“Gənc Qazilər” İctimai Birliyinin sədri Hacı Vəliyevin yaxınları onun artıq 24 gündür həbsdə aclıq etdiyini bildirir. Yaxınlarının sözlərinə görə, uzun müddət davam edən aclıq Qarabağ qazisinin səhhətinə kəskin təsir göstərib və onun vəziyyəti getdikcə pisləşir.

Bizimyol.info xəbər verir ki, iyulun 15-də vəkili Fəxrəddin Mehdiyev Hacı Vəliyevlə görüşüb. Aprelin 1-də həbs olunduqdan sonra Kürdəxanıda – Bakı İstintaq Təcridxanasında saxlanılan Qarabağ qazisi hazırda Müalicə Müəssisəsindədir.

2020-ci ildə 44 günlük Vətən Müharibəsində gözündən yaralanaraq əlil olan Hacı Vəliyev vəkili ilə görüşdə də gözünün müalicə olunmamasından gileylənib. Vəkil Fəxrəddin Mehdiyev bildirib ki, hüquqlarını müdafiə etdiyi şəxsdən aclığı dayandırmasını xahiş edib.

“Hələ həbsindən əvvəl sağlamlığında problemlər vardı. Əlil olmayan, sağlam insanların belə, həbsdən sonra orqanizmində müəyyən fəsadlar yaranması mümkündür. Çünki insanın belə isti havalarda qapalı şəraitdə saxlanması orqanizmə təsir edir. Hacı Vəliyevin isə səhhətində həbsindən əvvəl də ciddi problemlər vardı. Ən əsası, uzun müddətdir aclıq edir. Bütün bunlar vəziyyəti daha da pisləşdirir”, - deyə vəkil bildirib.

Ailə üzvləri Hacı Vəliyevin hazırkı durumu ilə əlaqədar narahat olduqlarını bəyan edərək, müvafiq dövlət qurumlarını məsələyə müdaxilə etməyə çağırıb:

“Sağlamlığında elə problemlər olan biri üçün bu cür isti günlərdə 24 günlük aclıq nə deməkdir, təsəvvür etmək çətin deyil. Bildiyimizə görə, o, izolyasiya şəraitində saxlanılır, başqa xəstələrlə birlikdə də deyil, təcrid olunub. Bu da bizim narahatlığımızı daha da artırır. Xahiş edirik, aidiyyəti qurumlar Hacı Vəliyevin səhhəti ilə bağlı məsələyə dərhal müdaxilə etsinlər, tədbir görülsün”.

Hacı Vəliyevin digər vəkili Aqil Layıc bildirib ki, bir müddət əvvəl Bakı İstintaq Təcridxanasında müvəkkilinə qarşı pis rəftarla bağlı həm Penitensiar Xidmətə, həm də Ombudsman Aparatına müraciət edib: “İyulun 1-də müraciət etmişəm. Lakin hələ gəlib onun izahatını alan, araşdıran olmayıb”.

Penitensiar Xidmət Hacı Vəliyevin həbsdə aclıq etməsi və səhhətinin pisləşməsi barədə iddialarla bağlı heç bir açıqlama verməyib.

1992-ci il təvəllüdlü Hacı Vəliyev 44 günlük Vətən Müharibəsində gözündən yaralanaraq əlil olub. O, aprelin 1-də həbs olunub. Ona qarşı Cinayət Məcəlləsinin 186.1 (özgə əmlakını qəsdən zədələmə və ya məhv etmə) və 221.3-cü (silah və ya silah qismində əşyadan istifadə etməklə xuliqanlıq) maddələri ilə ittiham irəli sürülüb.

Qarabağ qazisi özünü təqsirli bilmir. İctimai fəaliyyətinə, Qarabağ qazilərinin problemlərini ictimailəşdirdiyinə görə həbs olunduğunu bildirir. Onun həbsindən bir müddət sonra – mayın 28-də “Gənc Qazilər” İctimai Birliyi fəaliyyətini dayandırdığını bəyan edilib. Bu təşkilat 2021-ci ildə yaradılmışdı.