Araşdırma materiallarına görə, Fətullah Gülənin təsis etdiyi “Nurçu Camaatı”nın dünyada 48 min irili-xırdalı rəsmi qeydiyyatdan keçən şirkəti var. Bunun 520-si Qazaxıstanın, 480-i Özbəkistanın, 345-i Türkmənistanın (Qırğızıstan artıq könüllü olaraq ərazisində fəaliyyət göstərən 215 “Nur”çu şirkətə məğlub olduğunu, onlara qarşı birgə mübarizədə RF-dan kömək istədiyini etiraf edib), 185-i Azərbaycanın payına düşür.
Fətullah Gülən 1985-ci ildən ABŞ Mərkəzi Kəşfiyyat İdarəsinin strateji qolunu təşkil edir. Hər il Azərbaycandan təqribən 10 min səhifəlik strateji məlumatlar alan bu qurum, ABŞ-ın Pensilvani – 100 saylı ərazisindəki (dairəsindən, nömrəsindən və s.) əsas binasından alınan məlumatları saf-çürük edir, onun bir qismini razılıq əsasında Böyük Britaniyanın Mİ-6, Almaniyanın BND, Fransanın hərbi kəşfiyyatına, Vatikana, Norveç, İsveç, Panama xüsusi xidmət orqanlarına, OPEK-ə üzv olan ölkələrin ABŞ-dakı diplomatik korpuslarındakı iqtisadi və hərbi kəşfiyyat şöbələrinə satır.
“Nurçu Camaatı”nın Nizamnaməsi Suriyada fəaliyyət göstərən “Hezbullah”çıların Nizamnaməsinə çox uyğun yazılıb.
Milli münasibətlərin pozulmasında, qardaş qırğınlarının törədilməsində, lokal müharibələrin, dini qarşıdurmaların baş verməsində, sərhədlərin kütləvi şəkildə pozulmasında və dağıdılmasında ABŞ tərəfindən ilk addımı “Gülən Camaatı” atır.
“Nur”çuların Nizamnaməsində “Şəhidlik” anlayışı yoxdur və torpaq uğrunda, vətən yolunda şəhid olan hər kəsə adi bir yanaşma var. Vətənpərvərlik, dövlət və dövlət başçısına hörmət və ehtiram, ailəyə, adət-ənənəyə sadiqlik prinsipi onların Nizamnaməsində yoxdur (Ancaq İmama – yəni Fətullah Gülənə məhəbbət var.).
Toplanmış məlumatlara görə, ABŞ Mərkəzi Kəşfiyyat İdarəsində hazırlanmış, əslində Türk birliyinə qarşı yeni bir cəbhə açmaqda olan “Kölgəli İmam” Fətullah Gülənin “Pensilvaniya layihəsi” kimi tanınan “İsti dalğalar altında”kı Azərbaycan planı baş tutmadı, iflasa uğradı. Onda 1992-ci il idi və dövlət neft şirkəti yenicə formalaşmışdı.
Məlumata görə, 1992-ci ildə Pensilvaniya 100-də hazırlanan bu bədnam təxribat planının mayasında Azərbaycanın yanacaq resurslarının dağıdılması, parçalanması təhlükəsi dayanırdı.
Kəşfiyyatın “İsti dalğalar altında” planı əslində iflasa uğramışdı və Fətullah Gülən administrasiyası bu planı məhz Azərbaycanda həyata keçirmək üçün birinci mərhələdə 57 milyon dollar ayırmışdı. 1994-cü ildə Azərbaycanda xüsusi təxribat planlarını həyata keçirmək üçün ayrılan vəsaitin 22 milyon dolları gətirilmişdi. Bu Azərbaycan əleyhinə strateji plan idi. Həmin vaxt Fətullah Gülən haqqında, onun “Nurçular” batalyonu haqqında heç kəs danışmırdı. Hamı bu mövzudan – tədricən ölkənin ən ali qanunlarını sarsıtmaq gücündə olan “Gülən” mövzusunda danışmaqdan ehtiyat edirdi. Məncə ölkənin “Lider” tele-kanalı bu mövzuda ilk materiallarını ortaya qoydu…
Həmin ərəfədə ABŞ konqresmenlərindən yeddi nəfəri Ağ Evə ünvanladıqları rəsmi müraciətdə ölkə başçısından xahiş edirdilər ki, Fətullah Gülən müqəddəs bir şəxsiyyət kimi toxunulmaz elan olunsun. Amma bütün bunların dəxli yox idi.
Vaxtilə Fətullah Gülən məsələsi, onun Azərbaycan ictimai-siyasi mühitindəki pərdəarxası pozuculuq niyyətləri, mənəvi-psixoloji terror planları müzakirə obyektinə çevrilsə də, edilən təzyiqlərdən irəli getmək mümkün olmayıb. Apardığımız tədqiqata görə, Azərbaycanda 156 strateji obyektdə (İstər nazirlik olsun, istər departament, istər şirkət, ali məktəb, KİV və RT mərkəzləri… dəxli yoxdur. Həmçinin ayrı-ayrı Rayon İcra Hakimiyyətlərində, hüquq-mühafizə orqanlarında.) Fətullah Gülən özünün dayaq dəstələrini yarada bilib. Artıq 28 ildir Fətullah Gülən Azərbaycanda özünə yuva bağlayıb.
