Mayın 19-da Binəqədi rayonu, Azadlıq prospektindəki binada baş verən yanğın hadisəsi ölkədə ciddi ajiotaja səbəb oldu. Elə həmin gün də baş verən hadisəylə bağlı hüquqi prosedur başlanıldı.
Hadisə yerinə gələn Baş prokuror Zakir Qaralov ilkin ehtimal olaraq yanğına səbəb kimi binaya vurulan keyfiyyətsiz üzlüklərin olmasını göstərib. Ondan sonra yaşayış binasında baş verən dəhşətli yanğınla bağlı şirkət rəhbəri tutulub. Baş Prokurorluq, Daxili İşlər və Fövqəladə Hallar nazirliklərinin “Unikal”a daxil olan birgə məlumatında qeyd olunur ki, 2015-ci il may ayının 19-da, saat 11 radələrində Bakı şəhəri, Binəqədi rayonu, Azadlıq prospekti 200/36 ünvanda yerləşən çoxmərtəbəli yaşayış binasında yanğın baş verib. Hadisə yerinə dərhal Fövqəladə Hallar Nazirliyinin Dövlət Yanğından Mühafizə Xidmətinin canlı qüvvəsi, texnikası, Səhiyyə Nazirliyinin Təcili Tibbi Yardım xidmətləri cəlb ediliblər. Hadisə yerinin mühafizəsi və xilasedicilərin maneəsiz fəaliyyəti Daxili İşlər Nazirliyinin Çevik Polis Alayının və paytaxtın polis orqanlarının əməkdaşları tərəfindən təmin edilib.
Fakt üzrə Baş Prokurorluğun Ağır Cinayətlərə dair İşlər üzrə İstintaq İdarəsində Azərbaycan Respublikası Cinayət Məcəlləsinin 225.2-ci - ehtiyatsızlıqdan zərərçəkmiş şəxsin ölümünə və digər ağır nəticələrə səbəb olan yanğın təhlükəsizliyi qaydalarını pozma, 308.2-ci - vəzifə səlahiyyətlərindən sui-istifadə və 314.2-ci - ağır nəticələrə səbəb olan səhlənkarlıq maddələri ilə cinayət işi başlanılıb, eləcə də Baş Prokurorluğun, Daxili İşlər və Fövqəladə Hallar nazirliklərinin təcrübəli əməkdaşlarından ibarət istintaq-əməliyyat qrupu yaradılıb. Qulluq mənafeyi tələb etdiyi halda səlahiyyətlərindən istifadə etməyən və istehsal etdiyi keyfiyyətsiz üzlüklərlə həmin binada fasadlama işləri aparmış “Global Construction” şirkətinin rəhbəri Miryusif Mahmudov iş üzrə şübhəli şəxs qismində tutulub. Həyata keçirilən istintaq və əməliyyat-axtarış tədbirləri Azərbaycan Respublikası Prezidentinin nəzarətindədir.
“Unikal” qəzeti olaraq, baş verən hadisənin pərdəarxası məqamlarını işıqlandırmaq üçün bir sıra ekspertlərlə söhbətləşdik. Öncə onu qeyd etmək lazımdır ki, əgər bütün işlər düzgün qurulsaydı, bu hadisə baş verməzdi. Azərbaycan vətəndaşları bilməlidir ki, günahkar və günahkarlar kimdir? Bu hadisəyə görə kim məsuliyyət daşıyacaq? Ölkə rəhbəri İlham Əliyev də açıq şəkildə bəyan edib ki, hər kəs nəticə çıxarmalıdır, hər bir məmur öz məsuliyyətini dərk etməlidir: “ Bir də qeyd edirəm ki, heç kim cəzasız qalmayacaq. Günahkarlar dövlət tərəfindən cəzalandırılacaq və ədalət bərpa ediləcək”.
Məsələylə bağlı “Unikal”a açıqlama verən tanınmış hüquqşünas Mehman Muradlı deyib ki, Bakı şəhərində buna oxşar yanğın hadisələri olub, amma bu miqyasda, 15 nəfərin vəfatı onların arasında 4 azyaşlının olması ilk dəfədir. Onun sözlərinə görə, məsələyə ilkin reaksiya verilərək baş prokurorluq tərəfindən cinayət işinin başlanması və dərhal bu yanğının baş verməsində şübhəli şəxs qismində bir nəfərin saxlanılması məsələnin nə qədər ciddi olduğunu göstərdi. Hesab edirəm ki, bu məsələdə, cinayətdə əli olan hər bir kəs məsuliyyətə cəlb olunmalıdı. Burada əsas məsuliyyətə binaya üzlük vurulmasında istehsalçıynan yanaşı həm də görülən işi istismara qəbul edən orqanların nümayəndələri də cəlb edilməlidi. Açığı həmin materialın nə qədər tez və ya gec yanmasından xəbərim olmasa da, görünən odur ki, bu işdə məsuliyyətsizlik edilib və 15 nəfərin həyatına son qoyulub. Binəqədi rayon İcra Hakimiyyəti başçısının ilk verdiyi açıqlamada yaxasını kənara çəkməsi isə absurddu. Çünki başçılıq etdiyi rayon ərazisində istənilən obyektin təhlükəsizliyindən tutmuş kommunal işlərin görülməsinə bir başa cavabdehdi. Necə ola bilər ki, bir ev zibil pulunu verməyəndə hər gün o mənzilin qapısını MKİS əməkdaşları döyə bilir, amma bu cür məsələ ortaya çıxanda icra başçısı yaxasını kənara çəkir? Əgər üzlük keyfiyyətsiz olubsa bəs, onda müvafiq qurumlar onu niyə istismara qəbul edirdi? Yəni, bir çox suallar var ki, onlara cavab tapılmalıdır”.
