Ölkədə lisenziyasız stomatoloji kabinetlərin təhlükəli fəaliyyətini əks etdirən çoxsaylı yazılarımız yəqin ki, oxucuların yadındadır. Bu barədə zaman-zaman jurnalist araşdırmaları aparılaraq əlaqədar səlahiyyətli orqanların nəzərinə çatdırılıb. Təəssüf ki, indiyədək nə Səhiyyə Nazirliyi, nə də digər əlaqədar təşkilatlar tərəfindən ciddi və təsirli tədbirlər görülməyib. Baxmayaraq ki, Səhiyyə Nazirliyi sistemində demək olar ki, hər il özəl tibbi fəaliyyətin vəziyyəti ilə bağlı yoxlamalar aparılır, ortada konkret və kəsərli nəticələrrin olmadığından bu yoxlamaları formal adlandırmaq zorundayıq. Ən azı ona görə ki, paytaxt Bakının küçələrində az qala addımbaşı meydan sulayan lisenziyasız stomatoloji kabinetlər heç nə olmayıbmış kimi öz işində, qazanc əldə etməyindədir. Düçünürük ki, səhiyyə naziri Oqtay Şirəliyev "aşıq gördüyünü çağırar" deyib bu biabırçılıqlara şahidliyini əsirgəməsəydi bəlkə də narahatlığa heç bir əsas olmayacaqdı. Təbii ki. bu narahatlıq tək jurnalist təşəbbüskarlığından irəli gəlməyib. Hələ bir müddət əvvəl ölkənin tanınmış həkimləri məsələ ilə əlaqədar həyəcan təbili çalaraq cəmiyyətimizi addımbaşı izləyən təhlükə barədə xəbərdarlıqlarını etmişdilər. Gundelik-baku.com xəbər verir ki, lisenziyasız stomatoloji kabinetlərini virus ocaqları kimi xarakterizə edənlərdən biri də Səhiyyə Nazirliyinin baş mütəxəssisi, tibb elmləri namizədi, Respublika Stomatoloji Mərkəzinin baş həkimi tanınmış stomatoloq Kamran Aslanovdur. Kamran həkimin hələ ötən ilin əvvəllərində mətbuatda dərc olunan açıqlamaları hamı kimi bizim də ürəyimizcə oldu. Düçündük ki, əhalinin sağlamlığının qeydinə qalan belə təcrübəli mütəxəssislərimiz nə yaxşı ki, mövqelərini ortaya qoymaqdan çəkinmir,paytaxtda və ətraf qəsəbələrdə qanunsuz fəaliyyət göstərən əksər stomatoloji kabinetlərdəki dəhşətli antisanitariya və infeksiogen şərait barədə açıq fikir söyləyir. Bu mənada Respublika Stomatoloji Mərkəzinin baş həkimi Kamran Aslanovla həmfikir olduğumuzu hörmətli həkimin nəzərinə çatdırmağı da vacib bilirik. Bununla belə baş həkimin işdə və əməldə sərgilədiyi fərqli mövqelərin də səbəblərini anlamağa çalışırıq. Qeyd edək ki, sözügedən açıqlamada baş mütəxəssis təhlükəli virusların yayılması təhlükəsinin qarşısının alınması üçün ərazi sanitar epidemioloji stanasiyaları ayıq-sayıq olmağa, lisenziyasız fəaliyyət göstərən stomotoloji kabinetlərin fəaliyyətini dərhal dayandırmağa çağıraraq qeyd etmişdi ki, "belə stomotoloji kabinetlər virus ocaqlarıdır". Həkim stomatoloq məsləhət görmüşdü ki, vətəndaşlar lisenziyası olmayan stomatoloji kabinetlərin fəaliyyətindən yararlanmasınlar. Stomotoloji kabinetə girərkən Səhiyyə Nazirliyinin lisenziyasını tələb etsinlər. Sitat, "əslində bu lisenziya stomotoloji kabinetdə görünən yerdə divardan vurulmalıdır ki, xəstənin narahatçılığına əsas qalmasın. Hansı stomatoloji kabinetdə bu lisenziya vurulmayıbsa, xəstələr bilməlidirlər ki, orada həyat və sağlamlıq üçün təhlükəli olan QİCS, Hepatitin müxtəlif növlərinə yoluxa bilərlər. Çünki belə kabinetlərdə alətlərin steril olduğuna heç bir qurum zəmanət vermir”. Görürsünüzmü, necə xeyirxah və humanist bir çağırış səsləndirib hörmətli baş həkim. Etiraf edək ki. Kamran Aslanovu şəxsən tanımasaq da onun barəsində ölkəmizin tanınmış ziyalılarının, elm və mədəniyyət xadimlərinin dilindən həmişə xoş sözlər eşitmişik. Bu baxımdan baş həkimin çağırışlarında şəxsi maraq axtarmaq fikrindən uzağıq. Lakin Kamran həkimin rəhbərlik etdiyi stomatoloji mərkəzin fəaliyyəti ilə bağlı narazılıqlar fonunda oxucu qarşısında biz də məsələyə aydınlıq gətirmək məcburiyyətində qalmışıq. Belə ki, vaxtilə ölkədə analoqu olmayan Mərkəzin xidmətindən bu gün də istifadə edənlər burada qiymətlərin hədsiz dərəcədə yüksək olmasından narazılığını gizlətmir. Dişlərini müalicə etdirənlər üçün təklif olunan kassadankənar ödənişlərin kəllə-çarxa çıxdığı da bildirilir. Mərkəzdə dişin birini qəbzsiz-filansız 20-25 manata çəkdirməli olan şəxs bir daha bu stomatoloji mərkəzə ayaq basarmı? Virusa yoluxma riski ilə üzləşsə də gedib 5 manata diş çəkdirər. Axı maddi dolanışığın çətin olduğu bir zamanda belə bahalıqla rastlaşan xəstələr üçün qiymət amili əsas rol oynayır. Kamran Aslanovun lisenziyasız özəl stomatoloji kabinetlərə qarşı mücadiləsini heç bir vəchlə Respublika Stomatoloji Mərkəzində yaranmış "müştəri" qıtlğı ilə əlaqələndirmək fikrində deyilik. Buna da çalışmırıq. Lakin çalışırıq ki,lisenziyasız işləyən diş kabinetlərindəki dəhşətli mənzərələr barədə əhalini məlumatlandıran hörmətli Kamran həkimin rəhbərlik etdiyi Mərkəzdə qiymət artımının hansı obyektiv səbəblərlə bağlı olduğunu anlayaq. Bizcə, bu məsələdə səhiyyə naziri Oqtay Şirəliyevdən kəsərli tədbir gözləmək sadəlövhlük olardı. Ona görə də əhalini tək çağırışlarla vürus mənbəyi hesab olunan diş kabinetlərindən yayındırmağın mümkünsüzlüyünü düşünürük. Bunun yeganə yolunu isə qanuni fəaliyyət göstərən özəl stomatoloji mərkəzlərdə xidmət haqlarının aşağı salınmasında görürük. Bu mənada belə qənaətdəyik ki, peşəkar stomatoloq təşkilatları tərəfindən ölkədə birgə fəaliyyət planı hazırlanması və həyata keçirilməsi problemin həllini xeyli asanlaşdıra bilərdi. Qarşı tərəfi də dinləməyə hazırıq.
