Nərimanov Rayon Məhkəməsində saxta sənədlər hazırlamada təqsirləndirilən Cəfər Nəbiyevin (adı, soyadı şərtidir) cinayət işi üzrə məhkəmə istintaqı yekunlaşıb.
Pravda.az-ın əldə etdiyi məlumata görə, hakim Xalidə Əlisoyun sədrliyi ilə keçirilən prosesdə hökm oxunub.
Məhkəmənin hökmü ilə ona 2 000 manat cərimə cəzası təyin edilib.
Qeyd: Təqsirləndirilən şəxsə qarşı irəli sürülmüş ittihama əsasən, o, nəqliyyat vasitəsini idarə etmək hüququ verən rəsmi sənədin saxtalaşdırılması və həmin saxta sənəddən istifadə etmə cinayətində təqsirləndirilir.
İstintaq materiallarında göstərilir ki, Cəfər Nəbiyev Rusiya Federasiyasına məxsus sürücülük vəsiqəsini qanunsuz yolla əldə edərək, sonradan bu sənəddən istifadə etməklə Azərbaycan Respublikasında qanuni sürücülük vəsiqəsi almağa cəhd edib. Belə ki, şəxsiyyəti istintaqa məlum olmayan şəxslər tərəfindən mətbəə üsulu ilə deyil, printer vasitəsilə hazırlanmış, rəsmi nümunəyə uyğun gəlməyən və tam saxta hesab edilən “B, C” kateqoriyalı Rusiya Federasiyasının sürücülük vəsiqəsini əldə edib.
İttihama görə, təqsirləndirilən şəxs bu sənədin saxta olduğunu bildiyi halda, 20 aprel 2024-cü il tarixdə Bakı şəhəri, Nərimanov rayonu ərazisində yerləşən 1 saylı “ASAN xidmət” mərkəzində Azərbaycan Respublikası Daxili İşlər Nazirliyinin müvafiq qeydiyyat-imtahan bölməsinə təqdim edərək ondan istifadə edib. Məqsəd isə saxta sənəd əsasında Azərbaycan Respublikasının orijinal sürücülük vəsiqəsini əldə etmək olub.
Məhkəmə iclasında Cəfər Nəbiyev özünü qismən təqsirli bilərək deyib ki, 2016-cı ildə işləmək məqsədilə Rusiyaya gedib və orada “Maqa” ləqəbli azərbaycanlı ilə tanış olub. Onun sözlərinə görə, həmin şəxs müxtəlif sənədlərin hazırlanmasında vasitəçilik edirmiş.
Təqsirləndirilən şəxs qeyd edib ki, sonradan sürücülük vəsiqəsi əldə etmək istəyib və “Maqa”nın vasitəsilə bunu asan yolla həll edə biləcəyini düşünüb. Bildirib ki, həmin şəxs ona borclu olduğuna görə pul əvəzinə sürücülük vəsiqəsi təşkil etməsini istəyib. Təxminən 10-20 gün sonra isə vəsiqə tanımadığı bir şəxs vasitəsilə ona çatdırılıb və sənədi hava limanından götürüb.
Daha sonra - 20 aprel 2024-cü il tarixdə paytaxt ərazisində yerləşən “ASAN xidmət” mərkəzinə müraciət edərək həmin vəsiqəni dəyişmək istəyib. Lakin sənədi qəbul edən əməkdaş onun saxta olduğunu müəyyən edərək bu barədə müvafiq orqanlara məlumat verib.
Cəfər Nəbiyev məhkəmədə söyləyib ki, sürücülük vəsiqəsini heç bir imtahan vermədən və ya kurs keçmədən əldə edib. O, sənədin saxta üsulla hazırlandığını ehtimal etsə də, bunun problem yaratmayacağını və Azərbaycanda dəyişdirilməsinin mümkün olacağını düşündüyünü deyib.
Cəfər Nəbiyev törətdiyi əməldən peşman olduğunu bildirərək məhkəmədən barəsində yüngül cəza təyin olunmasını xahiş edib.
