Ermənistanın baş naziri Nikol Paşinyan mayın 25-də Fransanın Avropa və xarici işlər naziri Jan Noel Baronun başçılıq etdiyi nümayəndə heyətini qəbul edib.

 Həmsöhbətlər regional proseslər, o cümlədən Ermənistan və Azərbaycan arasında sülh sazişi çərçivəsində baş verən son gedişat ətrafında fikir mübadiləsi aparıblar.

Paşinyan Ermənistan hökumətinin sülh gündəminə sadiqliyini bildirib.

Öncə onu deyək ki, Ermənistan- Fransa müzakirələrindən konstruktiv mövqe və nəticə gözləməyə dəyməz. Parisin mövqeyi dəfələrlə müşahidə olunub və sınaqdan çıxıb. Yelisey Sarayı heç bir halda Cənubi Qafqazda sülh və sabitliyin təmin olunmasında maraqlı deyil. Fransanın Azərbaycan və Ermənistanla münasibətlərinin hazırkı duruma da birbaşa olaraq Parisin regional siyasəti ilə bağlıdır. 

Fransa Ermənistanla müxtəlif sahələrdə, o cümlədən hərbi sahədə əməkdaşlığı davam etdirir. Bu, təsadüfi deyil. Əksinə, məqsədlidir. Məsələ burasındadır ki, Fransa Ermənistanı getdikcə özündən asılı duruma salmağa çalışır və ardınca “ev tapşırıqlarını” verir. Diplomatiyada buna “kökə və qamçı siyasəti” deyirlər. 

Rəsmi Parisin İrəvanı Moskvanın orbitindən çıxarmaqda və onun əvəz etməkdə iddialıdır. Etiraf etmək lazımdır ki, Fransa son illərdə bunu müəyyən mənada bacarıb. 

Fransanın Cənubi Qafqazdakı durum, o cümlədən normallaşma ilə bağlı maraqlanması birbaşa olaraq destruktiv maraqlarla bağlıdır. Təsadüfi deyil ki, münasibətlərin inkişafına doğru addım atıldıqca Fransa Bakıya qarşı mövqeyini sərtləşdirir, İrəvanla isə “mehribanlaşır”. Çünki Fransadakı Emmanuel Makron hakimiyyətinin təlaşı artır. 

Məsələ burasındadır ki, Azərbaycanla Ermənistan arasında sülh sazişinin imzalanması Rusiyanın regiondakı təsir imkanlarını artıra bilər. Bu isə Fransanın maraqlarına uyğun deyil. Sülh nəticəsində Ermənistan qonşusu Rusiyadan daha çox asılı vəziyyətə düşə bilər. Bu, Parisin Cənubi Qafqaza müdaxilə imkanlarını məhdudlaşdıracaq. Bu səbəbdən də Fransa bütün imkanları ilə sülhə mane olmağa çalışır. 

Paşinyanın Ermənistan hökumətinin sülh gündəminə sadiqliyini bildirməsi məsələsinə gəldikdə isə bildirməliyik ki, bu, növbətçi bəyanatdan savayı bir şey deyil. Eyni ilə Paris kimi İrəvan da özünü “sülh göyərçini” kimi təqdim etməyə çalışır. Amma faktiki olaraq əməldə bunu təsdiqləmir. Ermənistan Azərbaycanın haqlı tələbinə müvafiq olaraq konstitusiyanı dəyişmədikcə və Minsk Qrupunun ləğvi ilə bağlı müraciət etmədikcə, həmçinin qərbi azərbaycanlıların ata- baba torpaqlarına şərait yaratmadıqca sülhlə bağlı deyilən bütün sözlər mənasızdır. 

Siyasi şərhçi Kənan Novruzov,

Sitat.info