İyulun 20-də qafqaznews.az saytında “Orucəli Hacıyevin adı Pirşağıda torpaq fırıldağında hallanır – ŞİKAYƏT ” başlıqlı yazı dərc olunmuşdu. Yazıda bildirilirdi ki, Qafqaz Xəbər Agentliyinə Bakı şəhər sakini Zöhrab Zülfi oğlu Əliyev bildirib ki, fövqəladə hallar nazirinin müavini Orucəli Hacıyevlə yaxınlığı olan Fuad Axundov adlı sahibkar onu və 16 nəfər mülkiyyət sahibini aldadaraq, ümumilikdə 2 hektara yaxın torpaq sahəsini mənimsəyib. Z.Əliyevin və digər 16 torpaq sahibinin imzası olan ərizədə deyilir: “2010-cu ildə tanışlıq münasibətlərimiz olan “Axund FTKA” şirkətinin sahibi Fuad Kamal oğlu Axundov mənə bildirdi ki, Pirşağı qəsəbəsində böyük torpaq sahəsi əldə etmək istəyir. Onun sözlərinə görə, rəhbərlik etdiyi “Axund FTKA” şirkəti həmin ərazidə kotteclərdən ibarət böyük istirahət kompleksi tikəcək. Pirşağıda, dəniz sahilində mənim dostlarım və qohumlarımın torpaq sahələri var idi. O mənə təklif etdi ki, onlardan etibarnamə alım və sonra ona satım. Fuad Axundov mənə bildirmişdi ki, bu işdə əsas söz sahibi “ağsaqqal” deyə təqdim etdiyi fövqəladə hallar nazirinin müavini Orucəli Hacıyevdir.
F.Axundovun sözlərinə görə, bu torpaqların pulunu və tikiləcək istirahət kompleksinin də sərmayəsini Orucəli Hacıyev verəcəkdi. Mən həmin ərazidə hər birinin 0,12 hektar qanuni torpaq sahəsi olan 16 nəfərlə danışaraq, onlardan etibarnamə aldım. Məsələni torpaq sahiblərinə izah etdim”, – deyə Z.Əliyev qeyd edib. Onun sözlərinə görə, təxminən 2 hektara yaxın ərazinin etibarnaməsini aldıqdan sonra, Fuadla əlaqə saxlayıb və torpaq sahələrini nə vaxt alacağını soruşub.“O, məni inandırdı ki, tezliklə “ağsaqqal” dediyi Orucəli Hacıyevlə görüşəcək və ondan sərmayə alacaq, lakin ilk əvvəl mən ona etibarnamə verməliyəm. F.Axundovun sözlərinə görə, o, etibarnamələri Orucəli Hacıyevə göstərərək, onu sərmayə yatırmağa inandırmalı idi. Beləliklə, Fuad Axundov mənim etibarımdan sui-istifadə edərək, həmin torpaq sahələrinə 16 mülkiyyət sahibinin adına etibarnamə aldı. Mən torpaq sahiblərinin şifahi razılığını alaraq, onların mənə verdiyi etibarnamələri Fuad Axundovun adına dövr etdim. İnanırdım ki, bu işdə nazir müavininin adı varsa, hər hansı fırıldaq olmaz.
Ondan sonra Fuad Axundovdan səs çıxmadı və məsələ uzandı. Mən Fuad Axundovla görüşmək istəyəndə isə, o, mənim zənglərimə cavab vermədi və daim görüşdən qaçdı. Daha sonra isə öyrəndim ki, Fuad Axundov mülkiyyət sahiblərinin xəbəri olmadan həmin torpaq sahələrini 2012-ci ildə özünə yaxın adamlara, ailə üzvlərinə (həyat yoldaşına və oğluna)“satıb”. Daha doğrusu, Fuad Axundov formal “alqı-satqı” prosesi ilə, özgələrinin əmlakını mənimsəyib.
Həmin ərazidə hələ də tikinti başlamayıb, lakin Fuad Axundov həmin torpaq sahələrini özününküləşdirərək, vətəndaşların dədə-baba torpaqlarını, bağ sahələrini zəbt edib. Mən bu hadisədən sonra dəfələrlə həm Fuad Axundovla, həm də FHN başçısının müavini Orucəli Hacıyevlə görüşməyə çalışdım, lakin cəhdlərim boşa çıxdı. Son nəticə olaraq, mən 16 mülkiyyət sahibinin yanında yalançı çıxdım. Sizdən xahiş edirəm ki, vətəndaşların mülkiyyət hüquqlarının bərpası naminə, Fuad Axundovun fırıldaqçı əməllərini araşdıraraq, ictimailəşdirəsiniz. Sözlərimin sübutu olaraq, sizə müvafiq sənədlərin surətini də təqdim edirəm” , – deyə Z.Əliyev əlavə edib.Həmçinin, 16 mülkiyyət sahibi də eyni ərizədə Zöhrab Əliyevin sözlərini təsdiqləyiblər: “Zöhrab Zülfi oğlu Əliyevin bu ərizədəki sözlərinin həqiqiliyini öz imzamızla təsdiq edirik və bildiririk ki, “Axund FTKA” şirkətinin sahibi Fuad Kamal oğlu Axundov bizim etibarımızdan sui-istifadə edərək, qanuni mülkiyyətimizi mənimsəyib. Baş verən alqı-satqı prosesindən isə bizim xəbərimiz olmayıb və mülkiyyət sahibi olaraq, bu alqı-satqıya görə bizə heç nə verilməyib”.
