2 uşaq anası olan Aynur Nağıyeva 11 il 3 ay həbs cəzası alıb. 27 yaşlı Aynur ərini öldürməyə cəhddə ittiham olunaraq həbs edilib.

Musavat.com xəbər verir ki, hadisə ötən ilin avqustunda Bakının Nizami rayonu ərazisində yerləşən mənzillərdən birində qeydə alınıb.

Aynur həyat yoldaşı Sakit Nağıyevə 9 bıçaq zərbəsi vurub.

Qadın məhkəmədə bıçağa əri içkili olduğu və evə gec gəldiyi üçün əl atdığını etiraf etsə də, özünü təqsirli bilməyib. Deyib ki, hadisəni qısqanclıq zəminində törədib:

"Mən 9 bıçaq vurmuşam, heç biri 1 santimetrdən artıq daxilə nüfuz etməyib. Mən onun dəfələrlə xəyanətini, başqa qadınlarla danışığını tutmuşdum. Onun telefonuna format verəndə başqa qadınla səs yazısını gördüm. 4 uşağa baxırdım. İkisi öz uşağımdır. İkisi də qaynımın uşağı. Qaynımın arvadı rəhmətə getdiyi üçün uşaqlarına mən baxırdım.

Hadisə olan gecə evə gec gəldi. Gəldi, dedi ki, mənə çay gətir. Dedim, kimin yanından gəlirsən, get o da sənə çay gətirsin. Bu zaman dalaşdıq, çıxdı getdi, təzədən araq alıb gətirdi. Ondan sonra bu hadisə baş verdi".

Müttəhim baş verənlərdən cana doyduğunu bildirib:

"Mən boğaza yığılmışdım. Onu gecə saat 3-də telefonla oynayarkən vurdum. Müstəntiq ittiham aktında mənə layiq olmayan şeylər yazıb".

Aynur 2015-ci ildə ailə qurmaq istədiklərini, lakin o zaman bu gün zərərçəkən skamyasına əyləşən Sakit Nağıyevin həbs olunması səbəbindən evliliklərinin 2017-ci ilə qədər ertələndiyini deyib.

Sakit Nağıyev məhkəmədə həyat yoldaşından şikayətçi olmadığını, 2 azyaşlı övladlarının olmasını nəzərə alınmasını xahiş edib.

Zərərçəkmiş Sakit bildirib ki, ev alqı-satqısı ilə məşğul olduğu üçün telefonda çox adamla danışır. Danışdığı şəxslər arasında qadınlar da olduğu üçün Aynur onu qısqanırmış.

İstintaq zamanı ortaya çıxan başqa təfərrüatlar da olub. Aynur istintaq zamanı ərini öldürmək niyyətinin olmadığını desə də, ilk ifadəsində cinayəti etiraf edib. Həmçinin o, hadisədən sonra telefonunda olan bir nömrəyə mesaj yazaraq Sakiti vurduğunu deyib. Aynurun da başqa bir şəxslə münasibətinin olduğu müəyyən edilib.

Sakit istintaqda ifadə verən zaman Aynurun onu ilk dəfə yatdığı yerdə vurduğunu deyib. Bildirib ki, ilk bıçaq zərbəsindən sonra ayılıb nə baş vediyini aydınlaşdırmaq istəyib. Bu zaman Aynur ona bir neçə zərbə də vurub. Aynur Sakitə "1 saata ölməsən, yenə vuracam" deyərək başının üstündə dayanıb. Sonra isə bloka çıxaraq pilləkənlərdə oturub. Bir az sonra peşman olan Aynur Sakitin telefonunu özünə verib. Sakit təcili yardıma zəng edərək kömək istəyib.

Aynur Nağıyevaya qarşı Cinayət Məcəlləsinin 29, 120.2.9-cu (təqsirkar şəxs üçün aşkar surətdə köməksiz vəziyyətdə olan adamı öldürməyə cəhd) maddəsi ilə ittiham irəli sürülüb. Hökmə əsasən, Aynur 11 il 3 ay həbs cəzası alıb.