Ordubad Rayon Kommunal Müəssisələr Kombinatının keçirdiyi tender müsabiqəsinin qalibi “Azərmaş Park” MMC (VÖEN – 1404629451) olub.
Yeniavaz.com xəbər verir ki, qurum MMC-dən 6 ədəd kommunal təyinatlı texnika satın alacaq.
Qeyd edək ki, bu texnikalardan 4-ü zibildaşıyan maşın, 1-i avtosəbət, 1-i isə buldozer olacaq.
Ordubad Rayon Kommunal Müəssisələr Kombinatı kommunal təyinatlı texnikanın satın alınmasına görə “Azərmaş Park” MMC-yə 898 min 700 manat ödəyəcək. Açıqlanan məlumatlardan da göründüyü kimi, alınacaq texnikanın bir ədədinin orta qiyməti təxminən 150 min manat olacaq.
Qeyd edək ki, Hacıqabul Sənaye Məhəlləsində fəaliyyət göstərən “Azərmaş Park” MMC Özbəkistanın “UzAvtoSanoat” Səhmdar Cəmiyyəti ilə birgə Yaponiyanın “ISUZU” brendinin avtobuslarını istehsal edir.
Məlumat üçün bildirək ki, “Azərmaş Park” MMC 2019-cu ildə dövlət qeydiyyatına alınıb. Nizamnamə kapitalı 100 manat olan MMC-nin qanuni təmsilçisi Hüseynov Anar Adil oğludur. “Azərmaş” şirkətinin İdarə heyətinin sədri isə Emin Axundovdur.
Onu da qeyd edək ki, “Azərmaş” adı ilə fəaliyyət göstərən çoxsaylı şirkətlər arasında “Azərmaş Avto Servis” MMC, “Azərmaş Lizinq” MMC, “Azərmaş CP” MMC, “Azərmaş Trade” MMC, “Azərmaş” MMC və “Azərmaş Park” MMC kimi şirkətlər yer almaqdadır.