Fətullah Gülən müsəlman dünyasının SOROSudur. O, ancaq gücsüzlərə, yerdən qalxa bilməyən dövlətlərə əvəzsiz kredit ayıran şəxsdir.
Fətullah Gülənin Azərbaycan istiqamətində bilavasitə ABŞ MKİ-də hazırlanmış xüsusi “Paraqraf”ları və “Strateji Direktiv”ləri var. Bütün bunlar Nizamnamədə ayrıca qeyd olunur. Aşağıdakı təsnifata nəzər salaq:
A) Paraqraf – 13
– Bilavasitə (nəyin bahasına olursa-olsun) nəzərdə tutulan ərazinin təhlükəsizlik xidmətləri cərgəsində Nurçular özlərinin “xüsusi şöbələri”ni təsis etməlidir (Qeyd edək ki, belə bir şöbə, sonra Departament və yaxud idarə Türkiyə Cumhuriyyətinin Milli İstihbarat təşkilatı cərgəsində fəaliyyət göstərirdi. Və həmçinin həmin mərkəzlərdən digər Türkdilli respublikalara işgüzar səfərlər baş tuturdu).
Paralel olaraq bu ənənə ölkənin hüquq-mühafizə orqanlarında ciddi bir məsələ kimi qoyulur.
Ölkənin Ali Məhkəməsində, Prokurorluq orqanlarında, xüsusən onun hərbi qanadında (yəni Hərbi Prokurorluq cərgəsində) Daxili İşlər Nazirliyinin qurumlarında, Sərhəd Qoşun kontingentində, Müdafiə Nazirliyində, Ədliyyə Nazirliyinin Qeydiyyat Şöbələrində əlavə xüsusi qaydalar qoyulub.
B) Paraqraf – 15.
– “Nur”çular bilavasitə fəaliyyət göstərdikləri ərazilərdə (söhbəti Azərbaycan ərazisində aparaq) ehtiyat etdikləri şəxslər, nüfuzlu adamlar, məmurlar, qələm sahibləri… haqqında kütləvi və ictimai yerlərdə mənfi rəylər yaradır, onların gözdən salınması, nüfuzdan düşməsi istiqamətində ardıcıl iş aparırlar. Gücləri çatmayanda digər vasitələr; terrora, insanların aradan götürülməsinə, ərazilərdə dövlət əleyhinə mitinq və nümayişlərin qurulmasına, penitensiar xidmət orqanlarında iğtişaş və yanğınlara əl atırlar. (Azərbaycan tarixinin son 1980-cı ildən bəri tarixinə nəzər salın). Azərbaycan xalqının birliyi, vahidliyi, ölkə başçısı ətrafında sıxlığı onları təmin etmir.
Azərbaycan istiqamətində (yəni min bir əzabla qurulan bu ölkəni parçalamaq, dağıtmaq üçün) Fətullah Gülənin 7 (yeddi) İmamı var. Bu İmamlara “İcraçı İmamlar” deyilir. Bu icraçı imamların kiçik dəstələri, bank hesabları, onları yedirib-içirə biləcək şirkətləri mövcuddur. Onların Azərbaycanda öz mağazaları, çörək zavodları, bazarları, alış-veriş marketləri, şirniyyat dükanları var (Eynilə Türkiyədəki kimi).
Terror təşkilatları ilə onların əlaqələrinin qurulub-qurulmaması… bu ayrı mövzunun söhbətidir. Biz sadəcə mövcud mövzuya nəzər salırıq.
Azərbaycan istiqamətində biz 16 Paraqrafdan ikisinə nəzər saldıq. Bununla yanaşı Azərbaycanı gözdən salan 14 Direktiv “Nurçu Camaatı”nın əsas funksiyalarının üstündə köklənib. Məsələn, 2 saylı Direktivdə Azərbaycanın dörd müxtəlif hissəyə parçalanması xatırlanır, Talış-Muğanın, Ləzgistanın, Qarabağın, Gürcüstanın (?) adları çəkilir. Eynilə RF-da da belə məsələ qoyulur; ölkənin 89 subyektində dağıntı törətmək, dini qarşıdurma yaratmaq, nəhayət RF-nı altı hissəyə parçalamaq və s. Daha sonra Türkiyədə də belə parçalanmanı və dövlətçiliyi məhv etməyi qarşılarına məqsəd qoymuşdular. Maraqlıdır ki, Türkiyə Parlamentində 170 deputat Fətullah Gülənin pulu və təbliğat maşını ilə seçilib (Eynilə 2000-ci ildəki kimi).
