"Palmali" Şirkətlər Qrupu və onun rəhbəri Mübariz Mənsimovla bağlı bəzi məqamlar son zamanlar mətbuatın əsas müzakirə mövzularından birinə çevrilib. Əldə etdiyimiz bilgilərə görə, bir müddətdir ki, dünyanı ağuşuna alan maliyyə böhranı Mübariz Mənsimovun şirkətindən də yan keçməyib. Qeyd olunur ki, ötən ildən müəyyən çətinliklər yaşayan "Palmali" Şirkətlər Qrupunda böhran pik həddə çatıb.
Belə ki, mənbə "Gündəlik Bakı"ya açıqlamasında iddia edir ki, son zamanlar şirkətin durumu xeyli çətinləşib: "Deyilənlərə görə, hazırda şirkətdə ciddi maliyyə böhranı yaşanır. Bunun nəticəsidir ki, şirkətin sponsorluq etdiyi "Xəzər Lənkəran" klubunda bir müddətdir futbolçulara, məşqçi və texniki heyətə maaş verilmir. Hətta "Palmali" reklam müqaviləsi bağladığı mətbuat orqanları qarşısındakı öhdəliklərini də yerinə yetirə bilmir. Təbii, bu da öz növbəsində, şirkət daxilində narazılıqlara, ciddi problemlərə səbəb olub". Məlumatlı şəxsin sözlərinə görə, "Palmali" Şirkətlər Qrupunun Azərbaycanla yanaşı, Türkiyə və digər ölkələrdəki ofislərində də ciddi maliyyə problemləri mövcuddur: "Görünən odur ki, Mübariz Mənsimov iflasın eşiyindədir. Artıq Türkiyə və Rusiya mətbuatında da bununla bağlı müəyyən informasiyalar dolaşmaqdadır".
Mübariz Mənsimovun hazırda dünyanın ən böyük 5 dənizçilik şirkətindən biri olaraq göstərilən və illik dövriyyəsi 3 milyard dollar olan "Palmali" Şirkətlər Qrupunu 1998-ci ildə Türkiyəyə gətirdiyini, həmçinin adıçəkilən şirkətin 21 ölkədə ofisinin olduğunu vurğulayan məlumatlı şəxs qeyd edir ki, "Palmali" 150-yə yaxın gəmisi ilə Aralıq dənizi, Ağ Dəniz, Qara Dəniz arasında Rusiya neftinin 75 faizini daşıyır: "Palmali"nin ən böyük müştərisi dünyaca məşhur olan "BP" şirkətidir. Bundan başqa, Mübariz Mənsimov "PalMedia" adlı şirkətin nəzdində 5 milyon dollar sərmayə ilə "Pal FM" radiosu və "Palhaber" adlı xəbər portalı da qurub. "Palmali" Şirkətlər Qrupunun Azərbaycandakı fəaliyyətinə gəlincə, qeyd etmək lazımdır ki, şirkətin Bakı ofisindən "Palmali" gəmilərində çalışan azərbaycanlılar qeyri-rəsmi, ruslar isə rəsmi olaraq çalışırlar. Deyilənlərə görə, şirkətin Bakı ofisinin rəhbərliyi işçilərin haqlarını tapdamaqla yanaşı, onların adlarına yazılan vəsaitləri vermirlər. Bundan başqa, "Palmali" Şirkətlər Qrupunun gəmilərində işləyən işçilərin ən böyük problemlərindən biri şirkətin işçilərlə əmək müqaviləsi bağlamamasıdır. Dənizdə ağır işlərdə çalışan işçilər bununla sosial sığortalardan və təminatlardan məhrum olurlar. Həmçinin işçilərlə müqavilə bağlanmaması səbəbindən onlara əmək kitabçaları verilmir və ağır işlərdə çalışan bu insanlar gələcəkdə təqaüd almaqdan da məhrum olurlar. Bunun müqabilində isə şirkətdə çalışan Rusiya vətəndaşları ilə əmək müqaviləsi bağlayır və ruslara azərbaycanlı işçilərdən üç dəfə artıq əməkhaqqı verirlər. Ümumiyyətlə, ruslar "Palmali" Şirkətlər Qrupunun Azərbaycanda fəaliyyət göstərən gəmiçilik sektorunda əksəriyyət təşkil edirlər". İşçilərin bununla bağlı bir neçə dəfə müvafiq qurumlara müraciət etdiklərini deyən mənbə bildirir ki, hələlik Mübariz Mənsimovun sahibi olduğu şirkətdə