Mirismayıl Miryəhyaoğlu, Nəcəfzadə Aslan Nəcəf oğlu, Yaqubov Əfqan Sabir oğlu, Nəcəfov Salman Əjdər oğlu, Yaqubov Mübariz Sabir oğlu, Hacıbəyov Teymur Adil oğlu, Nəcəfov Sərdar Mirismayıl oğlu, Yəhyayev Muxtar Mirismayıl oğlu və digərləri (bir neçə şikayətçi xanım olduğuna görə, adlarının hələlik mətbuatda açıqlanmamasını xahiş ediblər – red.) də bu ərizəni imzalayıblar (qafqaznews.az)
Kavkaznews.az saytı qərara gəldi ki, aydınlaşdırsın, görəsən, Zöhrab Əliyevin dedikləri doğrudurmu? Görəsən, Fuad Axundov etibarnamə aldığı torpaq sahələrini öz oğlu və həyat yoldaşına satıb? Bu suala cavab almaq üçün, Fuad Axundovun özünə zəng etdik. “Nə fərqi var, kiminlə alqı- satqı eləmişəm? Bu sizi niyə maraqlandırır? Müstəntiqsiniz?”, – deyə “Axund FTKA”nın rəhbəri sualımıza sualla cavab verdi.“Zöhrab Əliyev iddia edir ki, o və qohumları sizə satılan torpaq sahələrinə görə heç nə almayıblar. Bu doğrudur?”, – deyə soruşduq.
“Mən sizin suallarınıza cavab verməyə borcluyam?” – deyə Fuad Axundov yenə də suala sualla cavab verdi. Zöhrab Əliyevin sözlərinə görə, Fuad Axundov ona bildirmişdi ki, rəhbərlik etdiyi şirkət sözügedən torpaq sahələrində kotteclərdən ibarət iri istirahət mərkəzi tikməyə hazırlaşır. Biz aydınlaşdırmaq istədik, “Axund FTKA” şirkəti Pirşağı qəsəbəsi ərazisində istirahət mərkəzi tikməyə hazırlaşırmı? “Axund FTKA” şirkətinin satış meneceri Fidan Əhmədova Kavkaznews.az saytına bildirdi ki, şirkətin Pirşağıda torpaq alıb-almadığı ona məlum deyil. “Əgər belə alqı-satqı olsaydı, mənim də xəbərim olardı”, – deyə Fidan Əhmədova qeyd etdi (kavkaznews.az).
İyulun 26-da Qafqaz Xəbər Agentliyinə zəng edən İbrahim İsmayılov adlı vətəndaş bildirdi ki, qafqaznews.az-da dərc olunan yazını oxuyub: “Mən onun fırıldaqçılığı ilə bağlı məqaləni oxuyanda heç də təəccüblənmədim. Onun fırıldaqları çox olub. Mən özüm 5 il onun yanında usta işləmişəm, sonda maaşım az idi deyə bezib çıxdım. Mənim əmək kitabçamı da vermirdi, hələ 250 manat da maaşımdan qalmışdı, onu ala bilmədim. Sonra Məşğulluq İdarəsinə şikayət elədim, mənim “trudovoy”umu alıb verdilər, amma 250 manatım o gedən getdi. Onun “Qızılqum”da böyük torpaq sahəsinin olduğunu bilirəm. Hasar tikilərkən, sementi şirkətin “Qazel”iylə mən daşımışam. Orucəli Hacıyevlə yaxınlığını isə bilmirəm”. İ.İsmayılov bildirdi ki, “Axund FTKA”da daim maaşlar gecikdirilirdi: “Ayın axırı maaş verilməliydisə, saxlayırdı, növbəti ayın 15-dən keçəndə verirdi. Çox adam orda maaş azlığından əziyyət çəkib. Dörd yüz manat maaş alırdım, amma əmək kitabçasında 150-160 manat yazırdılar. 20 yanvar günü də işləmişəm. Gərək müdir işçini dolandırsın, ac saxlamasın ki, özü də dolana bilsin. Çox vaxt müştəriləri də aldadırdı. Ucuz qapını baha qiymətə sırıyırdı…. 50 manat maaşımın qalxması üçün, onunla 3 saat yarım söhbət eləmişəm. Müdir kimi, özünə hörmət eləmirdi. “S Class” sürür, 10-TV-022. Özü də Pirşağıda qalır. Zabratda qapı-pəncərə sexi var, amma eşitdiyimə görə, indi orda işlər elə də yaxşı getmir”.
Onun sözlərinə görə, 2011-ci ildə həmin əraziyə çəpər çəkilərkən, əraziyə “qolu papkalı bir nəfər” gəlib: “Özünüz bilirsiniz də pullu adamlar necə olur. Fuad dedi ki, 5-10 manat verin, yola salın… Həmin adam getdi, başqası gəldi, ondan da vəzifəli birisi. Ondan sonra dayandırdılar tikintini”.
Bu zaman oxucularda sual yarana bilər: “Fuad Axundov başqalarının 2 hektar torpağını da mənimsəyir, halal maaşdan 250 manatı da?”. Əlbəttə, inanırıq ki, Fuad Axundov bu və digər suallara şəxsən aydınlıq gətirəcək.
