Rusiyanın xarici işlər naziri Sergey Lavrov Mariupolda uşaq xəstəxanası və doğum evinin bombalanmasının Rusiya ordusunun şüurlu və məqsədyönlü qərarı olduğunu təsdiqləyib. O, bu barədə Antalyada Ukraynanın xarici işlər naziri Dmitri Kuleba ilə danışıqlardan sonra keçirdiyi mətbuat konfransında açıqlama verib.
Nazir doğum evini hərbi hədəf hesab etdiyini vurğulayıb: “Bir neçə gün əvvəl BMT Təhlükəsizlik Şurasının iclasında Rusiya nümayəndə heyəti bu doğum evinin çoxdan “Azov” batalyonu və digər radikallar tərəfindən ələ keçirildiyinə dair, bütün doğuş edən qadınların, bütün tibb bacıları və ümumiyyətlə, bütün heyətin oradan qovulmasına dair faktlar təqdim etdi. Bu, ultra-radikal “Azov” batalyonunun bazası idi”.
Lavrov tsinik yalanlar “sənətində” özünü belə üstələyə bildi. Həqiqət budur ki, martın 9-u saat 16:30 radələrində rus işğalçıları Mariupoldakı uşaq xəstəxanası və doğum evinə təyyarələrdən bir neçə iri bomba atıblar. Tibb müəssisəsinin bütün binaları tamamilə dağılıb. Rusiya təyyarələrinin Mariupoldakı uşaq xəstəxanasını bombalaması nəticəsində biri uşaq olmaqla 3 nəfər ölüb, 17 nəfər yaralanıb.
Mariupol şəhərinin meri Vadim Boyçenko bunu rus işğalçılarının etdiklərini soyqırımı adlandırıb və ümid edir ki, doğum evinə hava hücumunda iştirak edən hərbi cinayətkarlar beynəlxalq məhkəmələrdə ən ağır cəzaya layiq görüləcəklər. O haqlıdır. Dinc Ukrayna əhalisini məhv etmək üçün cinayət əmrləri verən və icra edən bütün Rusiya siyasətçilərinin və hərbçilərinin məhkəməsi mütləq olacaq. Bunda Sergey Lavrovun xüsusi yeri var.
Ancaq indi nə qədər təəccüblü səslənsə də, onun yalan sözlərinin artıq heç bir mənası yoxdur. 1945-ci ilin aprelində Göbbelsin təbliğatının da heç bir mənası yox idi. Nasist Almaniyası o vaxta qədər artıq uduzmuşdu, amma təbliğat onun ordusunun "qələbələrini" tərənnüm edirdi - daha doğrusu, o vaxta qədər ordudan nə qalmışdısa. Reallıqda isə yeganə sual təslim aktının nə vaxt imzalanacağı idi.
İndi də eyni vəziyyət yaşanır. Rusiya artıq məğlub olub. Bunu hətta cəbhə xəttindən gələn son xəbərlər də sübut edir. Ukrayna Silahlı Qüvvələrinin Baş Qərargahının məlumatına görə, Rusiya qoşunlarının bütün istiqamətlərdə hücumu Ukraynanın müdafiə qüvvələri tərəfindən dayandırılıb: “Ukrayna xalqının Rusiyanın hərbi işğalına qarşı qəhrəmancasına müqavimətinin 16-cı günü davam edir. Ukrayna Müdafiə Qüvvələri layiqli cavab verir və Rusiya silahlı qüvvələrinin bütün istiqamətlərdə hücum əməliyyatını dayandırır”.
“Rusiya qoşunları xeyli itki verən, yenidən qruplaşan və Kiyevi qərbdən və cənub-qərbdən bloklamaq planından əl çəkməyən bölmələrin döyüş hazırlığını bərpa etməyə çalışır. İşğal edilmiş yaşayış məntəqələrinin evakuasiya edilmiş sakinləri adı altında düşmən təxribat və kəşfiyyat qruplarının hazırlanıb Kiyevə daxil olması istisna edilmir. Ukrayna Müdafiə Qüvvələri Moşçun qəsəbəsi yaxınlığında düşmənin İrpen çayını zorla keçmək cəhdini dəf edib, düşmən geri çəkilib, yaşayış məntəqəsi azad edilib”, - deyə sözügedən məlumatda vurğulanır.
Bu arada internetdə Ukrayna Silahlı Qüvvələrinə məxsus “Bayraktar TB2” PUA-nın “Buk” hava hücumundan müdafiə raket sistemini darmadağın etməsinin görüntüləri yayımlanıb. Və məhv edilmiş Rusiya hərbi texnikası haqqında belə kadrlar çoxdur. Ukraynalı hərbi-siyasi ekspert Aleksandr Kovalenkonun da baş verənlərlə bağlı təhlili var. O, öz “Facebook” səhifəsində yazıb ki, Rusiya işğalçı qoşunlarının ləng irəliləməsi və Rusiya Silahlı Qüvvələrinin bölmələrinin fəaliyyəti itkilərin bərabər və orta səviyyədə bölüşdürülməsinə səbəb olub.