Hüquqşünas hesab edir ki, bu təxribatın törədilməsində cavabdeh olan bütün orqanlar və onların məsul şəxsləri cinayət məsuliyyətinə cəlb ediləcəklər. Onun qənaətincə,onların dövlətə və vətəndaşlara vurduqları maddi və mənəvi zərəri ödəməklə barələrində qanunamüvafiq tədbir görüləcək.
“Unikal”ın məlumatına görə, Bakı şəhəri İcra Hakimiyyətinin başçısı Hacıbala Abutalıbov deyib ki, 140 binada ekspertiza aparılacaq. Onun sözlərinə görə, Prezident İlham Əliyev Bakıda binalara vurulan üzlüklərin keyfiyyətinin yoxlanılması üçün 2 gün vaxt verib. H.Abutalıbov deyib ki, bu müddətdə ekspertiza aparılacaq: "Bunların hamısından nümunə götürüləcək, laboratoriyadan keçirilərək ekspertiza olunacaq. Yekun sənəd sonda mənə təqdim olunacaq. Bundan sonra biləcəyik ki, yanğın nədən baş verib. Bundan sonra binalardan üzlüklərin sökülüb-sökülməyəcəyinə qərar veriləcək. Çünki müəyyən sənədlərdə bu materiallardan üzlük kimi istifadə oluna biləcəyi yazılmışdı. Həmin material dünyanın bir çox yerində, o cümlədən Türkiyədə, Rusiyada istifadə olunub. Həmin ölkələrdə üzlüklər birbaşa divara yapışdırılaraq ara məsafə saxlanılmır. Ara məsafənin özü də yanğının sürətlənməsinə səbəbdir. Səbəblər çoxdu, sadəcə istintaq araşdırmasının nəticələrini gözləmək lazımdır".
“Unikal”ın məlumatına görə, Milli Məclisin İqtisadi siyasət komitəsinin üzvü Vahid Əhmədov da hadisəylə bağlı fikirlərini bildirib. Onun sözlərinə görə, ölkə başçısının müdaxiləsindən sonra məsələyə daha həssas yanaşılır: “Bildiyiniz kimi, cənab prezident İlham Əliyev hadisəni birbaşa nəzarətə götürüb. Bu isə o deməkdir ki, faciəyə səbəbkar olanların heç biri cəzasız qalmayacaq. Əlbəttə, adını çəkdiyiniz şirkətin rəhbəri keyfiyyətsiz məhsul istehsalına görə cavabdehdir. Ancaq binalara bu cür üzlüklərin vurulmasını sifariş verənlər də ondan az günahkar deyillər. Onlar ilk növbədə istifadə olunan materialın nə qədər keyfiyyətli, yanğına davamlı olub-olmadığını əvvəlcədən yoxlamağa borclu idilər. Əgər bunu etməyiblərsə, yaxud bilərəkdən həmin materialın istehsalçısı ilə işbirliyinə gediblərsə, mütləq məsuliyyət daşımalıdırlar. Bunu ilk növbədə hüquq-mühafizə orqanları araşdırmalıdır. Məncə, dünənki faciəyə səbəb ola biləcək bütün ehtimal olunan və olunmayan versiyalar ciddi saf-çürük edilməlidir. Bəli, Avropa Oyunları ilə bağlı Qərbdəki bəzi qüvvələr Azərbaycan hakimiyyətinə təzyiqlərə cəhd göstərir. Bu hadisəyə gəldikdə, binanın fasadının yenilənməsi üçün istifadə olunan materialın keyfiyyətsiz, həm də tez alışan olduğu artıq sübut olunub. Yəni indi ciddi tədbirlər görülməsə, hər zaman belə hadisələrin baş verəcəyi istisna olunmur”.
Görünən odur ki, bu hadisə ilə bağlı məsələ burada yekunlaşmayacaq. Yəni, proses davam edəcək, cavabdeh şəxslər məsuliyyətə cəlb olunacaq.
