Rusiya prezidenti Vladimir Putin Ermənistanın baş naziri Nikol Paşinyanı 50 illik yubileyi münasibətilə təbrik edib. Rusiya lideri həmkarına möhkəm cansağlığı, xoşbəxtlik və dövlət qulluğunda uğurlar arzulayıb, həmçinin Avrasiya məkanında sabitlik, təhlükəsizlik və firavanlıq naminə dövlətlərarası münasibətlərin daha da inkişaf etdirilməsinin tərəfdarı olduğunu bildirib. Lakin hələlik Paşinyan daha çox bu problemlərlə deyil, erməni kilsəsinin taleyi ilə maraqlanır.

Reyting.az xəbər verir ki, bu barədə “Nezavisimaya qazeta” yazıb.

Rusiya nəşrinin təhlilində qeyd olunur:

Ermənistan hökumətinin başçısı yubiley ərəfəsində Erməni Apostol Kilsəsini kilsələrinə qeyri-adekvat münasibətinə görə tənqid etmək qərarına gəlib:

"Kilsələrdə bütün lazımsız şeylər saxlanılır: əlavə mərmər plitələr, sement torbaları, köhnə paslı armatur parçaları. İnsan niyə kilsəyə gedir? Ruhani bir şeylə təmasda olmaq üçün içəri girir. Birdən içəri girib görürsən ki, bir yerdə zibil səpələnib, haradasa kiminsə paltarı, ayaqqabısı var".

Paşinyan hökumət iclasında keşişləri həm də yalançılıqda ittiham edib, çünki ateist olduqları halda müqəddəs mətləblər haqqında danışırlar.

Eçmiədzin dəftərxanasının rəhbəri, arxiyepiskop Arşak Xaçatryan cavab olaraq bəyan edib ki, Paşinyan təhsil çatışmazlığı, eləcə də düzgün ictimai ünsiyyət və məsələləri dərindən dərk etməkdə daxili böhran nümayiş etdirir. Eyni zamanda, Xaçatryan xatırladıb ki, 2019-cu ildən etibarən Erməni Apostol Kilsəsi (EAK) dəfələrlə hakimiyyət orqanlarından dini abidələrin qorunmasına köməklik göstərilməsini xahiş edib, lakin indiyədək heç bir cavab verilməyib.

Paşinyanın reaksiyası özünü çox gözlətməyib. O, sosial şəbəkələrdə nalayiq şəkildə keşişi söyüb.

Bundan əlavə, o, sual verib: subaylıq andını pozan keşişlə nə etməli? “İndi etik cəhətdən daha dürüst olan nədir: könüllü istefa vermək, yoxsa ruhi iztirablara yol açmaq – araşdırma aparılacaqmı, həqiqət üzə çıxacaqmı?”,- deyə Paşinyan qeyd edib.

Paşinyanın xanımı Anna Akopyan ərinə dəstək verib və o, baş nazirin səmimiliyinə dair bütün şübhələri aradan qaldırıb.

"Saxlanc" sözündən dəli olublar. Təbii ki, belə də olmalıdır. Axı saxlanclar qara cübbə geyinən azğınların həyatının qaranlıq guşələridir. Məhz orada mömin camaatın qəzəbinə tuş gələn pozğunluqlar baş verir. İnanclı xalq bu məmləkətin azğın kütləsini çiyinlərində daşıyır. Ölkənin dini mafiyası saxlanc söhbətindən niyə qaşınır? Hökumət başçısına niyə hücum edir?”

Erməni mediası Paşinyanın kilsəyə qarşı hücuma keçməsinə xeyli yer ayırıb. Xüsusilə, “DOG” kimi tanınan bloger Vartan Qukasyanın ritorikası maraqlıdır. Bundan əvvəl o, 2023-cü ildə İrəvan Şəhər Şurasına seçkilərdə 10,51 faiz səs toplayan “Xalqın səsi” partiyasını yaradıb.

Rusiya-Ermənistan Universitetinin dosenti Anton Yevstratov NG-yə bildirib ki, Paşinyanın kilsəyə təzyiqi həm də onun Ermənistanın hakim elitasının 2018-ci ilin “məxməri inqilab”ından sonra öz mövqeyini qoruyub saxlayan sonuncu köhnə nümayəndəni vəzifəsindən uzaqlaşdırmaq istəyi ilə bağlı ola bilər.

"Hökumət və kilsə arasında münaqişənin açıq şəkildə iyrənc təzahürlərinə istinad etsək, deməli, katolikos Qaregin “inqilab”dan əvvəlki Ermənistanın özünü rahat hiss edən sonuncu nümayəndəsidir. Eyni zamanda, kilsə mövcud müxalifət üçün rejimə müqavimət simvollarından biridir. Keçən il bu, "Vətən naminə Tavuş" hərəkatında ifadə olundu.

Paşinyanın katolikos seçkisinə təsir etmək həvəsi milli ənənələrə ziddir. Erməni dövlətçiliyi hazırda zəifdir, o, bir neçə əsr ümumiyyətlə mövcud olmayıb, əksinə, orta əsrlərdə və müasir dövrdə kilsə hətta bəzi mənalarda onlar üçün dövləti əvəz edib”.