yaşanan neqativ halların aradan qaldırılması istiqamətində konkret addım atılmayıb: "Görünür, aidiyyəti qurumlar ya Mübariz Mənsimovdan çəkinir, ya da bu məsələdə "Palmali" Şirkətlər Qrupunun maraqları ilə onların maraqları üst-üstə düşür. Əks halda, rus işçilərlə müqayisədə azərbaycanlı işçiləri qul səviyyəsində çalışdıran şirkət yetkililəri barəsində lazımi tədbir görülərdi. Onu da qeyd edim ki, "Palmali" azərbaycanlı işçilərlə əmək müqaviləsi bağlamamaqla həmçinin, külli miqdarda vergidən yayınır. Eyni zamanda, qeyri-rəsmi olaraq çalışan azəbaycanlı işçilərin maaşları ən azı rəsmi işçilərin maaşından iki dəfə az olur ki, bu da şirkətin yetkili şəxslərinə böyük gəlirlər gətirir. Bunun müqabilində isə uzun illərdir şirkətdə çalışan dənizçilər bütün sosial təminatlardan və təqaüddən məhrum olublar. Maraqlı məqam ondadır ki, işçilər mövcud acınacaqlı vəziyyətlə bağlı "Palmali" Şirkətlər Qrupunun Türkiyədəki baş ofisinə dəfələrlə müraciət etsələr də, onların şikayətlərinə baxılmır və növbəti reys zamanı şikayətçilər gəmiyə göndərilmir. Bu isə onu deməyə əsas verir ki, şirkətin prezidenti Mübariz Mənsimov hər şeydən xəbərdardır və bu dözülməz rejim onun razılığı ilə həyata keçirilir". Məlumatlı şəxsin sözlərinə görə, çox vaxt uzaq səfərlərə çıxan böyük gəmilərin işçi heyətinin yemək pullarını rus kapitanlar mənimsəyirlər: "Ərzaqları mənimsənilən işçilər isə günlərlə makaron, düyü yeməyə məcbur olurlar. Bundan başqa, azərbaycanlı işçilər davamlı olaraq rus kapitanlar tərəfindən ağır işlərə təhkim olunur, onlar haqqında Türkiyə və Bakı ofisinə qeyri-kafi xasiyyətnamələr yollayırlar. Gəmi kapitanlarının ərzaq pullarını mənimsəməsinə görə narazılıq edən işçilər isə şirkətin yetkili şəxsləri tərəfindən cəzalandırılaraq işdən çıxarılır".
Bu arada, "Palmali" Şirkətlər Qrupunun rəhbəri ilə bağlı əldə etdiyimiz bilgilərdə həmçinin, o da qeyd olunur ki, Mübariz Mənsimov artıq Azərbaycanda siyasi məsələlərə qarışmaq niyyətindədir. Belə ki, bu barədə redaksiyamızı məlumatlandıran mənbə iddia edir ki, Mübariz Mənsimov bu il baş tutacaq parlament seçkilərində ölkənin radikal müxalifət düşərgəsinə külli miqdarda maliyyə yardımı etməyi planlaşdırır: "Palmali" Şirkətlər Qrupunun rəhbərinin müxtəlif vaxtlarda mətbuata verdiyi açıqlamalardan da aydın olur ki, o, heç də siyasətdən uzaq birisi deyil. Əksinə Mübariz Mənsimov daim siyasətlə maraqlanır. Əslində, burada qeyri-adi heç nə yoxdur. Lakin qəribə məqam ondadır ki, deyilənə görə, şirkət rəhbəri bu ilin sonlarına yaxın Azərbaycanda baş tutacaq parlament seçkilərində ölkənin radikal müxalifət düşərgəsinə ciddi maliyyə dəstəyi verməyi planlaşdırır. Deyilənlərə görə, bir müddət öncə öz çirkin niyyətlərini Azərbaycanda reallaşdırmağa çalışan, lakin buna müvəffəq olmayan "Milyarderlər İttifaqı" ilə sıcaq ilişkilərə malik olan Mübariz Mənsimov bu il baş tutacaq seçkilərdə öz nümayəndələrini parlamentə yerləşdirmək istəyir. Odur ki, onun müxalifətin radikal qanadı ilə müəyyən danışıqlara start verdiyi deyilir…"
Mövzu ilə əlaqədar qarşı tərəfin də mövqeyini işıqlandırmağa hazırıq.