Araşdırma materiallarına görə, Fətullah Gülənin Azərbaycanda mühüm adamları ələ almaq, onları ram etmək və yüksək vəzifələrə təyin etmək, ali zabit rütbələri verərək irəli çəkmək… sonda öz gərəkli məqsədlərinə yönəltmək kimi “Xüsusi proqram”ları var.
Azərbaycanda bu gün hərtərəfli gücə malik olan şəxslərin “Nur”çular tərəfindən ram edilməsi əsas işlərdən biri olub. Məsələn, Türkiyə MİT-nın ölkə mətbuatında yayılan məlumatlarına görə, Azərbaycanda hər tərəfli gücə və iş qabiliyyətinə malik 327 nəfər strateqdən cəmisi 21 nəfəri ram edilməyib. Bu 21 nəfər Fətullah Gülənçilərdən nifrətlə üz çeviriblər, onları qovublar və nəticədə bu 21 nəfər strateji şəxs bu addımları ilə Vətənə, ölkəyə, millətə, dövlət başçısına, öz milli ideyalarına sadiq qaldıqlarını nümayiş etdiriblər. Mən onların adlarını çəkmirəm. Bunun mənə aidliyi yoxdur…
Lakin bir strateji obyektin üstündə dayanmaq istərdim. O da SOCAR neft şirkətidir. Qeyd edim ki, 2014-cü ildə Fətullah Gülənin SOCAR-ı dağıtmaq, onun funksiyalarını məhv etmək proqramı var idi. SOCAR-ı təsir dairəsinə salmaq, onun cərgələrində “Nur”çu təlimi görmüş şəxsləri yerləşdirmək, nəticədə şirkətin maliyyə və xarici sərmayələr sistemində əyləşmək… Fətullah Gülənin ciddi maraqlarında olub. Lakin son anda öz tərəfdarlarına ciddi xəbərdarlıq edib: “…Siz SOCAR-ı ram edə bilmədiniz…”
Qeyd edək ki, Türkiyənin MİT-nın və RF-sının Federal Təhlükəsizlik Xidmətinin sənədlərində maraqlı açıqlamalar var. Fətullah Gülən “Prizma” əsərində yazır ki, keçmiş ittifaqın cərgəsində dayanan Azərbaycan yanacaq resurslarının bütövlüklə nəzarətə alınması “…dostlarımızın yanında nəzər-diqqətimizi daha da artıracaq…” Dostlarımız deyəndə şübhəsiz ABŞ-ın təhlükəsizlik qüvvələrinin yüksək rütbəli zabitlərini nəzərdə tutur…
Başqa bir əsərində isə yazır: “…Mən Azərbaycanı sevə bilmədim və ona nifrət etməklə kifayətləndim…” (Bax: Fətullah Gülən: “Fəsildən fəsilə”.)
Əslində Azərbaycanın ağlı başında olan vətəndaşları da sizi sevmir, sizə nifrət edir!
Yadınızdadırsa bu ilin əvvəllərində istintaqı başa çatan RF-nın Ədliyyə Nazirliyindən qeydiyyatdan keçən 180 qeyri-hökumət təşkilatlarının 102-si Fətullah Gülən tərəfindən qeydiyyatdan keçirilib və onun maliyyə dəstəyi ilə işə başlayıblar. Həmin istintaq materiallarının arasında maraqlı materiallar var. Məhz bundan sonra məlum oldu ki, RF-nın adları qeyd olunan qeyri-hökumət təşkilatları Rusiyanın yanacaq resursları ilə bağlı ən ciddi və dövlət əhəmiyyətli materialları bilavasitə “Nur”çulara satmaqla məşğul olublar.Materiallar sırasında, Rusiya “Nur”çularının verdikləri məlumatlara görə, Azərbaycan “Nur”çuları erməni separatçılarının Azərbaycanın işğal olunmuş ərazilərindəki qoşun kontingentinə maliyyə yardımları etməklə də məşğul olublar.
… Məsələ həm ciddi və həm də mürəkkəb olaraq qalır. Həm Türkiyə, həm Qazaxıstan dünyada mənəvi və psixoloji terrorun atası hesab olunan, insan mənəviyyatını və ləyaqətini alçaldan, onun adət və ənənəsini təhqir edən, onun inanc və güman yerlərini məhv etməyə çalışan “Nurçu Camaatı”nı Beynəlxalq Terror Təşkilatları sırasına salmağı ABŞ Dövlət Departamentindən istəyiblər. Şübhə etməyək ki, Azərbaycan tərəf də bu çağırışa qoşulacaq. Çünki “ASALA” kimi ciddi terror təşkilatını ABŞ Dövlət Departamentinin “Terror təşkilatları” siyahısına salan məhz Azərbaycan tərəfi olmuşdur.
Rövşən Novruzoğlu
Milli Təhlükəsizlik üzrə ekspert, politoloq
Azpolitika.info