“Mövcud məlumatlara görə, 2022-ci il martın 10-u səhər saatlarında rus işğalçılarının sanitar itkiləri 38 min nəfərdən çox olub. Geri dönməz sanitar itkilər (ölənlər) 12 min nəfəri keçib. Beləliklə, rus işğalçı qoşunlarının ümumi itkiləri 50 min nəfəri ötüb”, - deyə analitik bildrib.
Əlavə edib ki, Rusiya komandanlığı Ukraynaya müdaxilənin birinci dalğasının nəticələrindən nəticə çıxarıb və ikinci dalğaya daha diqqətlə hazırlaşır: “Təxmini hesablamalara görə, ikinci dalğanın tammiqyaslı sıçrayışı zamanı Rusiya və Belarus xəstəxanaları və hospitalları gündə 3000-dən 5000-ə qədər yaralının ümumi ötürmə qabiliyyətini təmin etməlidir. Nəzərinizə çatdırım ki, işğalın ilk günlərində onlar belə bir ötürmə qabiliyyətini təmin edə bilmədilər və ilk 48 saatda yaralıların axınında boğuldular”.
Yəni Rusiya, şübhəsiz ki, xaotik olaraq haradasa nəsə yenə ələ keçirməyə çalışacaq, lakin bu cəhdin nəticəsi proqnozlaşdırıla bilər - Ukraynanın tam işğalının tamamilə real olmaması şəraitində öldürülən və yaralanan işğalçılardan düzələn leş dağı. Və burada söhbət təkcə Rusiya Federasiyasının “top yemi” axtarışında artıq imperiyanın ucqarlarına əl atması deyil, həm də onun hərbi texnikasının keyfiyyətinin. şoka salmasıdır.
“Mən getdikcə ələ keçirilən rus texnikası arasında, yumşaq desək, daha çox ikinci dərəcəli nümunələr görürəm. Ukrayna silahlı qüvvələrinin əlinə daha az T-72B3 və T-80BVM və ya PUA düşür, o ki, qala müasir T-90A tankları. Hətta köhnə T-72B və T-72A görünməyə başlayır. BTR-82A artıq o qədər də tez-tez rast gəlinən qənimət deyil, getdikcə daha çox BTR-80-ə rast gəlinir. Deyəsən, işğalçı qüvvələrdə işğal üçün nəzərdə tutulmuş BMD-2 ehtiyatı da tükənib”, - deyə Kovalenko yazır.
Onun fikrincə, Rusiya Federasiyasının Silahlı Qüvvələrinə aid döyüşə ən hazır və müasir potensialı olan, ilk sıçrayış üçün nəzərdə tutulmuş texniki bölmələr tükənib. İndi döyüş əməliyyatlarında rezerv qüvvələr getdikcə daha çox istifadə olunur ki, onlar da, yumşaq desək, heç də ən yaxşı texniki və fiziki vəziyyətdə deyil. Onların döyüşə göndərilməsi, dinamik mühafizəsi olmayan tankların, tamamilə “çılpaq” olması ondan xəbər verir ki, hərbiçilərin itkiləri Rusiya komandanlığının nəinki vecinə deyil, hətta onların döyüşə atılası başqa tankları mövcud deyil.
“İndi RF Silahlı Qüvvələrinin əlavə qüvvələri və vasitələri Ukrayna ilə sərhədlərə cəlb olunur, onların arasında yeni silah modelləri var, lakin birinci dalğa ilə müqayisədə eşelon və kolonlarda onların sayı xeyli azdır. Rusiya özünün qabaqcıl yeni texnologiya resursunu tükətdi və indi o, ölkənin hər yerindən ehtiyatlar toplamalı, həm də SSRİ-dən miras qalan texnika ilə müharibə aparmalı olacaq. Ukraynaya qarşı müharibənin ikinci həftəsində dünyanın “ikinci” ordusunun resursları tükəndi”, - deyə ukraynalı ekspert fikrini yekunlaşdırır.
Eyni zamanda, Qərb silahlarının ən yaxşı nümunələrinin Ukraynaya çatdırılması davam edir. Onun mübarizə aparacağı motivasiyası da var. Çünki Ukrayna qalib gələcək – həm də çox tezliklə. Sonra isə hər kəsdən etdiklərinin əvəzi soruşulacaq. O cümlədən Lavrovdan. Hər şey üçün. //AYNA//
