Göyçay rayon sakini, 1-ci qrup gözdən əlil Abdullayev Ramin Məhəmməd oğlu tərəfindən Hurriyyet.az saytının redaksiyasına şikayət məktubu daxil olub. Şikayətçi bildirir ki, “Optimal” mağazası tərəfindən dələduzluqla üzləşib:

"2023-cü ilin aprel ayında “Optimal” mağazaya yaxınlaşıb, kreditlə paltartikən maşın almaq istədiyimi bildirdim. Nəticədə, 2 illik zəmanətlə tikiş maşınını alıb, evə gətirdim.

Bir müddət sonra maşın işləmədi. Mağazaya qaytardım, dedilər ki, servisə göndəriləcək, oradan nə cavab gəlsə, sizə bildirəcəyik.

Maşın 2 ay servisdə qaldı. Sonra zəng etdilər ki, gəlin götürün. Gətirdim, yenə işləmədi. Yenə apardım, mağazada özləri yoxladılar və gördülər ki, həqiqətən maşın işləmir. Dedilər, yenə servisdə düzələcək.

Bu proses 5 dəfə təkrarlandı. Aradan bir il keçdi, hər dəfə eyni problem.

Sonuncu dəfə maşını servisə göndərdim, 5-6 ay keçdi, heç bir xəbər çıxmadı. Sonra mağazaya yaxınlaşdım, gördüm mağaza bağlanıb. Ucarda, Ağdaşda, digər rayonlarda olan filiallara da getdim, heç kim cavab vermədi.

70 manata qədər ödəmişdim, sonra ödənişi dayandırdım. Maşını düzəldib verməyiblər ki, ödənişi də edim.

2024-cü ilin sonlarında, 2025-ci ilin əvvəlində “Ferrum Kapital” deyilən təşkilat mənə zəng edib, borc tələb etməyə başladı. Dedim ki, məhsul mənə qaytarılmayıb, mən necə pul ödəyim? Hədələdilər ki, məhkəməyə veriləcəksən. Sonra bildiriş gəldi ki, əgər məhkəmə prosesində iştirak etməsən, qərar veriləcək. Etiraz ərizəsi yazdım, amma heç bir faydası olmadım.

Mən birinci qrup əliləm, heç yerdən kredit verilmir. İllərlə müştəri olmuşam, amma bu son məhsulla bağlı başıma bu iş gəldi.

Polisə də müraciət etmişəm, dedilər ki, bu, 2022-ci ilə aiddir, biz tapa bilmərik. Hazırda isə “Ferrum Kapital” məndən pul tələb edir. Bu nə qədər doğru bir addımdır? Malımı vermirlər, amma pul tələb edirlər. Bu qədər qanunsuzluq olar?

Belə çıxır ki, bank gedib dələduzlarla müqavilə bağlayır və ikitərəfli vətəndaşları aldadırlar. Mən maşını aldığım vaxt bankdan xəbərim olmayıb. Çox alış-veriş etmişəm onlardan. Hər zaman daxili kredit açılıb. Bu dəfə həm xarab mal satdılar, həm də pulumu mənimsədilər.

Hər kəsə bəllidir ki, bank müqavilə bağladığı şirkətlə zəmanət müqaviləsi imzalayır. Mal xarabdırsa, niyə bunun bütün əziyyətini mən çəkməliyəm?"

Məsələ ilə bağlı bank sahəsi üzrə ekspert Əkrəm Həsənovla əlaqə saxladıq. O, bildirdi ki, müqavilə əsasında “Ferrum Kapital”dan pul götürülübsə, əlbəttə, pul ödənilməlidir: "Maşın xarab çıxıbsa, vətəndaş bu problemi mağaza ilə həll etməlidir. Mağazanı məhkəməyə verməlidir. Yenə də sənədləri görməmiş bu haqda düzgün rəy bildirmək biraz çətindir".