Araqots yeparxiyasının beş ruhanisi, yepiskop Mkrtch (Hayk Proşyan) evlərində aparılan axtarışlardan sonra ifadə verilmək üçün Ermənistan İstintaq Komitəsinin yerli şöbəsinə aparılıb.

İstintaq orqanında dindirildikdən sonra onların hamısına qarşı ittiham irəli sürülüb. Yepiskop Mkrtçın saxlanıldığı yer açıqlanmır. İstintaq qrupunun rəhbəri isə onun harada olduğunu bilmədiyini deyib.

Araqots yeparxiyasının beş nəfər keşişi də artıq saxlanılıb. Erməni Kilsəsinin Müdafiəsi üzrə Ümumerməni Şurası keşişlərin həbsi ilə bağlı bəyanat yayıb. Şura baş verənləri erməni apostol kilsəsinə sistemli təzyiqin təzahürü adlandırıb. Yepikop və keşişlərin saxlanılması Ermənistan hakimiyyəti ilə kilsə arasında qarşıdurmanın yeni mərhələyə keçdiyini göstərir.

Baş nazir Nikol Paşinyanla Erməni Apostol Kilsəsi arasında avqust ayında nisbətən səngiyən qarşıdurmanın payız aylarında yenidən güclənəcəyi gözlənilirdi. Çox güman ki, Hayk Proşyanın və keşişlərin saxlanılması da bunun əlamətidir.

Sözügedən siyasi gərginliyə ümumilikdə, Ermənistanda 2026-cı ilin iyun ayında keçiriləcək parlament seçkiləri kontekstində baxmaq lazımdır. Seçkilər yaxınlaşdıqca radikal müxalifət və hakimiyyət arasında siyasi mübarizənin artacağı gözlənilir. Müxalifətin reytinqi zəif olduğuna görə seçkilərdə uğur qazanmaq şansı çox azdır.

Lakin Erməni Apostol Kilsəsinin müxalifətə dəstək verməsi Paşinyan hakimiyyəti üçün ciddi problemlər yarada bilər. Ona görə də kilsə son vaxtlar hüquq-mühafizə orqanlarının hədəfinə gəlib.

Görünür, Paşinyan seçkilərə qədər kilsəni tamamilə neytrallaşdırmaq və müxalifəti daxildəki əsas dəstəyindən məhrum etmək istəyir. Yepiskop Mkrtçın və keşişlərin saxlanılması kilsədə həbslərin davam edəcəyindən xəbər verir. Bu isə seçkiqabağı Ermənistanda siyasi vəziyyətin sabit keçməcəyini deməyə əsas verir.

Müşfiq Abdulla
“Cebheinfo.az”