaxın qohumu olan İsmayılov Asəf Nadir oğlunun Təhsil Nazirliyində işləyən şəxslərlə sıx münasibəti vardır və o, bu məsələdə mənə köməklik edə bilər. Sonra Asəf İsmayılovla görüşdüm və o, oğlumun təhsil məsələsinə köməklik göstərməyinə söz verdi və əvvəldən 1.000 manat pul istədi. Mən ailə üzvlərim vasitəsi ilə əvvəl 08.07.2014-cü il tarixdə 1.000 manat və sonra isə 15.07.2014-cu il tarixdə 13.600 manat pulu ona çatdırdım. Həmin pullar Yasamal rayonu ərazisində “Space” TV-nin yanında İsmayılov Asəf Nadir oğluna verilmişdir.
Sonradan İsmayılov Asəf Nadir oğlu Azərbaycan Respublikası təhsil nazirinin müavini C.Bayramovun imzası ilə oğlumun köçürülməsi ilə bağlı 09.10.2014-cü il tarixli 5416-7938/016 nömrəli razılıq məktubunu, oğlum Quliyev Müşfiq Sədrəddin oğlunun adına Azərbaycan Kooperasiya Universtetinin 054 saylı tələbə biletini, həmin təhsil ocağına 1.200 manatın ödənilməsi barədə kassa mədaxil orderini və Ağdam rayon Hərbi Komissarlığına təqdim olunması üçün 05.12.2014-cü il tarixli, 175 saylı arayışı mənə təqdim etdi. Həmin sənədlər rəhbərlər tərəfindən imzalanmış və möhürlənmişdi. Sonradan məlum olmuşdur ki, Asəf İsmayılov mənim etibarımızdan sui-istifadə edərək dələduzluq yolu ilə saxta sənədlər düzəltməklə 14.600 manat pulumu mənimsəmişdir.
Mən dəfələrlə ondan pulu tələb etdikdə Asəf İsmayılov müəyyən bəhanələr gətirərək vaxt udmaqla bizi aldatmaqda davam edir. Məlum olmuşdur ki, Asəf İsmayılova bu işdə özünü çox hörmətli və mötəbər bir vəzifəli şəxsin yaxın qohumu kimi təqdim edən Hüsəmməddin Daşdəmirov, həmçinin Təhsil Nazirinin əməkdaşı kimi təqdim edən Lütfü Məmmədov və daha bir professor köməklik göstərmişdir. İndi həmin şəxslər bizə hədə-qorxu gəlirlər. O da məlum olur ki, Asəf İsmayılov əvvəllər məhkum olunmuşdur.
Dələduzluq yolu ilə 14.600 manat pulumu almış və saxta sənəd təqdim etmiş İsmayılov Asəf Nadir oğlu və ona bu işdə köməklik göstərən şəxslər barədə qanuni tədbir görülməsinə göstəriş verməyinizi xahiş edirəm. A.İsmayılovun mənə verdiyi saxta sənədlərin surətini ərizələrimə əlavə edirəm”.
Bəs havadarlar hardadır?
S.Quliyev deyir:
-Mənim polisə şikayətimdən bir müddət sonra Asəf İsmayılovu həbs etdilər və onun barəsində təhqiqat başlanıldı... Sonuncu dəfə Elçin adlı təhqiqatçı ilə görüşdüm və o, bu günlərdə mənə bildirdi ki, Asəf İsmayılovun barəsində Azərb. CM-nin 178-ci maddəsi ilə cinayət işi başlanması üçün material Yasamal rayon Polis İdarəsinə göndərilib... 15 oktyabr 2015-ci ildə təkrarən Yasamal RPİ-də olduq, bizə dedilər ki, sonra gələrsiniz məlumat veriləcək... Məsələ ondadır ki, bu işdə əsas füqur özünü Nazirlər Kabinetinin sabiq işçisi, hazırda İncəsənət Universitetinin müəllimi olduğunu bildirən Mehman Babayevdir. Lakin əvvəllər də təhqiqatçıya onun çağırılıb dindirilməsini xahiş etsək də, nədənsə onunla maraqlanmadılar. Çünki dəfələrlə mən pulumu tələb edəndə həmin Mehman Babayev mənə deyirdi ki, “Sən Asəfdən nə istəyirsən, pulun məndədir, narahat olma, işin həll ediləcək...”.
***
Redaksiyadan: şikayətçinin ərizəsi əsasında hələ neçə ay əvvəl barəsində ittihamlar səslənən A.İsmayılovu redaksiyaya dəvət etmişdik. O, bir neçə dəfə gələcəyinə söz versə də gəlmədi. Ərizə və digər saxta sənədlər tərəfimizdən aidiyyəti dövlət orqanlarına göndəriləndən sonra polis onu saxladı... Amma hələ də nəticə görünmür... Dünən həmçinin adı çəkilən, İncəsənət Universitetinin müəllimi kimi təqdim olunan Mehman Babayevin mobil telefonuna da zəng etdik, lakin telefonu söndürülmüşdü...
Araşdırmamız davam edir, əlavə məlumat veriləcək.
“Təzadlar”ın Araşdırma Qrupu[/b]
