Bunu Qaynarinfo-ya açıqlmasında Milli Məclisin deputatı Elman Nəsirov Azərbaycanla Çin arasında viza rejiminin ləğvi məsələsinin bu gündən qüvvəyə minməsini şərh edərkən deyib.

"Azərbaycan-Çin münasibətləri strateji tərəfdaşlıq münasibətləridir. Azərbaycan Prezidenti İlham Əliyevlə Çinin dövlət başçısı Si Szinpin arasında iki dəfə strateji tərəfdaşlıq münasibətləri və onun dərinləşdirilməsini özündə ehtiva edən birgə bəyannamələr imzalanıb", deyə Elman Nəsirov bildirib.

Deputat deyib ki, fundamental məsələlərdə Bakı ilə Pekinin mövqeyi üst-üstə düşür:

"Bu, eyni zamanda, turizm sektorunu da özündə ehtiva edir. Çinin dünya üzrə təxminən 150 milyonluq turisti var. Onun 1 faizi Azərbaycana gəlsə, bəs edər. Turizm sahəsi ölkəmiz üçün strateji əhəmiyyət kəsb edir. Çünki Çin nəhəng dövlətdir, nəhəng turizm potensialı var. 2024-cü ilin aprelində İlham Əliyevin Çinə səfəri zamanı imzalanan sənədə əsasən, hər iki ölkə turistlər üçün qarşılıqlı şəkildə viza rejiminin tətbiqindən imtina edir. Artıq azərbaycanlı, həm də çinli turistlər 30 günü aşmamaq şərtilə səfərlər edə bilərlər. Onlar 180 günlük müddət ərzində 90 günü aşmamaq şərtilə ölkəyə səfərlə bağlı arzularını gerçəkləşdirə biləcəklər. Bu da nəticə etibarı ilə ona götirib çıxarır ki, ən azı 6 ayda 3 dəfə, hər dəfə də 1 ay olmaqla azərbaycanlı və çinli turistlər qarşılıqlı səfərlər edə bilərlər".

Qeyd edək ki, bu gündən başlayaraq Azərbaycanla Çin arasında viza rejimi ləğv edilir. Viza rejiminin ləğvi Azərbaycan Prezidenti İlham Əliyevin Çinə apreldə dövlət səfəri zamanı imzalanmış "Azərbaycan Respublikası Hökuməti ilə Çin Xalq Respublikası Hökuməti arasında ümumvətəndaş pasportlarına malik vətəndaşların vizadan qarşılıqlı azad edilməsi haqqında Saziş”ə uyğun olaraq iyulun 16-da qüvvəyə minib.

Sazişə əsasən, Azərbaycan Respublikasının etibarlı ümumvətəndaş pasportlarına malik vətəndaşları və Çin Xalq Respublikasının etibarlı ümumvətəndaş pasportlarına malik vətəndaşları digər ölkə ərazisinə daxil olmaq, oranı tərk etmək və yaxın tranzit keçmək üçün hər səfər ərzində otuz (30) gündən çox olmamaqla və hər yüz səksən (180) günlük dövr ərzində ümumilikdə doxsan (90) gün müddətini aşmamaqla viza tələbindən azad edilir.